Khiav Dim 8
8
Qav
1Tus TSWV hais rau Mauxes tias, “Ciali mus cuag Falaus thiab hais rau nws tias, ‘Koj ciali tso Kuv haivneeg mus, kom lawv thiaj yuav tau pehawm Kuv. 2Yog koj tsis kam tso li, Kuv yuav rautxim rau koj lub tebchaws uas yog tso qav los nyob puvnkaus koj lub tebchaws. 3Qav yuav nyob puvnkaus hauv tus Dej Nais, thiab tseem yuav tawm los nyob hauv koj lub loog, hauv koj chav pw, saum koj lub txaj, hauv koj cov nomtswv thiab koj cov pejxeem tsev, hauv koj lub qhovcub, thiab koj tej laujkaub ua noj ua haus. 4Cov qav ntawd yuav dhia pajpaws los nce koj, nce koj tej pejxeem thiab koj cov nomtswv hauv tibsi.’ ”
5Tus TSWV hais rau Mauxes tias, “Koj kom Aloos muab nws tus pas nrig tsa rau saum tej dej loj, dej me, thiab tej pas dej, ua kom qav tawm tuaj nyob thoobplaws tebchaws Iziv.” 6Yogli ntawd, Aloos thiaj muab nws tus pas tsa rau saum tej dej, ces qav txawm tawm tuaj puvnkaus tebchaws Iziv. 7Tiamsis cov Iziv uas txawj ua yeessiv, kuj ua tau kom qav tawm tuaj puvnkaus lub tebchaws Iziv thiab.
8Falaus hu Mauxes thiab Aloos nkawd mus cuag nws, nws hais rau nkawd tias, “Neb ciali thov kom tus TSWV tshem tej qav no mus, kuv yuav tso nej cov neeg mus, kom lawv thiaj yuav coj tau tsiaj mus fij rau tus TSWV.”
9Mauxes teb Falaus hais tias, “Kuv zoosiab thov Vajtswv pab koj. Seb koj muab lub sijhawm twg rau kuv thov Vajtswv rau koj, rau koj cov nomtswv, thiab koj cov pejxeem kom tej qav ntawd khiav tawm ntawm nej mus kom tag, tsuas pub muaj nyob hauv tus Dej Nais xwb.”
10Falaus teb tias, “Tagkis koj mamli thov Vajtswv rau kuv.”
Mauxes teb tias, “Kuv yuav ua rawsli koj thov, kom koj thiaj yuav paub tias tsis muaj lwmtus vajtswv uas zoo npaum li tus TSWV, uas yog peb tus Vajtswv li. 11Tej qav ntawd yuav khiav tawm ntawm koj, koj cov nomtswv thiab koj cov pejxeem mus tag huvsi; tsuas pub muaj nyob rau hauv tus Dej Nais xwb.”
12Ces Mauxes thiab Aloos txawm tawm hauv Falaus tsev mus, thiab Mauxes thov tus TSWV kom tshem tej qav uas Nws tau tso los rau Falaus ntawd mus kom tag. 13Tus TSWV ua rawsli Mauxes thov, ces tej qav uas nyob hauv tej tsev, ntawm tej tshavloog, thiab tom tej teb puavleej tuag tag huv tibsi lawm. 14Cov neeg Iziv khaws tej qav tuag ntawd los tso ua tej pawg tswlwj ntxiag thoob lub tebchaws. 15Tiamsis thaum Falaus pom tej qav ntawd tuag tag lawm, nws lub siab rov tawv ib yam li qub, raws nraim li tus TSWV tau hais tseg lawm, Falaus yeej yuav tsis mloog Mauxes thiab Aloos nkawd tej lus li.
