1 Kurintu 1
1
1Au, Pablu, Dius at nauro, gfaning at fakaylatun, laman tam Fun Isus at nasugu. Ay tam faduksay Sustenes magamut si angku.
2Griruk ami sa ayu, Dius at ngay taw sis Kurintu, am at nafili siginan nu nsadi am sa tam Fun Isus. Ay Dius nauro ayu laman sik ngay yud tuam e malong, gasfuan fagayu nusnga nday at natoglag tam Fun Isus, fagayu tagafanud at Fun.
3Sumawa nangus fia ayu Dius tam Mama ay tam Fun Isus at fagmagalangun ay at fagmanabayanun.
Fagusegananun sas Dius
4Kabavn guseganan au sas Dius sabaliwa ayu aroro nafon tua sa ayu at fagmagalangun siginan tam Fun Isus, 5aroro siginan nu masadi sa anya ankaksvn tuam sas nusnge wain, dewa ay longan ay ay fagsafulun, 6aroro nafanud tuam fia em foyungan sabaliwa tam Fun Isus. 7Nu katanya, diam e kurang fagayu at Masine fag Falad at nafon, kaduge am gfanya tam Fun Isus nu kafoli. 8Kanya yangay tagbakvd ayu sitsigons fakatabuan, laman ban diam e malong gina ban tam Fun Isus kafoli fag menit. 9Matuyan tam Dius at nauro ayu laman masadi am sat Baguama, Isus tam Fun.
Tagafanud nu Gbadbaboan
10Ku ngay faduksay, maksvn nu glong au sa ayu sa tam Fun Isus at ngayan te, diuganani tua, ay dangay am ginkafudan, nu bunway masadii tua ay amatanganan ay ay algan. 11Ku ngay faduksay, siginan Klue at fagyafunan e nafadungug angku te, si ayu e gbadbaboan. 12Katatuy ku longan at masuad: am tiba glong am te, “Au, gfaning au Pablu.” Ay at sadi glong te, “Au gfaning au Apulus.” Ay tibak taw glong yangay te, “Au gfaning au Pedru.” Ay tiba glong te, “Au gfaning au tam Fun Isus.”
13O nunda tam Fun Isus ankafud? O Pablu wan at kinrabing sas fasulungan kayu laman sa ayu? Ay o nsurung am sas Pablu at ngayan? 14Guseganan au sas Dius te, kwe nafasurung si ayu, sas day Krispu ay Gayu, 15laman we glong te, ansurung am sa ku ngayan. 16Ay namatang kyay mangaro te, nafasurung kyangay Estefanas fag bale. Sas day kanya, kwe namatang ya ku nafasurung. 17Aroro tam Fun Isus at fagnauroun angku, bunwa au sik tagfasurung nu bunway namoyung kway at Masine fag Barita. Ay ku foyungan bunwa siginan at masine fag ngay longan ay taw at fagsafulun, laman ban wa myud e tungkul tam Fun Isus at nabulanan sas fasulungan kayu.
Dius at Fagmabalyananun ay at Fagsafulun tam Fun Isus wan
18Sa tagafaurianan fag ngay taw we tungkul em foyungan sabaliwa tam Fun Isus at nabulanan sas fasulungan kayu. Ay sa antam, at ngay kinlangfe, kanya wan Dius at fagmabalyananun. 19Aroro e Rirukan te,
“Gfamin kban at mamatanganan fag ngay taw at fagmamatanganun;
gfalyam kban at ke fagsafulun at fagsafulun.”#1:19 Isayas 29:14.
20We tungkul ya at ke fagsafulun, ay tagfoyung Muisis at Faugali, ay at kinnanad kamabadbaboan katsi fag buknga. Dius nafasaful te, we tungkul ste swa daga fag fagmamatanganun. 21Aroro Dius mamatanganan, kanya wa naylat taw nu gtoglag anya nu siginan way ste swa daga fag fagmamatanganun. Nu bunway, Dius kaylat gfalangfe nusnga sinu tagafanud sa em foyungan fag Masine fag Barita, tibak taw at nafayud e tungkul. 22Ngay taw Udyu get te, fasurei sik madulo, ay ngay taw Gresya at fagrvbvyun sik fagmamatanganun. 23Ay dewa katanya, em foyungan sabaliwa tam Fun Isus at natuktukan sas fasulungan kayu, kata way sik fakataidan sa sangay taw Udyu, ay we tungkul sas yud Udyu fag ngay taw. 24Ay dewa katanya, nu sas Dius at ngay nafili fag ngay taw Udyu ay fag ngay taw Gresya,#1:24 ngay taw Gresya: at masuad te, yud Udyu fag ngay taw. tam Fun Isus wan Dius at fagmabalyananun ay at fagmamatanganun. 25Ngay taw nu glong we tungkul Dius at algan nu gfalangfe ngay taw. Dewa katanya kanya fag algan gtungud tua ngay taw at fagmamatanganun. Ay ngay taw nu glong Dius mamomuy aroro Isus anbul; takatanya fag amatanganan gtungud tua ngay taw at fagmabitsugun.
26Ku ngay faduksay, amatangani ay kayaunanan gina Dius guro ayu. Wa ngayu si ayu at mamatanganan, kata ste swa daga fag fagmamatanganun, ay wa ngayu si ayu at mabalyanan ay takadungug fag gaban taw. 27Dewa katanya, Dius nafili ngay taw at natuyan te, at yud mamatanganan, laman gfaplan at ngay mamatanganan, ay nafili yangay ngay taw at natuyan te, at mamomuy, laman gfaplan at mabitsug fag ngay taw. 28Ngay taw at natuyan te, wa mafanud, ay we tungkul, ay tagafalingunan ste swa daga, kata kanya fag ngay taw Dius at nafili, laman namayud e tungkul ngay taw at natuyan te, tiba tungud ste swa daga. 29Dius at fagnafakamulunun takatanya laman nusnga sinu we kamatungudun sit daga salubangan. 30Ay siginan anya ansadi tua tam sa tam Fun Isus. Ay sa antam, kanya wan Dius at fagmamatanganun, siginan anya, Dius nafalangfe antam ay natap antam te, matuyan, ay kata nu yud tam e asalanan. 31Nu katanya, faningi at Rirukan te,
“Nusnga sinu takaylat kamatungudun, at fakamatungudunun sai tua baliwa tam Fun.”#1:31 Eremyas 9:24.
Chwazi Kounye ya:
1 Kurintu 1: OCCT
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Copyright © 2021 by OMF International, Philippines