Máà 16
16
Jízɛ̀ɛ̀ gĩɔ-wóɖó-wóɖó
(Máfíò 28:1-8; Ɖúù 24:1-12; Jɔ̃́ɔ́ 20:1-10)
1Ti ɓɛ́ Gèɖèpɔ́ɔ̀ fɔ̀-wèɔ̀ ɖǎ ma dyi ziɛɛ, Meɖé sɔ̀à ɖé Máɖèɖà-hwɔ̀ɖɔ̀ɔ̀ múɛ kè Meɖé mɔ̀à Jĩ́ìn ɖeɛ ɔ kè Sɛ̀ɖómì dɔ̃ ma cáná nɔ̀mɔ̀ nyɔ́ún ɓě, ɓɛ́ wa ké mu, ɓɛ́ wa kéɛ Jízɛ̀ɛ̀ xwɛ́ɔ̀ bũ̌in fiè. 2Wíkìɔ̀ wé kĩ́ín-kĩ́ínɔ̀ gànà-kṹún, ti ɓɛ́ dyóɖóɔ̀ ɖǎ ma xwáɖáún wóɖó kɛɛ, wa mu ma ɖé xwɛ́-gmààɔ̀ wĩín. 3Wa nìɛ̀ ma gbo cɛ̃ìn cɛ̃̀ǐn, ké wa ɖá, “Nyɛ́ mu sɔ́ɔ́-kpòɔ̀ xwɛ́-gmààɔ̀ wĩín zàùn ɓó à bììɛ́?” Wa cɛ̃ɛ ma náa, sepóɛɖé sɔ́ɔ́-kpòɔ̀ ɓúá ma kpéín mìɔ. 4Kɛɛ ti ɓɛ́ wa nyini ma ɓó kɛɛ, wa dyéɛ ma kà ɓɛ́ sɔ́ɔ́-kpò vɛ̀nɛ̀ɔ̀ ɖǎ ma ɓó sɔ̀ kɛ. 5Ké wa wáɖáìn ma ɖé xwɛ́-ɓìɔ̀ mú, ké wa dyé ma gàa-dyù gmɔ̀ ɖò, ké ɔ kò ma hwɔ ɖé ɖiaún dyí. Ɔ po ma gã́ùn púú ɖò mú. Ké fã̀à nyu ma wa.
6Ké gàa-dyù gmɔ̀ɔ̀ cɛ̃ɛ ma wa gbo, ké ɔ ɖá, “Ɓě ɓɔ́ fɛ̃̀ìn. Ɓě nì Jízɛ̀ sɔ̀ Názɛ̀ɖɛ̀, ɓɛ́ wa kɔ̀ìn ma kà kɔ́ɖɔ́sìɔ̀ kɔ̃in nyɛɛ dyi mɔ́uń. Ɔ ɖǎ gĩɔ wóɖó. Ɔ se nɔ̄ nì ɖe. Ɓě gmɔ̀ nɔ̄, dà ɓó wa pɛ̃́ìn ma kà ɔ dyiɛ̀. 7Ɓě mu, ɓɛ́ ɓě kéɛ Píɖɛ̀ kè ɖeín-nà-nyɔ̀ tɔ̀ɔ̀ ɓěɔ̀ gbo cɛ̃ kà ɓɛ́ ɔ nì ɖé wa dyúa muɛń ɖé Gáɖàɖíì-ɓòɖòɔ̀ kɔ̃ɛ. Ɖéɛ̀ wa mu ɔ dyéìn kà ɔ nyuɛ ma kà wa gbo cɛ̃ɛ kɛ.”
8Ké màa ɓěɔ̀ sɔ̀ ma ɖé ɓíɔ̀ wĩín, ké wa gbǔ. Fã̀à nyu ma wa, ké wa tɛɖɛ. Wa se ma ɖɛ ɖò nyɔ ɖò gbo cɛ̃, sepóɛɖé wa fɛ̃̀ìn ma ní.
Jízɛ̀ wóɖóìn Meɖé sɔ̀à ɖé Máɖèɖà-hwɔ̀ɖɔ̀ɔ̀ múɛɛ dyí
(Máfíò 28:9-10; Jɔ̃́ɔ́ 20:11-18)
[ 9Zɔ̃-tìě kpɔ̃ ma dyi ke, ké Jízɛ̀ wóɖó ma gĩɔ. Ɔ mɔ̀ ma wíkìɔ̀ wé kĩ́ín-kĩ́ínɔ̀. Ké ɔ wóɖóìn ma Meɖé sɔ̀à ɖé Máɖèɖà-hwɔ̀ɖɔ̀ɔ̀ múɛɛ dyí kĩ́ín. Ɔ mɔ̀ nyɔ ɓɛ́ Jízɛ̀ zà ma kà zùù gbà mɛ̀nɛ̌ìn-sɔ̃́ɔ̀ mú kɛ̀. 10Ké Meɖé mu, ké ɔ cɛ̃ɛ ma nyɔ ɓě nì ma ɓó Jízɛ̀ gbo kĩ́ín nyɛɛ gbo. Wìì nì ma wa mú, ké wa nì ma kpé poɛń. 11Ti ɓɛ́ wa wɔ̃́ɔ ma kà ɓɛ́ ɔ nì ma cĩ́ɛń ɖe, ké Meɖé ɖǎ ma ɔ dyéɛɛ, wa seɛ ma jǎà po.
