Máà 15
15
Wa kpa Jízɛ̀ Páɖè dyúa
(Máfíò 27:1-2, 11-14; Ɖúù 23:1-5; Jɔ̃́ɔ́ 18:28-38)
1Ti ɓɛ́ zɔ̃ ɖǎ ma zɔ̃ɛɛ, sáa-zà-nyɔ̀ kpa ɖɛ ɓěɔ̀ kè Júù-nyɔ̀ vɛ̀nɛ̀ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ ɔ kè tɔ̀ɔ̀-ɓìɔ̀ séín ɓěɔ̀ poìn ma dyí, ké wa poìn zaaɔ̀ jè hwìɖǐi. Ké wa sã ma Jízɛ̀, ké wa kpa ma ɔ, ké wa zàìn ma ɔ Páɖè xwáɖáún. 2Ké Páɖè diè ma ɔ dyi, ké ɔ ɖá, “Mɔ̀ mɔ̀à Júù-nyɔ̀ ɓěɔ̀ kã́áɔ̀ kɛɛ̀?”
Ké Jízɛ̀ zà ma ɖé wuɖu, ké ɔ ɖá, “Mɔ̀ mɔ̀ nyɔ cɛ̃ɛ.”
3Ɓó tia ɓaɖaa, sáa-zà-nyɔ̀ kpa ɖɛ ɓěɔ̀ cɛ̃ɛ kà ɓɛ́ ɔ ɖǎ ma ɖɛ gbà kúɖúú nyuɛ. 4Ké Páɖè diè ma ɔ dyi ɖe, ké ɔ ɖá, “M̀ se ɖɛ ɖò ɓéɖé ɓɛ́ m̀ kéɛ cɛ̃ɛ̀? Gmɔ̀ ɖɛ kúɖúú ɓě ɓɛ́ wa nìà m̀ kɔ̃ún cɛ̃iń nyɛ.”
5Kɛɛ Jízɛ̀ se ma ɖɛ ɖò cɛ̃ fɔɔ. Ɖɛ nìà kɛ fɔ̀nɔ̀ìn ma Páɖè wɔ̃.
Wa ɖá Jízɛ̀ ɓéɖé ɓɛ́ ɔ ké mɛ́
(Máfíò 27:15-26; Ɖúù 23:13-25; Jɔ̃́ɔ́ 18:39–19:16)
6Zĩ̀ìn-Kɔ̃in-hwɔ̀ɔ̀ ti séín ní, Páɖè buɛ̀ ma kpɔɖɔ-ɖeín-nì-nyɔ̀ ɓɛ́ nyɔ ɓěɔ̀ mɔ́ ɓɛ́ ɔ ké ma buɛ̀ kɛɛ ní. 7Ɔ nì ná kɛɛ, gàa ɖò ɓɛ́ wa ɖáìn Bàwáɖáɓà kɛ kè nyɔ ɓě ɓɛ́ wa vɔ̃ ma gɔ̌mànàɔ̀ gbo kɛɛ nì ma kpɔɖɔ ɖeín. Wa ɖáɓá ma kú ti ɓɛ́ wa nì ma gɔ̌mànàɔ̀ gbo vɔ̃uń wɛ̃. 8Ké nyɔ kúɖúú ɓěɔ̀ dyi ma Páɖè gbo, ké wa cɛ̃ɛ ma ɔ gbo, ɓɛ́ ɔ kéɛ nyu kà ɔ ní ɓɔ́à nyuɛ kɛ. 9Ɔ jèɛɛ, ɔ diè wa mɔ̀ùn dyi, ké ɔ ɖá, “Ɓě mɔ́ ɓɛ́ ḿ ké ɓě bìì Júù-nyɔ̀ ɓěɔ̀ kã́áɔ̀ dyi táà?” 10Páɖè dyuòɛ̀ ma dyí jɛ́ɛ́ kà ɓɛ́ sáa-zà-nyɔ̀ kpa ɖɛ ɓěɔ̀ po ma Jízɛ̀ ɔ xwaún, sepóɛɖé wa dyéìn ma ɔ hwɛ̀nɛ̌ jèɛ.
