1 Kurintu 3
3
Dius at ngay Fagsuguan
1Ku ngay faduksay, nu gfakamatoan au ayu, wa kata sas taw at ke Masine fag Falad, nu bunway kata way sas taw tagfaning at bilug at fakaylatun, ay kata sisian yay at fagafanudun sa tam Fun Isus. 2Ku fon ayu kata yay sik susu bilug, bunya at matugas fag fakonun, Aroro dasug katsi yam makatu kayamag at maidap katogdungug fag foyungan. 3Aroro gfaning yayam ay bilug at fakaylatun. Gfangalabian yayam ay gawayan, takatanya ay fakamulun gfatuyan te, gfaning yayam ay bilug at fakaylatun ay fagdaul daga at ugali. 4Tiba si ayu glong te, “Au gfaning au Pablu” ay tiba glong te, “Au gfaning au Apulus,” takatanya ay fakamulun gfatoglag te, gfaning yayam ste swa daga at taw at ugali.
5Sinu nunda Apulus? Ay sinu au, Pablu? Ami, Dius waymi at fagsuguan, ay siginan emi nafanud am sa tam Fun Isus. Ay mesa ami gfakamulun tam Fun at nafatigwanan sa emi fag fakamulun. 6Au at natanum, ay Apulus tagfarugme, ay Dius tagfatugbung ay tagfarabung. 7At mafanud bundi tagtanum ay tagfarugme nu bunway Dius tua, aroro kanya tua tagfatugbung ay tagfarabung. 8Tagtanum ay tagfarugme gsud tagfakamulun, ay Dius gfon ban sa anya fagdua at bulan kata at mesa nafakamulun. 9Ami fagdua ggudgubukan ami gfakamulun, Dius at fakamulun. Ay am, Dius am at gamasun. Ay am yangay Dius at nafalindug fag bale.
10Kata Dius at nafon sa angku fag fakamulun, au at naturuk kata sik tagsaful fia kawat bale. Ay tibak taw at nafataglayun kawat kafag bale. Ay dewa katanya, nusnga sinu takawat kafag bale, dangay glamlamangan. 11Aroro we masine ya nanturuk tibak turuk sas day at kinturuk wan, at masuad te, Isus, Dius at nafili fag Fun. 12Tibak taw nu kawat kanya fag fagfatungkudan turuk, at fangawat saman wa saman, kata gintu, sanbung salapi ay at mafanud ayu daul fag ngay gang. Ay tibak taw at fangawat, kayu way ay makmak kinyango ay nagutan. 13Ay galay sik takawat at nafakamulun kasure ban gina fanginsafulan asalanan fag menit. Ay ginanya ban, afuy gfasure ay gfaskud galay at sadi at nafakamulun. 14Ay nusnga sinu fag taw at nawat nu ddi nirug, kanya ban fag takawat mul tua Dius at fon laman sa anya. 15Ay kanya fag taw at awatan nu nirug way ban, kanya ban we bulan. Dewa katanya, kanya ban umlangfe yay, ay kata way ban nu nlangfe siginan sad afuy.
16O yam nasaful te, am wan Dius at bale, ay at Masine fag Falad gbanwan si ayu? 17Dius gfaurianan ban tagfauri at bale, aroro at bale di e malong, ay am wan kafag bale.
18Nusnga sinu lag gdaya at sadili. Sik taw nu gamatangan te, e fagmamatanganun au kata tagste swa daga at fagmamatanganun, tapi at sadili te, yud e fagsafulun, laman ban at fagmamatanganun sik matuyan tua fia. 19Aroro nu sas Dius at daga salubangan, we tungkul tagste swa daga fag fagmamatanganun, kata at Rirukan te,
“Dius ban gyukfu at mamatanganan fag ngay taw gina gfandaya.”#3:19 Ub 5:13.
20Katanya yangay,
“Tam Fun saful te, we tungkul at mamatanganan fag ngay taw at amatanganan.”#3:20 Alubad 94:11.
21Nu katanya, lag am kamatungudun sas nusnga sinu fag taw at nafakamulun, aroro Dius nafon wan sa ayu nusnga setaw. 22Dewa au, ay Apulus ay Pedru ay fagayu tagste swa daga, anggan leleg ay fakabulun ay dewa katsi fia ay takadasug ban. Am wan tagagbilug kanya fagayu. 23Tam Fun Isus tagagbilug ayu, ay Dius tagagbilug tam Fun Isus.
Chwazi Kounye ya:
1 Kurintu 3: OCCT
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Copyright © 2021 by OMF International, Philippines