Kur 26
26
1Oryakora obutaaho bw'emikingo ikumi ya kitaani enungi erukirwe enyabubiri, ey'omwenda gwa bururu n'ogwa bujwa n'ogwa karari. Haza egyo myenda ogitemu ebishushani bya baakerubi ebitariizwe abanyamyoga. 2Buri mukingo gugire oburaingwa bwa mikono makumi abiri na munaana n'obukiika bwa mikono ena buri gumwe; kandi emikingo yoona ebe ey'orugyero rumwe. 3Emikingo etaano eteeranwe hamwe, n'endiijo etaano eteeranwe okwayo. 4Aha mukugiro gw'omukingo ogurikubandizibwaho aheeru omu mikingo etaano erikubanza, oteho empuruuturizo za bururu; kandi obe nikwo waata empuruuturizo aha mukugiro gw'omukingo ogurikubandizibwaho aheeru, omu mikingo endiijo eya kabiri. 5Ote empuruuturizo makumi ataano aha mukingo gw'okubanza ogw'omuri erikubandizibwaho; n'ezindi makumi ataano aha mukugiro gw'omukingo ogw'emikingo etaano eya kabiri. Haza ezo mpuruuturizo zishungane. 6Okore ebikwatsi makumi ataano by'ezaabu, obikwatanisise egyo mikingo na migyenzi yaayo, obutaaho bubone kuba bumwe.
7Kandi oije okore emikingo omu byoya by'embuzi, ebe eihema ry'okusangira Obutaaho. Haza egyo mikingo ei oraakore, ebe ikumi na gumwe. 8Oburaingwa bwa buri mukingo bube mikono makumi ashatu, n'obukiika bwa buri gumwe mikono ena. Kandi egyo mikingo ikumi na gumwe eingane. 9Emikingo etaano ogikwatanise okwayo, n'omukaaga okwayo. Haza ogw'emikingo omukaaga ogukubiranire omu maisho g'eryo ihema. 10Kandi ote empuruuturizo makumi ataano aha mukugiro gw'omukingo ogurikubandizibwaho omu y'okubanza, n'ezindi mpuruuturizo makumi ataano aha mukugiro gw'ogundi mukingo ogurikubandizibwaho omu ya kabiri.
11Reero okore ebikwatsi makumi ataano by'omuringa, obite omu mpuruuturizo, okwatanise eryo ihema ribe rimwe. 12Mbwenu ekicweka ky'emikingo y'eihema ekiraatsigareho, ekicweka kya kabiri ky'omukingo ekiraatsigareho kirengyeerere enyima y'Obutaaho. 13Kandi mukore gumwe ogw'aha rubaju n'ogundi ogw'aha rundi rubaju, eraashaagye aha buraingwa bw'emikingo y'eihema, erengyeerere omu mbaju z'Obutaaho oku n'oku, kubushweka. 14Haza eryo ihema orikorere empu z'empaya z'entaama n'ez'embuzi zirishakaare.
Orukanga rw'Obutaaho
15Oryayemereza orukanga rw'Obutaaho noorukoresa embaaho z'omusisa. 16Embaaho z'okurukora zibe mikono ikumi omu buraingwa, na buri rubaaho rugire obukiika bwa mukono gumwe n'ekicweka. 17Omu buri rubaaho obeijemu endimi ibiri z'okushokanamu, kandi obe nikwo waakora otyo embaaho z'Obutaaho zoona. 18Okore oti embaaho z'Obutaaho: embaaho makumi abiri aha rubaju rw'obukiizi-bwa-buryo. 19Haza okore ebiina by'efeeza makumi ana by'okubyarwamu embaaho makumi abiri: ebiina bibiri bize ahansi y'orubaaho rumwe kushokwamu ezindi ndimi zaarwo ibiri. 20Kandi okore ezindi mbaaho makumi abiri z'orubaju rwa kabiri orw'obwo butaaho ez'okuta aha rubaju rw'obukiizi-bwa-bumosho. 21Hamwe n'ebiina makumi ana by'efeeza: bibiri omunda y'orubaaho rumwe, n'ebindi bibiri omunda y'orundi. 22Reero enyima y'Obutaaho, orubaju orwa burengyerwa-izooba, oteyo embaaho mukaaga. 23Kandi enyima yaabwo oteyo embaaho ibiri z'oburugu. 24Zitaane ahansi, kwonka ziteeranire ahaiguru aha mpeta y'okubanza; haza zombi zibe nikwo zaaba, zibone kurugwamu oburugu bubiri. 25Reero oteho embaaho munaana, eziine ebiina byazo by'efeeza ikumi na mukaaga; bibiri omunda y'orubaaho rumwe, n'ebindi bibiri omunda y'orundi.
26Kandi okore embazi omu muti gw'omusisa: itaano z'okuhamya embaaho z'orubaju rumwe orw'Obutaaho, 27ezindi mbazi itaano ahabw'embaaho z'orundi rubaju rwabwo, n'ezindi itaano zibe ez'embaaho z'orubaju rw'Obutaaho orw'enyima orurikuhera burengyerwa-izooba. 28Orubazi orw'ahagati orurikugarukira gati y'ezo mbaaho rwogyemu ruhikye aha miheru yombi. 29Haza ezo mbaaho ozihumbikye ezaabu, oziheeshere empeta z'ezaabu z'okukwata embazi, kandi ezo mbazi ozihumbikye ezaabu. 30Mpaho oyemereze Obutaaho, bushushane n'eky'okureeberaho eki oyorekirwe ahari orwo rushozi.
Omukingo
31Reero noija kukora omukingo gw'emyenda ya bururu n'eya bujwa n'eya karari kandi n'eya kitaani enungi erukirwe enyabubiri. Haza ogitemu ebishushani bya baakerubi ebitariizwe abanyamyoga. 32Ogwo mukingo oguhanikye aha nyomyo ina z'omusisa ezihumbikirwe ezaabu, eziriho ebikwatsi bya zaabu, zihamiire omu biina bina eby'ezaabu. 33Reero omukingo oguhanikye nigwiha aha bikwatsi. Mpaho omuri ogwo mukingo obe nimwo waata eshanduukye y'eby'Obuhamya, gubone kutaanisa omwanya ogurikwera n'ogurikwerera kimwe. 34Kandi ote ekitebe ky'okusaasira aha shanduukye y'eby'obuhamya omu mwanya ogurikwerera kimwe. 35Aheeru y'omukingo oteho emeeza, kandi ekikondo ky'etabaaza okite aha rubaju rw'obukiizi-bwa-buryo obw'Obutaaho nikishungana n'emeeza; obwo emeeza ogitaire aha rubaju rw'obukiizi-bwa-bumosho.
36Kandi okore omukingo gw'okuta aha muryango gw'Eihema, ogw'emyenda ya bururu n'eya bujwa n'eya karari na kitaani enungi erukirwe enyabubiri etariizwe abanyamyoga. 37Haza ogwo mukingo ogukorere enyomyo itaano z'omusisa, ozihumbikye ezaabu. Ebikwatsi byayo bibe eby'ezaabu, kandi oziheeshere ebiina bitaano by'omuringa.
Eitambiro ry'eby'okucwetsya
Chwazi Kounye ya:
Kur 26: RKK2008
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The Bible with Apocrypha in Runyankore-Rukiga, new revised joint translation © The Bible Society of Uganda, 2008.