2Mos. 3
3
Taikamanua masisogai si Mose
1Kateteret nenda si Mose masijao sangamberi biribiri samba kambing talikunia si Jitro oniakenangan Rehuel, imam ka laggai Midian. Kateteret ainia masialou tarimeu nenda ka silat simatangeu, sege nia ka leleu Sinai, leleu nenda sipunenan. 2#Pugap. 7:30-34 Sedda patoilanangan tubunia malaikat Tuhan katubunia kabagat juluu obengan sibebela sibara ka talagat turuturu sinarui. Si Mose masiitco rui nenda mujuluu, tapoi ta malalabo. 3Paatunangannia si Mose, “Eddangan kutusoip sedda kulelekake bulat kiseiet nenda. Angoi ta imalalabo rui nenda?”
4Kele aiitconia si Tuhan, ai legreake tubunia si Mose ka kudduat nenda, iageti pusoganangan Taikamanua ka talagat rui nenda, “Mose! Mose!”
Aleginangannia si Mose, “Ai aku sene.”
5Lepa kuanangan Taikamanua, “Bui' numalegre. Golok tarangainu, aipoi nupuririo ka polak sipunenan. 6Aku nene Taikamanuan taikebbukatnu, Taikamanuan Abraham, Ishak samba si Jakob.” Iageti si Mose masitabbo matania aipoi malotonia masikinere Taikamanua.
7Lepa kuanangan si Tuhan, “Aku itcoat pangoringan paamianKu ka Misir samba akuarepingan rapugerei masitiddou tuujaake sia ka sangamberi sirimanua sipaorei sia. Bulatnia, Kuagai sangamberi pangorinnganda. 8Lulut nenda gorosot Aku masiujaake sia ka kabeira tai Misir samba masiabbit sia bela ka tobbou laggai nenda masiailiake sara tobbou laggai simalio. Polaknia makayo samba magabru samba kineneiget airakukudduiji tai Kanaan, tai Het, Amori, Feris, Hewi samba tai Jebus. 9Akuarepingan soura tai Israel, samba akuitcoat leu et kipa rapaoreiji sia tai Misir. 10Kineneiget kukoiniake ekeu masipatiboake si Parao, bule ioi nuuteake paamianKu bela ka tobbou laggai nenda.”
11Tapoi kuanangan si Mose ka Taikamanua, “Kasei aku nene, bailiu momoi masipatiboake rimata Parao samba masiabbit tai Israel bela ka Misir?”
12Aleginangan Taikamanua, “Aku masiropake ekeu. Ke anuambitan tai Israel bela ka Misir, panindoumuian geti katubukKu ka leleu nene. Iate toggaiat kokoiniakeKu ekeu.”
13Aleginangannia si Mose, “Tapoi ke aku masiailiake sangamberi tai Israel samba masikua katubutda, ‘Taikamanuan taikebbukatmui masikoiniake aku katubumui,’ bulatnia rarerereake te geti, ‘Kasei oninia?’ Lepa kipangan kualegi katubutda?”
14Kuanangan Taikamanua, “Aku iate Aku. Nene te bulat nukukua ka tai Israel, Nia oniakenangan Aku iate Aku, aikoiniakean aku katubumui. 15Paagainungan leu katubutda aipoi Aku, Tuhan, Taikamanuan taikebbukatda, Taikamanuan Abraham, Ishak samba Jakob, masikoiniake ekeu katubutda. Aku te Tuhan nenda oningKu teret buruburu. Nenda te tuoniake Aku ka sangamberi bangsa pat aili reddenan ka sibabara. 16Kenannan samba ruruakenungan sangamberi siuteake tai Israel. Paagainungan katubutda aipoi Aku, Tuhan Taikamanuan taikebbukatda, Taikamanuan Abraham, Ishak samba Jakob, aipatoilaan tubuNia katubum. Segeakenungan ka sia aipoi akupuletseian kam samba akuitcoat sigalaiakenenda tai Misir katubumui. 17Akuteuakean Kuambit sia bela sibara ka Misir, kudduatda paoreiat, samba masitaroake sia ka sara tobbou laggai simakayo samba simagabru, tobbou laggai Kanaan, bangsa Het, Amori, Feris, Hewi samba Jebus.
18PaamianKu masiarepake geti sangamberi sikuam. Lepa geti ekeu pasamba sia siuteake Israel buita masipatiboake rimata Parao samba masikua kamatania: ‘Tuhan, Taikamanuanda tai Ibrani aipatoilaan tubuNia katubumai. Kineneiget obaakean le kai mei telu ngagogoi pusilaijat reunannia ka simatangeu masipanguruatake buluakenen katubut Tuhan Taikamanuamai.’ ” 19Lepa geti kuanangan minca Taikamanua, “Kuagai rimata Misir ta ioobaake kam mei, ke ta tubesiake. 20Tapoi Aku masipakei geti gegeKu, samba masiukum Misir pasamba sangamberi pugejaat baga sabeu sibaraakenen-ku sedda. Lepa nenda obaakenangan nutuitui kam. 21#2Mos. 12:35-36 Kugalai le geti tai Misir maanggai baga katubumui, bailiunangan kateteret paamianKu mutuitui, ta mututuitui kam sita'abbinen. 22Senen tainanalep tai Israel masitiddou geti ka pabebeakenennia tai Misir samba ka tainanalep tai Misir sikuddu sisara lalep, bibilet samba leu pulaingean perak samba mas. Nupakeiake te kam geti nenda ka sangamberi tatogamui. Kisedda nuparauraugi kam tai Misir nenda.”
Chwazi Kounye ya:
2Mos. 3: MWV
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
@LAI 2015