Kur 28
28
1Ebyo ku biraahwe, oyehitsye haihi Arooni mukuru waawe, hamwe n'abatabani noobaiha omu Baisiraeli, kumpeereza bari abahongyerezi. Nibo Arooni na batabani be: Nadabu na Abiihu na Eleazaari na Itamaari. 2Arooni mukuru waawe omukorere ebijwaro ebirikwera, bimuhaise ekitiinwa n'okwizihirwa. 3Kandi ogambire abanyamyoga abaine oburyo burikukiraho, abu naahaire obwengye, babaziirire Arooni ebijwaro by'okumushoroora akaba omuhongyerezi wangye. 4Ebi nibyo bijwaro bi baraakore: eky'aha kifuba n'ekitaahiro,#28:4 Ekitaahiro: Ki baabaire bajwarira aha kifuba nibakyeeta Efodi. bushuuti n'ekanzu y'ebicwererane, ekikwemba ky'omu mutwe n'eky'okwezirikisa. Ebijwaro ebirikwera babikorere mukuru waawe Arooni n'abatabani, kubijwara nibampeereza bari abahongyerezi bangye.
5Abo banyamyoga baheebwe ezaabu n'emyenda ya bururu n'eya bujwa n'eya karari na kitaani enungi erukirwe enyabubiri.
Efodi
6Haza bakore ekitaahiro omu zaabu n'omu myenda ya bururu n'eya bujwa n'eya karari n'omuri kitaani enungi erukirwe enyabubiri, bakikozire omu buringaringo. 7Ekyo kitaahiro kigire aha mabega ebiremu bibiri ebibaziriirwe aha mikugiro yaakyo yombi, kibone kuteeranwa. 8Kandi ekikwemba, eki bakibaziriireho omu buringaringo kukyezirikisa, kibe kikozirwe nkakyo omu bintu bimwe nk'ebyakyo: eby'ezaabu n'emyenda ya bururu na bujwa na karari na kitaani enungi erukirwe enyabubiri. 9Reero ogire amabaare g'erangi zitarikushushana, ogasharureho amaziina ga batabani ba Isiraeli. 10Amaziina mukaaga aha ibaare rimwe, n'agandi mukaaga aha rindi nk'oku baakurataine omu kuzaarwa. 11Nk'oku omunyamyoga w'amabaare g'obuguzi bwingi agasharuraho obumanyiso, naiwe obe nikwo waasharura amaziina ga batabani ba Isiraeli ahari ago mabaare gombi; kandi ogahamise ezaabu ekwegire. 12Mpaho ote ago mabaare gombi aha bikwemba by'aha mabega g'ekyo kitaahiro, gabe ag'okwijukiraho batabani ba Isiraeli, Arooni agume ajware aha mabega ge gombi amaziina gaabo, omu maisho ga Nyakubaho kuba eky'okubaijukiraho. 13Haza okore omu zaabu ekwegire eby'okuhamya ago mabaare. 14Kandi okore emikuufu ebiri y'ezaabu empuuhe ehotoire nk'emigoye, reero egyo mikuufu ehotoire ogikomere aha by'okuhamya.
Eky'aha kifuba eky'okwehanuuzaho
15Kandi okore eky'aha kifuba eky'okwehanuuzaho; okikore omu buringaringo nk'oku ekitaahiro kikozirwe: omu zaabu n'omu myenda ya bururu na bujwa na karari na kitaani enungi erukirwe enyabubiri. 16Kibe nikingana embaju zoona ina kandi kikubiraine, kiri ekita kimwe omu buraingwa, n'ekita kimwe omu bukiika. 17Haza okiteho embu ina z'amabaare: orw'okubanza rube orw'aga sarudio, topazi na karibunkule; 18orwa kabiri, eruuru, safiro na arimaasi; 19orwa kashatu yakinto, agate na ametisiti. 20Reero orwa kana rube orwa berilo, onikisi na yasipi. Goona gahamibwe omu zaabu ekwegire. 21Gabe gari amabaare ikumi n'abiri agariho amaziina ga batabani ba Isiraeli; kandi gasharurwe nk'oku basharura obumanyiso, buri rimwe risharirweho eiziina rya rumwe aha nganda ikumi na ibiri. 22Ekyo kintu ky'aha kifuba okikorere emikuufu ehotoire nk'emigoye ey'ezaabu empuuhe. 23Kandi okiteho empeta ibiri z'ezaabu. Haza ezo mpeta zombi ozite aha mikugiro yaakyo yombi. 24Reero emigoye y'ezaabu yombi ogirabye omu mpeta zombi ez'aha mikugiro y'eky'aha kifuba.
