1 Kurintu 2
2
Pablu at Foyungan sabaliwas Isus at Nabulanan sas Fasulungan Kayu
1Ku ngay faduksay, gina au andasug sanya laman gfoyung sa ayu sabaliwa Dius at algan, ku foyungan bunwa siginan at masine ayu daul fag longan, ay bunwa siginan taw at fagmamatanganun. 2Ku algan ku fagfoyungun sa ayu we tiba nu bunway sa way lang baliwas Isus tam Fun at nabulanan sas fasulungan kayu. 3Ay gina au glao sa ayu, mamomuy kway ay kalimu ay gtadtaruyan. 4Ku longan ay ku foyungan bunwa at mafaylatan ay at mamatanganan fag longan, nu bunway siginan tua at Masine fag Falad at nafalag fag fagmabalyananun, 5laman ay fagafanudun siginan tuas Dius at fagmabalyananun ay bundi siginan ngay taw at fagmamatanganun.
Dius at Fagmamatanganun
6Ay dewa katanya, sa sangay taw at maksvn wan at fagafanudun, em foyungan sik fagmamatanganun tua, bundi siginan fagdaul daga at fagmamatanganun, ay bundi siginan tagfunan ste swa daga at ke fakatabuan way ban. 7Ku longan fag fagmamatanganun at masuksukan, kanya Dius at nafalganan siginan ngay nu yud nawat tam daga, laman gfauseganan antam. 8Fagayu fun ste sfagdaul daga wa nasaful kanya fag masuksukan. Nu nasaful di, wa ro natuktuk sas fasulungan kayu tam Fun at mabalyanan. 9Kata at Rirukan te,
“We taw nalag ay we taw nadungug ay we namatangan
sabaliwa Dius at nafalganan sas fagayu takesug anya.”#2:9 Isayas 64:4.
10Ay dewa katanya, siginan at Masine fag Falad, Dius nafasure tua sa antam at masuksukan. Aroro at Masine fag Falad saful way nusnge wain anggan Dius at amatanganan at masuksuk. 11Sinu tagsaful sik taw at amatanganan? Kanya way lang fag taw at nasaful. Ay katanya yangay we saful Dius at amatanganan nu bunway Dius way lang at Falad. 12Tagbanwan si antam fag falad Dius tua at falad, bunwa tagste swa daga fag falad, laman sumaful tam Dius at fon sa antam. 13Em foyungan bunwa siginans taw at fagmamatanganun, nu bunway siginan tua at Masine fag Falad. Gfayamag ami at matuyan sabaliwa at Masine fag Falad, siginan at Masine fag Falad at nafoyung emi. 14Dewa katanya, at Masine fag Falad nu dway gbanwan si sik taw, kafag taw wa kaylat gbul at matuyan siginans Dius at Masine fag Falad, aroro we tungkul sa anya. Aroro at mafatogdungug antam, siginan tua at Masine fag Falad at gubuk. 15At Masine fag Falad nu gbanwan tua si sik taw, kafag taw gtogdungug tua fagayu nusnge wain, ay dewa katanya, tibak taw wa gtogdungug sabaliwa kafag taw.
16Katatuy at Rirukan te,
“Sinu tagsaful tam Fun at amatanganan?
Ay sinu at mafalu anya.”#2:16 Isayas 40:13.
Dewa katanya, antam, tam amatanganan kata tua tam Fun Isus at amatanganan.
Chwazi Kounye ya:
1 Kurintu 2: OCCT
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Copyright © 2021 by OMF International, Philippines