2Mos. 2
2
Pututukat matat Mose
1Kateteret nenda sara sirimanua simanteu sibara ka muntogat Lewi, mutalimou ka sara sinanalep sibara ka muntogat nenda leu et. 2#Pugap. 7:20; Ibr. 11:23 Lepa pusuruketnangan sinanalep nenda samba tu'tuakenangan matat sara toga simanteu. Kateteret iitconia, sikolik nenda bulat malainge tubunia, lipputakenangannia telu ngalaggo burunia. 3Tapoi sikolik nenda, ta momoi ilipputakenia simaburu. Iageti ina nenda masiala sara karakjak sigalai ka labbaet samba lakkekinangannia pasamba rama' bule bui' ituguru oinan. Si kolik nenda galakakenangannia kabagat karakjak nenda lepa abbitnangannia ka bagat oinan Nil nenda samba galakakenangan kabakkat labbaet ka bebet oinan nenda. 4Kebbut sikolik sinanalep nenda, murio makareunan sibara sedda addeat masiitco aponia sipuaaili geti ka baginia.
5Ta' amauju nenda oi togat rimata Parao sinanalep. Gorosotnia kabagat oinan murau, oto sia taiokko sipuukunia ai sia mueenung ka bebet bagat oinan. Sinulut togat rimata sinanalep masiitco karakjak nenda ka talagat labbaet, lepa koiniakenangan sara pagugulet sinanalep masialania. 6Kateteret togat rimata sinanalep masibuka karakjak nenda, itconangan ai sikolik ka bagania, samba sikolik nenda ainia musosou. Togat rimata sinanalep bara nuntut bagania katubunia samba kuanangan, “Nene togatda tai Israel.”
7Lepa kebbut sikolik nenda parere katubut togat rimata sinanalep, “Nuoba leu ina kugaba sara ina tai Israel tottotake sikolik nenda?”
8Aleginangan togat rimata sinanalep, “Kauan maeru.” Iageti ei te siokko nenda masisogai bakkat inan toga nenda. 9Kuanangan togat rimata sinanalep katubut ina nenda, “Abbit kam sikolik nene, samba tottotakenia addeat kaku, aile kuake upam.” Iageti alanangan toga sinanalep nenda samba tottoninangannia. 10Kateteret aimabeu goiso sikolik nenda, ambitnangannia inania katubut togat rimata Parao sinanalep, Lepa togat rimata sinanalep nenda masibailiuake sikolik nenda togania siurau. “Kukau oninia Mose, kalulut kualania sibara ka oinan”, Ngangan togat rimata Parao sinanalep.
Si Mose mutuitui ka Midian
11 #
Ibr. 11:24-25
#Pugap. 7:23-28 Teteret aimabeu si Mose, einia masiailiake taikalaggaiatnia. Itconangan kipa rakau sia masigalaiake galajet simakope sane. Itconangan leu et sara tai Misir masimateiake sara tai Ibrani, taikalaggaiatnia nenda. 12Papitsanangan matania si Mose ka sangalionia, samba kateteret aiitconia ta'anai sirimanua, mateiakenangan tai Misir nenda lepa rateiakenangannia ka ngai. 13Ka gogoinia imapato ei si Mose minca, lepa itconangan rua tai Ibrani ai sia palalaba. Parerenangan si Mose ka simasele nenda, “Angoian le nubobo aleinu?”
14Aleginangan sirimanua nenda, “Kasei amasiuddetake ekeu sibailiu ute samba sipasiukummai? Taleu ai le patuatnu masimateiake aku, kele anumateiake tai Misir nenda?” Lepa malotonangan si Mose samba paatunangannia, “Paat te kaku, amaagaian sigalaiaku nenda.” 15#Pugap. 7:29; Ibr. 11:27 Kateteret aiarepnia rimata Parao pagalaiat sipuaaili nenda, gabanangan enungan bule tumateiake si Mose.
Tapoi putuituinangan si Mose samba segenia ka Midian. Ka sara gogoi kuddunia ka bebet sara uggungan. 16Ai sara Imam ka Midian, ai pitu tatogania tainanalep. Ka sara gogoi, oi sipitu tainanalep ka uggungan nenda masiaisu' oinan samba kaurangannia ka lulak bule rakau lot biribirit ukkuira. 17Tapoi piga pa sia sipasijajago tarimeu masituituiake tatoga taiokko nenda. Lepa oi si Mose masiropake sia samba kaunangan lot tarimeura. 18Teteret aratoili, parerenangan si Rehuel oniakenangan Jitro, ukkuira, “Angoi makope ruei nutoili kam gogoi nene?”
19Alegirangannia, “Ai sara tai Misir siropake kai ka sipasijajago tarimeu sabagei, beringan nia leu masiseilu oinanmai simigi kaunenmai lot biribiri.”
20Parerenangan si Rehuel ka tatogania, “Kaipania kineneiget? Angoi nukaddiuake kam sirimanua nenda? Kenan kam masisogainia tapukom kam simakere.”
21Si Mose ioba le mukuddu sedda. Lepa geti si Rehuel talimouakenangan togania sipuoni Zipora kai Mose. 22Si Zipora masitutuake sara toga simanteu. Toga nenda oniakenangannia si Mose iate Gersom, kalulut aipaatu si Mose, “Aku sara sirimanua siooiake sene.”
23Piga ngarura pa burunia matei rimata Misir. Tapoi tai Israel aipeile sia mangongorik kalulut rapaorei sia, bailiu pusogarangan masitidou paroman. Katsitda sege katubut Taikamanua. 24#1Mos. 15:13-14 Taikamanua masiarep katsitda, samba repdepnangan palelenganNia kai Abraham, Ishak samba si Jakob. 25Nia masiitco sangamberi tai Israel tupaorei, iageti teuakenanganNia masiropake sia.
Chwazi Kounye ya:
2Mos. 2: MWV
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
@LAI 2015