Naˬhmˬ 3
3
1Tahˇ joe joe-awˇ smˇ muiˬ muiˬ-euˬ,
mehˇ shuiˇ shuiˇ-awˇ tsawˇ haˬ sehꞈ-euˬ,
meuˬ heu meuˬ guiˬ lahˬ doeˇ tehꞈ-a.
2Naˇ haˬ sheˇ aˬ jeˬ teˇ saˇ nya.
Yahˬ caˆ neh sheu juiꞈ-eu teˇ saˇ,
laˆ lawˬ daˇ kʼahˇ buiˇ-eu teˇ saˇ,
mahˬ pyehˬ teh sehˇ luꞈ-eu teˇ saˇ,
mahˬ laˆ lawˬ cehˆ luꞈ-eu teˇ saˇ,
naˬ bawˬ bawˬ ni gaˬ laˇ miˇ-a.
3Gahˬ, mi cehˇ guiˇ nyiˬ ni baꞈ-awˇ,
mahˬ dziˬ-eu deuˬ coeˬ uˇ leꞈ ngeh,
tsawˇ shiˇ duˬ gahˬ pu cu cu-awˇ,
tsawˇ shiˇ-ahˇ tsawˇ shiˇ pehˆ toˆ-ehˇ,
shiˇ tsaˬ maˬ paˇ tsoˆ jiˇ coeˇ meh.
4Aˇ gʼehˇ muiˬ-awˇ aˬ cawˬ mawꞈ-eu,
miˇ tsaˬ zaˬ baˬ ya baw uiˬ-awˇ,
aˬ yawꞈ zaˬ kʼaˆ bi geuꞈ jiˇ-euˬ,
Niˇnaˬbeˬ meh maˬ laˇ meuˬ-aˬ,
kʼehˬ-eu kʼaˆ-eu jeˬ daˬ luꞈ meh.
5Dawˬ tawˆ kʼoeˇ taˆ Sahˬpaˬ Miˬyehˇ,
Niˇnaˬbeˬ-ahˇ heu loˇ ehˇ meh.
“Niˇnaˬbeˬ meuˬ-ahˇ ngaˇ kʼehˬ ma.
Miˇ tsaˬ tsawˇ jeuˬ dawˬ tawˆ mehˬ shi,
nawˬ-ahˇ ngaˇ mehˬ tsoeˬ lehˆ dzeh-awˇ,
neˇ myawˆ ni bi shaꞈ dawˇ sehꞈ ma.
6Nawˬ-ahˇ ngaˇ yehˬ bawˬ-ehˇ gʼeh-awˇ,
yaw jawꞈ yaw laꞈ shehˆ daˆ nehˬ-awˇ,
aˬ cawˬ mehˬ shi daˬ bi ga ma.
7Nawˬ-ahˇ kʼaˇ haw mawˇ le-euˬ deuˬ,
kuiˇ toꞈ naˇ kʼah paw ciˬ kʼoꞈ-awˇ,
‘Niˇnaˬbeˬ meuˬ cawˆ jiˇ taˬ ngaˇ.
Aˬ suˇ gʼaˬ gʼawˬ shaˬ gaˬ nehˬ nmˇ.
Aˬ suˇ gʼaˬ ngehˬ gʼeh nehˬ nmˇ’ lehˇ,
naˇ kʼah ciˬ pyawˇ-awˇ ehˇ tehꞈ-a.”
8Niˬlaˇ lawˇ baˬ lawˇ deh jaˆ-awˇ,
iˇ cuꞈ tiˬ jawˬ loꞈ piˇ taˬ-euˬ,
Deˬbiˇ meuˬ kʼoeˇ meuˬ naˆ maˬ tseˇ,
Niˇnaˬbeˬ nawˇ maˬ gaˇ te loˇ.
9Suˬdaˬ miˇ kʼahˬ, Liˆbyaˇ miˇ kʼahˬ,
Iˇjiˇtuˆ miˇ kʼahˬ dawˬ tawˆ luꞈ,
Deˬbiˇ-euˬ laꞈ jeuˬ shaˇ duˬ meh.
10Ehˇ kʼawꞈ, aˬ yawꞈ-ahˇ paꞈ tawꞈ-awˇ,
bi nyehꞈ byoˆ-euˬ maˬ ngeuˇ-a loˇ.
Gaˇ gʼoꞈ gaˇ tsmˇ kʼaˇ tsmˇ le gaˇ,
aˬ yawꞈ-euˬ zaˬ bi diˬ sehꞈ-awˇ,
aˬ yuiꞈ aˬ tsu bi geuꞈ-euˬ deuˬ,
tiˬ paw tiˬ gʼaˬ shmˇ caˆ paꞈ-awˇ,
bi tsahˇ byoˆ-euˬ maˬ ngeuˇ-a loˇ.
11Niˇnaˬbeˬ nawˇ jiˇ baˬ yehꞈ-awˇ,
nawˬ-ahˇ muiˇ-eu deuˬ maˬ mawˇ gaˇ,
cehˆ zaꞈ-eu lehˇ leh jeh tehꞈ-a.
