Kur 27
27
1Okore eitambiro omu musisa erya mikono etaano oburaingwa na mikono etaano obukiika. Eryo itambiro ringane embaju zoona, kandi obwemi bwaryo bube mikono eshatu. 2Oriteho amahembe aha nshonda zaaryo ina agabaijerainwe naryo, kandi orihumbikye omuringa. 3Orikorere eby'okuyooreramu eiju n'ebitiiho n'ebeeseni n'empana n'eby'okuguhisa omuriro. Ebyo by'okukoresa byaryo byona obiheeshe omu muringa. 4Orikorere ebyoma by'okuhemberaho amakara ebirabainemu nk'akatimba, ebiheesirwe omu muringa; kandi ahari ako katimba oteho ebifunga bina by'omuringa aha nshonda zaaryo ina. 5Ekyo kyoma kyemi nk'akatimba okite omunda y'omuguno gw'eitambiro, akatimba kahikye rwagati omunda yaaryo. 6Eryo itambiro orikorere emigamba y'omusisa ogihumbikye omuringa. 7Haza egyo migamba ogishokye omu bifunga, ebone kuba aha mbaju zombi ez'eitambiro baaba nibariheeka. 8Oribaije omu mbaaho, ribe omurangara, rikorwe nk'oku oyorekirwe ahari orwo rushozi.
Orugo rw'Obutaaho
9Oryakora ekibuga ky'Obutaaho. Aha rubaju rw'obukiizi bwa buryo, kigire emikingo ya kitaani erukirwe enyabubiri, eya mikono igana oburaingwa aha rubaju rumwe. 10Enyomyo zaayo zibe makumi abiri n'ebiina byazo makumi abiri. Bibe eby'omuringa, kwonka ebikwatsi by'aha nyomyo n'obufunga bwazo bibe eby'efeeza. 11Kandi aha rubaju rw'obukiizi-bwa-bumosho, oburaingwa bw'orugo bugire emikingo ya mikono igana oburaingwa; enyomyo z'emikingo zibe makumi abiri, n'ebiina byazo makumi abiri by'emiringa; kwonka ebikwatsi byazo n'obufunga bwazo bibe eby'efeeza. 12Obukiizi bw'ekyo kibuga obw'aha rwa burengyerwa-izooba bugire emikingo ya mikono makumi ataano, n'enyomyo ikumi, n'ebiina ikumi. 13Obukiizi bwakyo ogurikureeba burugwa-izooba, bube obwa mikono ataano. 14Emikingo ey'aha rubaju rumwe orw'aha irembo ebe mikono ikumi n'etaano, eine enyomyo ishatu n'ebiina bishatu. 15N'aha rundi rubaju, egyo mikingo ebe mikono ikumi n'etaano, eine enyomyo ishatu n'ebiina bishatu. 16Aha irembo ry'ekibuga habeho omukingo gwa mikono makumi abiri oburaingwa, gw'emyenda ya bururu n'eya bujwa n'eya karari, kandi n'ogwa kitaani enungi, erukirwe enyabubiri ogutariizwemu ebicwererane. Omukingo ogwo gugire enyomyo ina n'ebiina byazo bina. 17Enyomyo zoona ezeehinguririize ekibuga ziteebweho ebifunga by'ezaabu kandi ebikwatsi byazo bibe eby'efeeza, n'ebiina byazo bibe eby'omuringa. 18Oburaingwa bw'ekyo kibuga bube mikono igana, obukiika makumi ataano, n'obwemi mikono etaano, biriho emikingo ya kitaani enungi erukirwe enyabubiri, n'ebiina by'emiringa. 19Byona ebirikukoresibwa omu Butaaho aha murimo gwona, n'enkondo zaabwo zoona, kandi n'enkondo zoona ez'ekibuga bibe eby'omuringa.
20Haza oragiire Abaisiraeli bakureetere amajuta empuuhe ag'emioliva eshekwirwe g'okuhemba, etaara ebone kuteebwaho kuguma neeyaka. 21Reero omuri eryo ihema ry'okubugabuganiramu na Ruhanga, aheeru y'omukingo gw'omu maisho g'eby'obuhamya, Arooni n'abatabani nibo baraagume nibareeberera etabaaza, okwiha omu mwabazyo okuhitsya omu kasheeshe, ekaguma neeyakira omu maisho ga Nyakubaho. Ekyo kibe ekitairweho ebiro byona, kuguma nikikuratirwa Abaisiraeli omu busingye bwabo bwona.
Ebijwaro by'abahongyerezi
Chwazi Kounye ya:
Kur 27: RKK2008
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The Bible with Apocrypha in Runyankore-Rukiga, new revised joint translation © The Bible Society of Uganda, 2008.