11Kɛɛ sáa-zà-nyɔ̀ kpa ɖɛ ɓěɔ̀ po ma nyɔ kúɖúú ɓěɔ̀ pɛ́í, ɓɛ́ wa kéɛ Páɖè gbo cɛ̃, ɓɛ́ ɔ ké ma Bàwáɖáɓà buɛ̀, ɓɛ́ Jízɛ̀ ké ɖé sè. 12Ké Páɖè diè ma wa dyi ɖe, ké ɔ ɖá, “Nìí, ɖɛ́ ḿ mɛ nyùìn nyɔ ɓɛ́ ɓě ɖáìn Júù-nyɔ̀ ɓěɔ̀ kã́áɔ̀ kɛɛ múɛ́?”
13Ké wa páná ma mú, ké wa ɖá, “Kɔ̀ìn ɔ kɔ́ɖɔ́sì kɔ̃in.”
14Ké Páɖè diè ma wa dyi ɖe, ké ɔ ɖá, “Ɖɛ́ mɔ̀ ɖɛ gbà ɓɛ́ ɔ ɖǎ nyuɛ́?”
Kɛɛ wa páná ma mú ɖe mìɔ, ké wa ɖá, “Kɔ̀ìn ɔ kɔ́ɖɔ́sì kɔ̃in.”
15Ké Páɖè buɛ̀ ma wa bìì Bàwáɖáɓà, sepóɛɖé ɔ mɔ́ ɓɛ́ ɔ ké ma nyɔ kúɖúú ɓěɔ̀ hwòɖǒ dyi dè. Ké ɔ nyuɛ ké ɔ sójà ɓěɔ̀ ɓàɖàìn ma Jízɛ̀ gbàtò, ké ɔ zàìn ma ɔ wa xwáɖáún, ɓɛ́ wa ké ma ɔ kɔ́ɖɔ́sìɔ̀ kɔ̃in kɔ̀ìn.
Sójà ɓěɔ̀ ɓaɖa Jízɛ̀ dyɔ́
(Máfíò 27:27-31; Jɔ̃́ɔ́ 19:2-3)
16Ké sójà ɓěɔ̀ kpa ma Jízɛ̀ ɖé gɔ̌mànà-gbòɔ̀ mú. Ɔ mɔ̀ dɛ̀ ɓɛ́ wa ɖáìn pìɖìtɔ́ɖìà kɛ. Ké sójà ɓěɔ̀ ɖá ma wa mǔè ɓěɔ̀, ɓɛ́ wa ké dyí poìn. 17Ké wa gba ma Jízɛ̀ ɖɔ dyéɖé ɖàɓàìn kpèɛ̀ ɖò kɔ̃in, ké wa fíá ma wí-gbɛ̌ɛ̀ ɖò, ké wa dèɛ̀n ma ɔ dú. 18Ké wa nì ma ɔ dyɔ́ ɓaɖauń, ké wa ɖá, “Júù-nyɔ̀ ɓěɔ̀ kã́á, m̀ mɛ kɔ̃̀ à wuɖuí kánáá pū.” 19Ké wa nì ma ɔ gɛ̃̀ǐn-pìǒ dú nàmàǐn, ké wa nì ma ɔ tɔ̃ɔ dya poɛń. Ké wa nì ma ɔ dyúa kɔ́-dù hwuɖu taɓauń kà nyɔ nìɔ̌ kà nyɔ kpéín dyéɛń nyɛ. 20Ti ɓɛ́ wa ɖǎ ma ɔ dyɔ́ ɓaɖaa hwɔɛɛ, wa zà ma ɔ ɖɔ dyéɖé ɖàɓàìn kpèɛ̀ɔ̀ mú, ké wa po ma ɔ mìɔùn nììn ɖɔɔ̀ ɔ mú ɖe. Ké wa kpa ma ɔ, ɓɛ́ wa ké ma ɔ kɔ́ɖɔ́sìɔ̀ kɔ̃in kɔ̀ìn.
