Haˬbaˬkuˆ 1
1
1Heu-aˬ, Miˬyehˇ gʼaˇ duˬ ngehˬ dah-eu Haˬbaˬkuˆ-ahˇ, Sahˬpaˬ Miˬyehˇ neh bi siˬ bi mawˇ-euˬ dawˬ deuˬ meh.
Maˬ tsaˬ maˬ dawˇ-eu jeˬ-ahˇ Haˬbaˬkuˆ nui ma cawˆ-eu
2Sahˬpaˬ Miˬyehˇ-oˇ, aˇ myah ni,
ngaˬ-euˬ shaˇ dawˬ maˬ naˇ haˬ-ehˇ,
byehˇ dzeh nehˬ laꞈ-eu lehˇ gʼeh te.
Yaw haiˬ jeˬ mˇ nga leh ˇ guˇ kʼawꞈ,
nawˇ ka kʼoꞈ le-eu maˬ baw-a.
3Maˬ tsaˬ maˬ dawˇ-eu jeˬ mˇ gaˇ,
aˬ jeˬ miˇ neh bi haw laꞈ te.
Yaw haiˬ jeˬ hawˇ-eu yaw cawˆ jeˬ,
ngaˬ-euˬ mehˬ shi mˇ dui dui-awˇ,
iˬ dehˬ iˬ ceh yaˇ kʼaˬ mehˬ dzaˬ,
maˬ gui jiˇ coeˇ ni jaˆ luꞈ meh.
4Zahˇ sahˇ kʼoꞈ deuˬ peuˬ-iˇ jiˇ-awˇ,
yaw tsaˬ yaw dawˇ maˬ paˇ ziꞈ meh.
Yaw muiˬ-ahˇ yaw haiˬ jawˬ lahˇ-awˇ,
yaw tsaˬ yaw dawˇ buꞈ-iˇ-euˬ meh.
Sahˬpaˬ Miˬyehˇ ehˇ kʼoꞈ nehˬ-euˬ dawˬ
5Sahˬpaˬ Miˬyehˇ aˬ yawꞈ-euˬ tsawˇ haˬ zaˬ-ahˇ ehˇ-eu,
“Miˇ kʼahˬ tsawˇ jeuˬ-ahˇ haw taˬ yawˬ.
Nawˇ zahˬ dui ya dui leˇ tehꞈ-a.
Ehˇ mehˬ ngeh maˬ jah coeˇ-eu jeˬ,
nawˇ dehꞈ luꞈ-eu aˇ yamˬ laꞈ kʼoeˇ,
ngaˇ jahˇ nehˬ gaˇ ya mawˇ tehꞈ-a.
6Haiˬ dui jawꞈ dui gʼeh dui dui-eu,
Baˬbuˇloˬ tsawˇ jeuˬ kʼoeˇ jeuˬ-ahˇ,
ciˬ tuˇ-awˇ baoˬ biꞈ-eu laꞈ kʼoeˇ,
mˬ dzeˇ miˇ dzeˇ doˆ ni coeˬ-awˇ,
aˬ cawˬ miˇ kʼahˬ ceh geuꞈ tehꞈ-a.
7Dzawˬ dui dui-eu tsawˇ jeuˬ kʼoeˇ jeuˬ,
miˇ kʼahˬ dawˬ tawˆ laˆ guˆ jiˇ-awˇ,
nui ma huiˬ-eu mahˇ-eu mehˬ shi,
maˬ mˇ kʼmˬ-eu jeˬ maˬ baw-a.
8“Aˬ yawꞈ maꞈ-euˬ dziˬ mahˬ kʼoeˇ deuˬ,
kʼaˬ zuiˬ naˆ maˬ tseˇ kawˇ dzehˬ-awˇ,
uˬ ciꞈ gaˆ-eu kʼaˬ yehˇ maˬ tseˇ,
guˆ laˇ paˬ-ehˇ gʼeh-eu uˬ taꞈ,
gaˇ mahˇ kaˬ gaˇ neh coeˬ leꞈ-euˬ,
mahˬ dziˬ kʼehˬ jiˇ jahˇ gʼeh haw-eu,
kʼaˬ dzeˇ byoeˇ leꞈ-eu naˆ maˬ tseˇ,
mahˬ pyehˬ teh kawˇ dui dui-eu meh.
