Naˬhmˬ 2
2
Niˇnaˬbeˬ meuˬ cawˆ-iˇ-euˬ
1Niˇnaˬbeˬ nawˇ ya cawˆ-iˇ meh.
Nawˬ-ahˇ deuˆ-eu lehˇ oe luꞈ meh.
Taˆ laꞈ kʼoeˇ tsawˇ haˬ bi jawˇ-awˬ.
Gaˇ ma-ahˇ yaw muiˇ bi loꞈ-awˬ.
Guiˇ deuˆ-eu lehˬ hmˬ dah taˬ-awˬ.
2Muiˇ-eu deuˬ neh laˆ cawˆ nehˬ-awˇ,
uˬ pyaˬ uˬ laꞈ juˆ dzeh jiˇ-euˬ,
Iˇsaˬleˬlaˆ tsawˇ jeuˬ-euˬ baoˬ,
Yaˬkoˆ-euˬ yaw shehꞈ kʼahˬ sehˇ kʼoeˇ,
Sahˬpaˬ Miˬyehˇ biꞈ kʼoꞈ tehꞈ-a.
3Muiˇ-eu deuˬ-euˬ guiˇ maꞈ yehˇ deuˬ,
dehˬ daˬ duˬ yaw neˇ baꞈ luꞈ-awˇ,
mehˬ tsoeˬ yaw neˇ dm luꞈ-eu meh.
Guiˇ deuˆ-eu lehˬ hmˬ dah taˬ-awˇ,
mahˬ laˆ lawˬ guiˇ nyiˬ ni jaˆ-awˇ,
mahˬ deuˬ liˆ liˆ-ehˇ teuˆ luꞈ meh.
4Meuˬ-euˬ lehˆ kawˆ gaˇ ma doe ni,
kʼoeˇ paw heu paw maˬ siˬ laˇ ni,
laˆ lawꞈ teh sehˇ dui dui-eu meh.
Miˬ dzaˬ loꞈ-ehˇ naˇ guiˇ guiˇ-awˇ,
mˬ myawꞈ loꞈ-ehˇ kawˇ dui dui meh.
5Yaw huiˬ yaw mahˇ geuꞈ-eu deuˬ-ahˇ,
dawˬ biꞈ-awˇ mehˬ hu bi le ngeh,
sahˬ tiꞈ tiꞈ-awˇ pehˆ toˆ-euˬ meh.
Meuˬ lahˇ jaˆ gaˇ coeˬ keuˆ gʼeh-awˇ,
awˆ byaˆ duˬ ciˬ daˬ taˬ-euˬ meh.
6Lawˇ baˬ lahˇ kʼehˬ dehˬ pah leꞈ-awˇ,
Sahˬ paˬ hawˇ nymˇ luiˬ laˇ tehꞈ-a.
7Sahˬ paˬ ma-ahˇ aˬ cawˬ nyehꞈ-awˇ,
zaˬ kʼaˆ deuˬ noeˬ shaˬ-eu miˇ neh,
yawˬ ha-euˬ kʼahˬ-ahˇ teˇ teˇ-ehˇ,
kʼaˬ kʼoeˬ zaˬ loꞈ-ehˇ mahˇ tehꞈ-a.
8Iˇ tsahˇ daˬ paˆ doˆ-euˬ loꞈ-ehˇ,
Niˇnaˬbeˬ tsawˇ haˬ teuˆ byaˆ-awˇ,
“Taˬ cehˆ. Taˬ cehˆ” lehˇ guˇ nehˬ kʼawꞈ,
tiˬ gʼaˬ-iˬ maˬ ciˬ pyawˇ haw-aˇ.
9Pyuˇ deuˬ ceh geuꞈ yuˇ geuꞈ jiˇ-awˬ.
Shuiˇ deuˬ nawˬ geuꞈ kʼaˆ geuꞈ jiˇ-awˬ.
Aˇ poeˬ kʼaˆ-eu pyuˇ shuiˇ myawˬ gahˬ
maˬ ehˇ jiˇ coeˇ ni jaˆ luꞈ meh.
10Niˇnaˬbeˬ meuˬ laˆ cawˆ jiˇ-awˇ,
geuꞈ-eu tiˬ pawꞈ-iˬ maˬ ahˇ-a.
Nui ma ga ka byoˆ taˬ jiˇ-awˇ,
pawˬ tsuiꞈ yaw dzuˬ dzuˬ jiˇ-euˬ meh.
Gʼaˬ tiˬ pawꞈ-iˬ maˬ paˇ ahˇ-ehˇ,
myaˆ pyawˬ-ahˇ shiˬ maˬ paˇ dahˬ meh.
11Aˇ hu Niˇnaˬbeˬ meuˬ heu meuˬ,
aˇ laˬ jaˬ shiˇ byoe-ahˇ duˇ meh.
Aˇ laˬ jaˬ shiˇ aˬ buˬ aˬ ma,
aˇ mah kaˬ gaˇ gaˆ byoˆ gʼeh kʼawꞈ,
zaˬ deuˬ maˬ byoˆ maˬ laˆ-iˇ ni,
bo huiˬ cu huiˬ nehˬ nya-euˬ meh.
12Bawˇ tsahˬ jeˬ zaˬ-ahˇ kawꞈ sehꞈ-awˇ,
shaˬ jiˇ cehˬ paˆ cehˬ shaˆ doˆ-awˇ,
miˬ sawˇ zaˬ deuˬ bi dzaˬ-euˬ meh.
Aˬ yawꞈ-euˬ lo kʼahˬ tiˬ byah ni,
shaˬ jiˇ shaˬ jehꞈ sha byah-euˬ meh.
13Dawˬ tawˆ kʼoeˇ taˆ Sahˬpaˬ Miˬyehˇ,
Niˇnaˬbeˬ-ahˇ heu loˇ ehˇ meh.
“Mahˬ laˆ lawˬ deuˬ ngaˇ keuˬ dzeh-awˇ,
yehˇ deuˬ guiˇ bi deuˆ sehꞈ jiˇ ma.
Aˬ cawˬ-ahˇ nawˬ neh ceh geuꞈ-euˬ,
yawˬ jeˬ na luꞈ ngaˇ yuˇ kʼoꞈ ma.
Miˇ tsaˬ kʼoeˇ taˆ nawˇ baoˬ huiˬ-euˬ,
kʼawˇ taꞈ kʼawˇ teˇ maˬ paˇ doˆ meh.”
Chwazi Kounye ya:
Naˬhmˬ 2: AHK
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
Akha Bible Revision (Latin Script) © Thailand Bible Society, 2011.