Wa kɔ̀ìn Jízɛ̀ kɔ́ɖɔ́sìɔ̀ kɔ̃in
(Máfíò 27:32-44; Ɖúù 23:26-43; Jɔ̃́ɔ́ 19:17-27)
21Ti ɓɛ́ wa nì ma muɛń nyɛɛ, wa dyé ma gàa ɖò mɔ̀ Sã́ɓò ɓɛ́ ɔ sɔ̀ìn ma ɖé Sàwíɖíìn-hwɔ̀ɖɔ̀ɔ̀ múɛ. Ɔ mɔ̀ ma Ɛ̀ɖìzánà kè Wúɖúfàà ɓǎ. Ɔ nì ma pá ɓě nì ma Jùɖúsɛ̀ɖɛ̀ìn-hwɔ̀ɖɔ̀ɔ̀ ɖeiɛɛ ɖò mú sɔ̀ǔn, ké ɔ nì ma hwɔɖɔɔ̀ mú muɛń. Ké sójà ɓěɔ̀ kpɔ̃ ma ɔ, ɓɛ́ ɔ ké ma Jízɛ̀ɛ̀ kɔ́ɖɔ́sìɔ̀ ɓéɖé. 22Ké wa dyà ma Jízɛ̀ pá ɓɛ́ wa ɖáìn Gɔ̀gɔ́tà kɛɛ mú. Gɔ̀gɔ́tà-nyɛ̀nɛ̀ɔ̀ xwíníín mɔ̀ nyɔǔn-dù-kpà. 23Wa nyí ma Jízɛ̀ wã́ìn caìn fɔ́-ɖáɓá-kũ̀ùn ɖò, kɛɛ ɔ seɛ ma ná. 24Púɛɛ, wa kɔ̀ìn ma ɔ kɔ́ɖɔ́sìɔ̀ kɔ̃in, ké wa nyu ma gbo-ɖàɓàìn-ɖɛ̀, ɓɛ́ wa ké ma ɔ ɖɔɔ̀ wa mìɔùn múin geìn. Kǎà wa nyu ma ɔ ɖɔɔ̀ geɛ̀n. 25Ti wa kɔ̀ìn ma kà ɔ kɔ́ɖɔ́sìɔ̀ kɔ̃in nyɛɛ mɔ̀ ma jǎ-dyòɖò-pì-ɖé-hwɛ̀-tì. 26Ké wa po ma céè-ɖɛ̀ ɖò ɓá ɖɛ kɔ̃̀ jè wa kpɔ̃ ma kà ɔ kɛɛ jè dyíɛɛ ɓó kɔ́ɖɔ́sìɔ̀ dyéɖéín. Céè-ɖɛ̀ɔ̀ wuɖu ɖá, “Júù-nyɔ̀ ɓěɔ̀ kã́á.” 27Púɛɛ, wa kɔ̀ìn ma dyíɖíí-nyɔ̀ sɔ̃́ kɔ́ɖɔ́sì ɓě kɔ̃in ɖekè. Ɖò nì ma Jízɛ̀ ɖiaún, ké ɖò nì ma ɔ kunuaún. [ 28Ɔ jèɛɛ, ɖɛ Gèɖèpɔ́ɔ̀-cèè-ɖɛ̀ɔ̀ cɛ̃à kɛɛ kpá ma jǎà. Ɔ ɖá, “Wa zɛ̀ɖɛ̀ìn ma ɔ kè gma-ɖuà-nyɔ̀ ɓěɔ̀.”]
29Ké nyɔ ɓě ɓɛ́ wa nì ma ziɛń nyɛɛ po ma ɔ wuɖu dyíin, ké wa ɓàɖàìn ma ɔ dúi, ké wa ɖá, “Ɛ̃̀hɛ̃́ɛ̀, mɔ̀ mɔ̀ nyɔ ké ma kà Gèɖèpɔ́ɔ̀ gbǒɔ̀ wáɖá, ɓɛ́ m̀ kéɛ ma kà po ɓó wé tã múɛɛ, 30póàǐn m̀ mìɔùn, ɓɛ́ m̀ ké kɔ́ɖɔ́sìɔ̀ kɔ̃ sɔ̀.”