Jízɛ̀ wóɖóìn ɔ ɖeín-nà-nyɔ̀ ɓěɔ̀ sɔ̃́ dyi
(Ɖúù 24:13-35)
12Púɛɛ, Jízɛ̀ zàìn ma dyí, ké ɔ wóɖóìn ma ɔ ɖeín-nà-nyɔ̀ ɓěɔ̀ sɔ̃́ dyí, ti ɓɛ́ wa nì ma hwìè kɔ̃, ké wa nì ma dà ɖò muɛń nyɛ. 13Ké wa kɔ́ìn ma ɖe, ké wa cɛ̃ɛ ma ɖeín-nà-nyɔ̀ tɔ̀ɔ̀ ɓěɔ̀ gbo, kɛɛ wa se wa mɔ̀ùn jǎà po.
Jízɛ̀ wóɖóìn ɔ ɖeín-nà-nyɔ̀ ɓaɖa-bùè sè dyúáɖò ɓěɔ̀ dyí
(Máfíò 28:16-20; Ɖúù 24:36-49; Jɔ̃́ɔ́ 20:19-23; Àpɔ́sò 1:6-8)
14Ɔ ɖǎ ma ná nìɛɛ, Jízɛ̀ wóɖóìn ma ɖeín-nà-nyɔ̀ ɓaɖa-bùè sè dyúáɖò ɓěɔ̀ mɔ̀ùn dyí, ti wa nì ma ɖɛ ɖiɛń nyɛ. Ké ɔ wùɖù ma wa gbo gana-kà, sepóɛɖé wa se ma ɔ hwìɖǐǐ taɓa, ké wa kàmà ɖɛín dyi wɔ̃́uń jè. Ɔ wùɖù ma wa gbo, sepóɛɖé nyɔ ɓě ɓɛ́ wa dyé ma ɔ ti ɔ ɖǎ ma gĩɔ wóɖóɛɛ, wa se ma nyɔ ɓěɔ̀ wuɖuɔ̀ jǎà po jè. 15Ké ɔ cɛ̃ɛ ma wa gbo, ké ɔ ɖá, “Ɓě mu ɓóɖó-kpàà dà séín, ɓɛ́ ɓě ké bɔ̃̌ nɔ̀mɔ̀ dyíinɔ̀ jè zio po ɖé nyɔǔn séín gbo. 16Nyɔ mɔ̀ nyɔ ɓɛ́ ɔ taɓa bɔ̃̌ nɔ̀mɔ̀ dyíinɔ̀ hwìɖǐǐ, ké ɔ kpá níɔ kɛɛ, ɔ mu póùn. Kɛɛ nyɔ mɔ̀ nyɔ ɓɛ́ ɔ seɛ hwìɖǐǐ taɓa kɛɛ, zaa mu ɔ kpɔ̃ùn ɓó ɔ nàmàǔn jè. 17Nyɔ ɓě mɔ̀ nyɔ taɓa bɔ̃̌ nɔ̀mɔ̀ dyíinɔ̀ hwìɖǐǐɛɛ, wa mu ɖàɓàìn-ɖɛ̀ ɓě nìà kɛ nyuùn. Wa mu zùù gbà nyɔǔn mú zàùn ɖé ní nyɛ́nɛ́ mú, ké wa mu wuɖu kà kò ɖò ɓě poùn. 18Ɔ jǔ ké wa dyi sɛ ɓě dyí ɖú, ké wa dyi ɖɛ ɓě mɔ̀ nyɔ-ɖáɓá-ɖɛ̀ kɛɛ ná ní, nìí, ɔ se wa ɖɛ ɖò bũ̌ nyuɛ́ mu fɔɔ. Wa mu waà sɔ̃ ɓěɔ̀ wɛ́-nyɔ̀ ɓě kɔ̃ pɛ̃́ìn, ké wa mu dyi kánáùn.”
Jízɛ̀ɛ̀ dyɔún-mu-mu
(Ɖúù 24:50-53; Àpɔ́sò 1:9-11)
19Ti ɓɛ́ Bounɓo Jízɛ̀ ɖǎ ma ɖeín-nà-nyɔ̀ ɓěɔ̀ gbo wùɖùɛ̀ hwɔɛɛ, Gèɖèpɔ́ɔ̀ kpa ma ɔ dyɔún, ké Jízɛ̀ dèɖě dya ɖé Gèɖèpɔ́ɔ̀ ɖiaún. 20Ké ɖeín-nà-nyɔ̀ ɓěɔ̀ sɔ̀ dyí, ké wa mu ma dà séín, ké wa po ma zio. Bounɓoɔ̀ kpá ma wa gbo, ké ɔ kùìn ma bɔ̃̌ɔ̀ dúi dyììn ɖé ɖàɓàìn-ɖɛ̀ ɓě ɓɛ́ wa nyu ma kɛɛ mú.]
Chwazi Kounye ya:
Máà 16: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.