Yoov-qaib
16Tus TSWV hais rau Mauxes hais tias, “Koj kom Aloos muab nws tus pas nrig nplawm av, tej hmoov av uas nyob thoobplaws hauv lub tebchaws Iziv no yuav hloov ua yoov-qaib tag.” 17Yogli ntawd, Aloos thiaj muab nws tus pas nrig nplawm av, ces tej hmoov av thoobplaws lub tebchaws Iziv txawm hloov ua yoov-qaib mus ntsauv neeg thiab tej tsiaj. 18Cov Iziv uas txawj ua yeessiv, lawv tas zog ua kom muaj yoov-qaib, tiamsis lawv ua tsis tau li. Yoov-qaib ya los puvnkaus txhua qhov chaw, 19cov uas txawj ua yeessiv ntawd hais rau Falaus tias, “Vajtswv yog tus uas ua tej xwm no tiag!” Tiamsis Falaus lub siab tseem tawv heev, raws nraim li tus TSWV tau hais tseg lawm, nws yeej tsis mloog Mauxes thiab Aloos nkawd tej lus li. #Lukas 11:20
Yoov
20Tus TSWV hais rau Mauxes tias, “Tagkis sawvntxov thaum Falaus tabtom mus rau nram havdej, koj ciali mus cuag nws thiab hais rau nws tias tus TSWV hais tias, ‘Koj ciali tso Kuv haivneeg mus, kom lawv thiaj yuav tau pehawm Kuv. 21Kuv ceebtoom rau koj hais tias, yog koj tsis kam tso, Kuv yuav rautxim rau koj uas yog tso yoov los tsaws koj, tsaws koj cov nomtswv, thiab koj cov pejxeem. Cov neeg Iziv tej tsev los yuav muaj yoov puvnkaus, thiab hauv av los yuav muaj yoov tsaws puvnkaus. 22Tiamsis Kuv yuav tseg cheebtsam Nkausees, thaj chaw uas Kuv haivneeg nyob, yuav tsis pub kom muaj yoov hlo li. Kuv yuav ua li no kom koj thiaj paub tias Kuv, uas yog tus TSWV, yog tus uas ua haujlwm nyob hauv lub tebchaws no. 23Kuv yuav ua ib yam los cais#8:23: Tej cov ntawv qub-qub thaum ub sau hais tias ib yam los cais; phau lus Henplais hais tias tso tawm. Kuv haivneeg thiab koj haivneeg. Qhov txujci tseemceeb no yuav tshwmsim nyob rau tagkis.’ ”
24Tus TSWV tso yoov ya poog ntws los tsaws puvnkaus rau hauv Falaus lub loog thiab hauv nws cov nomtswv tej tsev. Cov yoov no ua rau thoobplaws tebchaws Iziv tau txais kev puastsuaj.
25Falaus thiaj txib neeg mus hu Mauxes thiab Aloos nkawd tuaj cuag nws, thiab hais tias, “Nej ciali mus thiab muab khoom hlawv fij rau nej tus Vajtswv nyob hauv lub tebchaws no lau.”
26Mauxes teb tias, “Ua li ntawd tsis yog cai, rauqhov cov neeg Iziv yuav tsis txaussiab rau tej tsiaj uas peb tua fij rau tus TSWV, uas yog peb tus Vajtswv. Yog peb muab tej tsiaj uas cov neeg Iziv tsis txaussiab los tua ua khoom fij nyob rau ntawm tej chaw uas lawv pom, lawv yeej yuav muab pobzeb txawb kom peb tuag xwb. 27Yogli ntawd, peb yuavtsum mus peb hnub ke rau tom tiaj suabpuam, peb mam tua tsiaj fij rau tus TSWV, uas yog peb tus Vajtswv, rawsli Nws tau xaaj tseg rau peb lawm.”
28Falaus hais tias, “Yog nej mus tsis deb, kuv yuav tso nej mus tua tsiaj hlawv fij rau tus TSWV, uas yog nej tus Vajtswv, tom tiaj suabpuam. Neb ciali thov Vajtswv pab kuv.”
29Mauxes teb tias, “Thaum kuv tawm kiag ntawm no mus, ces kuv yuav thov tus TSWV kom tagkis Nws tshem cov yoov no tawm ntawm koj, koj cov nomtswv thiab koj cov pejxeem mus kom tag. Tiamsis koj tsis txhob dag peb ntxiv lawm, thiab tsis txhob txwv peb cov Yixalayees qhov uas yuav mus tua tsiaj fij rau tus TSWV.”
30Mauxes tawm ntawm Falaus mus thiab thov tus TSWV kom tshem cov yoov tawm mus, 31ces tus TSWV txawm ua rawsli Mauxes tej lus thov. Cov yoov ciali ya tawm ntawm Falaus, ntawm nws cov nomtswv thiab ntawm nws cov pejxeem mus tag tsis tshuav ib tug seem nyob qhovtwg li lawm. 32Tiamsis zaumno los Falaus lub siab tseem tawv li qub, thiab nws rov tsis kam tso cov Yixalayees mus li thiab.
Chwazi Kounye ya:
Khiav Dim 8: MWW2022
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2022 United Bible Societies. All rights reserved.