31Kà dyúáɖòɔ̀ kǎà sáa-zà-nyɔ̀ kpa ɖɛ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ ɓaɖa ma ɔ dyɔ́ ɖé wa mìɔùn hwìɛ̀, ké wa ɖá, “Ɔ póìn nyɔ kà kò ɖò ɓě, kɛɛ ɔ se ɔ mìɔùn póɛ̀n ɓɛ́ìn. 32Kà ɓɛ́ Kɛ́ɖɛ́ìɔ̀ mɔ̀à Éézùɖùɛ̀-nyɔ̀ ɓěɔ̀ kã́á kɛɛ, ɔ mɛ sɔ̀ kɔ́ɖɔ́sìɔ̀ kɔ̃ ɓó kàǔn, ɓɛ́ à kéɛ dyé, ɓɛ́ à ké ɔ hwìɖǐǐ taɓa.”
Ké nyɔ ɓě ɓɛ́ wa kɔ̀ìn ma kà ɔ kè wa kɔ́ɖɔ́sì ɓěɔ̀ kɔ̃in nyɛɛ po ma ɔ wuɖu dyíin ɖekè.
Jízɛ̀ɛ̀ mɛ́ jè
(Máfíò 27:45-56; Ɖúù 23:44-49; Jɔ̃́ɔ́ 19:28-30)
33Ti ɓɛ́ dyóɖóɔ̀ ɖǎ ma dú-hwìɛ̀ kò kɛɛ, tíe kpɔ̃ ma ɓóɖó-kpàà dà séín tee, ké ɔ dyɛ̀ìn ma zii-dyòɖò-gbo-dyòɖòàǔn. 34Ti ɔ ɖǎ ma zii-dyòɖò-gbo-dyòɖòàǔn jǔɛɛ, Jízɛ̀ páná ma mú zoo, ké ɔ ɖá, “Íɖà, íɖà, ɖámà sàbáɖènì.” Ɔ xwíníín mɔ̀, “Ní Gèɖèpɔ́ɔ̀, ní Gèɖèpɔ́ɔ̀, ɖɛ́ kɔ̃̀ jè m̀ hwɛ̀à ḿ gboɛ́?”
35Ti nyɔ ɓě nyànà ma ɓó dyiɛɛ wɔ̃́ɔ ma kɛɛ, wa ɖíɛ́ ɓě ɖá, “Ɓě tò ɖùǔ, ɔ nì Ìɖáájɔ̀ ɖáuń.” 36Ké nyɔ dyúáɖò kpa ma peɖeɛ wàɖà, ké ɔ ɖú ma ɖɛ fɔ̀ì-fɔ̀ì ɖò dyí, ké ɔ dyíìn ma náá-ɖɛ̀ nya-nya ɖò ɖɛ fɔ̀ì-fɔ̀ìɔ̀ mú. Ké ɔ poɛ ma gɛ̃̀ǐn-pìǒ ɖò mánáín, ké ɔ tòɛ̀ ma Jízɛ̀ wĩín, ɓɛ́ ɔ kéɛ ma mú nyɔ́. Ké nyɔɔ̀ ɖá, “Ɓěà fòìn, ɓɛ́ ɓěà kéɛ dyé, kɛbì Ìɖáájɔ̀ mu dyiìn, ɓɛ́ ɔ ké ɓó ɔ zà ní.” 37Ké Jízɛ̀ páná ma mú zoo ɖe. Púɛɛ, ɔ zà ma hwòɖǒ dya. 38Hwɛ̀ ké faà-ɖɔ̀ ɓɛ́ ɔ ɓá ma ɖé Gèɖèpɔ́ɔ̀ gbǒɔ̀ mú dyiíɛɛ fá ma sɔ̀ìn ɖé dyií, ké ɔ sí ɓíɖíi.
39Ɓó tia ɓaɖaa, gàa ɓɛ́ ɔ kɔ̃̀ sójà hɔ̃dɛ̀ɖɛ̀ ɖò wuɖuíɛɛ nyànà ma ɓó Jízɛ̀ dyúa dyi. Ti ɓɛ́ ɔ dyéɛ ma kà Jízɛ̀ nyu ma hwòɖǒ dya zàà kɛɛ, ɔ ɖá, “Gàa nìà kɛ mɔ̀ Gèɖèpɔ́ɔ̀ Dyú-gààɔ̀ jǎà.”