12Nawˬ-euˬ taˆ yaw ziꞈ dawˬ tawˆ luꞈ,
aˇ siˬ awꞈ laˇ yaˇ laˇ jiˇ-euˬ,
siˬ guˬ aˇ bawˇ tiˬ bawˇ loꞈ-ehˇ,
kʼaˬ meh mˇ nga-awˇ ngawˬ zuˆ ngeh,
kʼaˬ meh-ahˇ ga ahˇ jiˇ tehꞈ-a.
13Nawˬ-euˬ yehˇ deuˬ nawˬ-euˬ mehˬ shi,
zaˬ miˬ zaˬ loꞈ-ehˇ pyeuꞈ jiˇ-awˇ,
miˇ kʼahˬ-ahˇ maˬ loꞈ piˇ nya-ehˇ,
meuˬ-euˬ lahˇ kʼehˬ doˆ coˆ dahˇ-awˇ,
lahˇ kʼehˬ gʼoˆ bahˬ gʼoˆ shoˆ dawˬ tawˆ,
muiˇ-eu deuˬ dzah puiˆ dzeh tehꞈ-a.
14Guiˇ deuˆ le gaˇ ciˬ daˬ nya ni,
iˇ cuꞈ tiˬ byah kʼawꞈ ahˇ taˬ-awˇ,
nawˬ-euˬ guiˇ daˬ laˆ ziꞈ taˬ-awˬ.
Shaˬ jehˆ yaw jmˬ tsaˬ byaˆ tehˆ-awˇ,
nawˬ-euˬ guiˇ daˬ gawˬ ziꞈ taˬ-awˬ.
15Nawˇ aˇ naˆ ni teuˆ dui dui kʼawꞈ,
miˬ dzaˬ neh maˬ bi puiˆ sehꞈ naˇ,
guiˇ deuˆ gaˇ bi deuˆ sehꞈ tehꞈ-a.
Nyehˇ bahˇ sahˬ lahˬ teuꞈ-eu loꞈ-ehˇ,
nawˬ-ahˇ teuꞈ cuˬ byoˆ jiˇ tehꞈ-a.
Nyehˇ bahˇ loꞈ-ehˇ nawˇ behˇ laˇ-awˇ,
16mˬ taˆ aˬ guiˇ deuˬ myaˆ maˬ tseˇ,
nawˬ-euˬ baw gaꞈ myaˬ laˇ-euˬ meh.
Ehˇ kʼawꞈ, nyehˇ bahˇ dahˇ diˬ diˬ-awˇ,
zaw byoˆ zaw laˆ jiˇ-eu loꞈ-ehˇ,
aˬ yawꞈ maꞈ byoˆ-iˇ jiˇ-euˬ meh.
17Nawˬ-euˬ yaw huiˬ yaw mahˇ deuˬ-aˬ,
yaw gaˆ gaˆ-eu aˇ nah tiˬ nah,
kaˇ pyawˇ-ahˇ dawꞈ uiˬ laˇ taˬ-euˬ,
nyehˇ bahˇ baˬ maꞈ-ahˇ duˇ-eu meh.
Ehˇ kʼawꞈ nahˇ tsaˇ tsoꞈ laˇ ngeh nah,
aˬ yawꞈ maꞈ zaw byoˆ jiˇ gʼeh-awˇ,
iˇ zaˇ laˇ zaˇ maˬ paˇ siˬ meh.
18Huiˬ-eu Aˬshuˇliˆ sahˬ paˬ-oˇ,
nawˬ-euˬ gaˇ mˇ-eu sahˬ paˬ deuˬ,
yuꞈ byoˆ shiˇ byoˆ shiˇ laˆ jiˇ-awˇ,
nawˬ-euˬ miˇ kʼahˬ zaˬ dawˬ tawˆ luꞈ,
haw luiˆ nehˬ-eu gʼaˬ maˬ jawˇ ehˇ,
gawˬ jawˬ doe ni cehˆ byaˆ-euˬ meh.
19Nawˬ-euˬ maˇ kʼehˬ maˇ naˇ yaw naꞈ,
tiˬ jeˬ-iˬ maˬ laˆ taˬ nya-a.
Nawˬ neh kʼehˬ nehˬ kʼaˆ nehˬ-euˬ gaˇ,
maˬ daˬ haw ni dehꞈ dzeuˇ nya-euˬ,
tiˬ gʼaˬ-iˬ maˬ jawˇ-eu miˇ neh,
nawˬ-euˬ guiˬ lahˬ doeˇ-eu gaˇ kawˆ,
kʼaˇ ya gaˬ-euˬ tsawˇ haˬ dawˬ tawˆ,
laꞈ kʼawˆ tehˆ-awˇ cehˇ gʼa tehꞈ-a.
Chwazi Kounye ya:
Naˬhmˬ 3: AHK
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
Akha Bible Revision (Latin Script) © Thailand Bible Society, 2011.