25Emiheru y'emigoye yombi ogihamize aha by'okuhamya byombi eby'ezaabu ekwegire. Haza obihamize omu maisho g'ebiremu by'aha mabega g'ekitaahiro. 26Kandi okore empeta ibiri z'ezaabu ozite aha miheru yombi ey'eky'aha kifuba, aha mukugiro gwakyo ogw'omunda ahahereire ekitaahiro. 27Kandi okore empeta ibiri z'ezaabu, ozihamize omu maisho g'ekicweka ekirikuhera ahansi y'ebiremu by'aha mabega byombi eby'ekitaahiro, ahi birikuteeranira, eruguru y'ekikwemba ekirukirwe omu buringaringo eky'okwezirikisa ekitaahiro. 28Ekyo ky'aha kifuba, empeta zaakyo zikomeranwe n'ez'ekitaahiro akenda ka bururu, kibone kuhamira aha kikwemba ekirukirwe omu buringaringo, eky'ekyo kitaahiro eky'aha kifuba kirekye kuyuga kikataana n'ekitaahiro. 29Arooni atyo ajwarire amaziina ga batabani ba Isiraeli aha ky'aha kifuba eky'okwehanuuzaho, kiri aha kaina k'omutima gwe, yaaba naaza omu mwanya ogurikwera, kuguma naabaijukira omu maisho ga Nyakubaho. 30Kandi omuri ekyo ky'aha kifuba eky'okwehanuuzaho, otemu Urimu na Tumimu, bize aha kaina k'omutima gwa Arooni, yaaba naataahamu kuza omu maisho ga Nyakubaho. Nikwo Arooni ariguma naajwara aha kifuba eky'okwehanuuzaho kumuha oburyo bw'okucwera Abaisiraeli emanja omu maisho ga Nyakubaho.
Eby'ekanzu
31Reero ekanzu y'ekijwaro ky'aha kifuba ekirikwetwa efodi ogikore eri eya bururu. 32Egire amaraka g'okurabyamu omutwe, eine omukugiro gutariize okwehinguririza amaraka, nk'oku ekijwaro kyona kigunwa omu maraka ngu kitakaataaguka. 33Aha kicweka kyayo ekyaifo obaziirireho ebirikushusha amakoma mahanga omu mwenda gwa bururu, na bujwa na karari, okwehinguririza ekicweka kyayo ekya ifo. Kandi ahagati y'amakoma-mahanga ogyende nootaho amajugo g'ezaabu. 34Buri ijugo ry'ezaabu rikuratwe eikoma-mahanga, eijugo ry'ezaabu eikoma-mahanga, okwehinguririza ekicweka kyaifo kyona eky'egyo kanzu. 35Mpaho Arooni agume agijware naaza kuheereza, haza okurangira kw'ago majugo kugume nikuhurirwa yaaba naaza omu mwanya ogurikwera omu maisho ga Nyakubaho nari naagurugamu. Obwo nibwo araakire okufa.
Eihunde ry'aha kikwemba ky'omu mutwe
36Kandi oryakora ekishate kiheesirwe omu zaabu, okisharureho ebigambo ebi: Orikwera wa Mukama, nk'oku basharura akamanyiso. 37Reero okikomere aha kikwemba ky'omu mutwe n'akenda ka bururu, kibe omu maisho g'ekikwemba; 38kize aha buso bwa Arooni, na Arooni ayemere ebicumuro ebi Abaisiraeli barikora bareetsire emitoijo yaabo erikwera. Ekyo kishate kigume obutoosha aha buso bwe, emitoijo ebone kwikirizibwa omu maisho ga Nyakubaho. 39Reero ekooti ogirukye omuri bafuta enungi etariize, kandi okore ekikwemba ky'omu mutwe ekya kitaani enungi, okore n'eky'okwezirikisa ekitariizemu ebicwererane.
Ebijwaro by'abahongyerezi
40Kandi batabani ba Arooni obakorere ekooti n'eby'okwezirikisa n'enkofiira. Ebyo obibakorere kubahaisa ekitiinwa n'okubareebekyesa gye. 41Reero obijwekye Arooni mukuru waawe, n'abatabani abari hamwe nawe, obasiigye amajuta obashoroore obeeze babone kumpeereza bari abahongyerezi. 42Kandi obakorere empare za kitaani, bazijware, barekye kujwara busha. Ezo mpare ziihe omu bwezirikiro zihikye aha maju. 43Arooni n'abatabani bagume bazijware nibaza omu ihema ry'okubugabuganiramu na Ruhanga; nari baaba baizire haihi n'eitambiro kuheereza omu Mwanya Ogurikwera, batakaayereetaho orubanja bakafa. Ekyo kigume kiri ekiragiro ekiteereirweho Arooni n'abaijukuru abarimukurata.
Eby'okushoroora Arooni n'abatabani
Chwazi Kounye ya:
Kur 28: RKK2008
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The Bible with Apocrypha in Runyankore-Rukiga, new revised joint translation © The Bible Society of Uganda, 2008.