40Màa ɓě nì ma ɓó. Wa nyànà ma ɖéé ɖé nya dyi, ké wa nì ma ɖé gmɔ̀ǔn. Meɖé ɓɛ́ ɔ sɔ̀ ma ɖé Máɖèɖà-hwɔ̀ɖɔ̀ɔ̀ múɛ kè Meɖé ɓɛ́ ɔ mɔ̀ ma Jĩ́ìn mɔ̀ nyɔ dyùwèɔ̀ kè Jòsé ɖe kɛ ɔ kè Sɛ̀ɖómì nì ma màa ɓěɔ̀ hwìɛ̀. 41Ti ɓɛ́ Jízɛ̀ nì ma ɖé Gáɖàɖíì-ɓòɖòɔ̀ kɔ̃ɛɛ, màa ɓě nìà kɛ kè Jízɛ̀ naìn ma mú, ké wa kpá ma ɔ gbo. Ké màa pàɖǎ ɓě ɓɛ́ wa kè Jízɛ̀ dyi ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ nì ma ɓó ɖekè.
Wa zà Jízɛ̀ dyóɖóún
(Máfíò 27:57-61; Ɖúù 23:50-56; Jɔ̃́ɔ́ 19:38-42)
42-43Ti hwìo ɖǎ ma jǔɛɛ, Jòsé ɓɛ́ ɔ sɔ̀ ma ɖé Áɖémàtíà-hwɔ̀ɖɔ̀ɔ̀ múɛɛ po ma hwòɖǒ ɓo xwíɖíi, ké ɔ mu ma Páɖè gbo, ké ɔ zɔ̀ ma Jízɛ̀ɛ̀ xwɛ́ɔ̀, sepóɛɖé ɔ mɔ̀ ma Gèɖèpɔ́ɔ̀ fɔ̀-wèɔ̀ jè naɓaà-tì. Jòsé mɔ̀ nyɔ wa dyé ma kpéín ɖé tɔ̀ɔ̀-ɓìɔ̀ ɓěɔ̀ hwìɛ̀ kɛ, ké ɔ mìɔùn nì ma Gèɖèpɔ́ɔ̀ kã́á-ɓòɖòɔ̀ jè hwìǐ gmɔ̀ǔn ɖekè. 44Ké Páɖè giniìn ma dyi kà ɓɛ́ Jízɛ̀ ɖǎ ma mɛ́ wàɖà kɛ. Ké ɔ ɖoɓo ma nyɔ ɖé sójà hɔ̃dɛ̀ɖɛ̀ ɖò wuɖuí-kɔ̃̀-nyɔ̀ɔ̀ gbo, ɓɛ́ ɔ ké dyi. Ti ɓɛ́ ɔ dyi ma kɛɛ, Páɖè diè ma ɔ dyi kɛbì Jízɛ̀ ɖǎ ma mɛ́ nɔ̀ɔ̀ ní. 45Ké ti ɔ wɔ̃́ɔ ma gàaɔ̀ wĩín kà ɓɛ́ Jízɛ̀ ɖǎ ma mɛ́ɛ, ɔ tò ma Jízɛ̀ɛ̀ xwɛ́ɔ̀ Jòsé dyí. 46Ké Jòsé dɔ̃ ma ɖénì-ɖɔ̀ ɖò, ké ɔ zà ma xwɛ́ɔ̀ dyií, ké ɔ bĩɛ̀n ma ɖɔɔ̀ dyi. Ké ɔ pɛ̃́ìn ma Jízɛ̀ɛ̀ xwɛ́ɔ̀ ɖé ɓí ɓɛ́ wa ɓúɖú ma ɖé sɔ́ɔ́ ɖò dyéɖéín nyɛɛ múin. Ké ɔ kiɖiò ma sɔ́ɔ́-kpò vɛ̀nɛ̀ ɖò, ké ɔ ɓáìn ma ɓíɔ̀ wĩín. 47Meɖé sɔ̀à ɖé Máɖèɖà-hwɔ̀ɖɔ̀ɔ̀ múɛ kè Meɖé mɔ̀à Jòsé ɖe kɛɛ dyé dɛ̀ ɓɛ́ wa pɛ̃́ìn ma ɔ dyi kɛ.
Chwazi Kounye ya:
Máà 15: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.