9“Haiˬ-eu gʼeh-eu aˇ dzehˬ dzeuˇ-awˇ,
miˇ tsaˬ zaˬ laˇ baˇ-iˇ-eu meh.
Kaˇ shuiꞈ tawˆ bymˇ taˬ-euˬ loꞈ-ehˇ,
tsawˇ haˬ nyehꞈ uiˬ paꞈ uiˬ-eu meh.
10Sahˬ paˬ deuˬ-ahˇ aˬ jaꞈ jaꞈ-awˇ,
sahˬ ma deuˬ-ahˇ naˬ gʼa-eu meh.
Taˆ tsoˆ ziꞈ taˬ-euˬ gaˇ uiˇ-awˇ,
miˇ tsaˬ ciˬ goˇ daˆ keuˆ leꞈ-awˇ,
deuˆ byoˆ deuˆ laˆ jiˇ nehˬ-eu meh.
11Kʼoeˇ naˇ, jaˬ lehˇ baw-eu loꞈ-ehˇ,
mehˬ hu paw iˇ byoˆ gʼeh-eu meh.
Aˬ yawꞈ maꞈ gʼoe-eu miˬyehˇ-aˬ,
aˬ yawꞈ maꞈ-euˬ baoˬ kʼoeˇ tehꞈ meh.”
Haˬbaˬkuˆ nui ma cawˆ-eu
12Mˬ ga miˇ seu dahˬ beh ngeh neh,
Sahˬpaˬ Miˬyehˇ nawˇ Miˬyehˇ meh.
Ngaˬ-euˬ Miˬyehˇ Yaw shawˇ Gʼaˬ-oˇ,
nga maꞈ bi shiˇ-eu gʼeh te loˇ.
Nga maꞈ-ahˇ yaˇ kʼaˬ bi daˇ-awˇ,
bi muiˬ bi shawˇ laˇ-eu gʼaˇ duˬ,
Baˬbuˇloˬ-ahˇ nawˇ tseˇ doˆ-awˇ,
baoˬ tiˬ byah ni biꞈ taˬ teˬ loˇ.
13Nawˬ-euˬ myaˆ nuiˆ shawˇ dui dui-awˇ,
yaw lehˬ mˇ gaˇ maˬ haw nahˇ kʼawꞈ,
haiˬ-eu deuˬ yaw doeˇ mˇ dehˆ-awˇ,
tsawˇ muiˬ deuˬ bi myoꞈ ahˇ jiˇ gaˇ,
aˬ jeˬ gʼeh haw haw-ehˇ jawˇ te.
14Uˆ lahˇ nehˬ-eu gʼaˬ maˬ jawˇ-eu,
laˆ shaˆ ngaˬ shaˬ ngaˬ deˇ hawˇ-eu,
aˬ jeˬ lu jeˬ aˇ mawˇ loꞈ-ehˇ,
tsawˇ haˬ-ahˇ nawˇ sawˇ luꞈ te loˇ.
15Aˇ gah gʼaˬ ngaˬ juiꞈ ka paꞈ-awˇ,
za dzeh pymˬ-awˇ nyehꞈ doˆ jiˇ-awˇ,
laˬ kʼaˬ cehˇ-eu maˬ ngeuˇ nga loˇ.
16Za baˬ da neh smˇ muiˬ muiˬ-awˇ,
yaw kuiˇ ya dzaˬ dehˆ-eu miˇ neh,
za-ahˇ aˬ yawꞈ uˬ duˬ tahˬ-awˇ,
lawˇ-eu shehˇ-eu jeˬ mˇ-euˬ meh.
17Za kʼoeˇ aˬ yawꞈ paˇ byuˬ kʼaˇ-awˇ,
miˇ kʼahˬ tsawˇ jeuˬ dawˬ tawˆ luꞈ-ahˇ,
gʼawˬ shaˬ tiˬ pawꞈ-iˬ maˬ gaˬ ni,
laˆ byoˆ leꞈ-eu lehˇ gʼeh ta loˇ.
Chwazi Kounye ya:
Haˬbaˬkuˆ 1: AHK
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
Akha Bible Revision (Latin Script) © Thailand Bible Society, 2011.