Khiav Dim 9
9
Tsiajtxhu Tuag
1Tus TSWV hais rau Mauxes tias, “Ciali mus cuag Falaus thiab hais rau nws hais tias tus TSWV, uas yog cov Henplais tus Vajtswv, hais tias, ‘Koj ciali tso Kuv haivneeg mus, lawv thiaj tau mus pehawm Kuv. 2Yog koj tseem rov tsis pub lawv mus thiab, 3Kuv yuav rautxim rau koj uas yog tso mob aws los rau nej tej tsiaj, uas yog nej tej nees, tej neesluav, tej ntxhuav, tej nyuj, tej yaj, thiab tej tshis. 4Kuv yuav ua ib yam los cais cov Iziv tej tsiajtxhu thiab cov Yixalayees tej tsiajtxhu; cov Yixalayees tej tsiaj yuav tsis muaj ib tug tuag hlo li. 5Kuv, uas yog tus TSWV, twb teem sijhawm cia rau tagkis lawm, Kuv yuav ua tej no.’ ”
6Hnub tomqab, tus TSWV txawm ua rawsli Nws tau hais ntawd, ces cov Iziv tej tsiaj tuag tag huv tibsi, tiamsis cov Yixalayees tej tsiaj tsis tuag ib tug li. 7Falaus tso neeg mus tshuaj saib tej xwm ntawd thiab lawv pom tias cov Yixalayees tej tsiaj yeej tsis tuag ib tug li. Tiamsis Falaus lub siab tseem tawv li qub thiab yeej tsis kam tso cov Yixalayees mus li.
Mob Rwj
8Ces tus TSWV thiaj hais rau Mauxes thiab Aloos nkawd tias, “Neb ciali tsuab ob-peb tes tshauv hauv qhovcub mus, es kom Mauxes muab w rau saum nruabntug tabmeeg Falaus. 9Cov hmoov tshauv ntawd yuav ya ri niab mus thoobplaws lub tebchaws Iziv, yuav ua rau txhua tus neeg thiab tej tsiaj mob rwj ua paug thoobplaws ibce.”
10Yogli ntawd, nkawd thiaj mus tsuab ib leeg ib tes tshauv thiab mus sawv ze ntawm Falaus xubntiag. Mauxes muab cov tshauv ntawd w rau saum nruabntug, ces cov tshauv ntawd txawm ua rau neeg thiab tej tsiaj mob rwj thoobplaws ibce. #Tshwm 16:2 11Cov neeg uas txawj ua yeessiv, lawv tsis muaj peevxwm los sawv tabmeeg Mauxes, rauqhov lawv mob rwj thoobplaws ibce ib yam li cov neeg Iziv lawm thiab. 12Tiamsis tus TSWV ua rau Falaus muaj lub siab tawv, raws nraim li tus TSWV tau hais tseg lawm, Falaus yeej tsis mloog Mauxes thiab Aloos nkawd tej lus li.
Lawg
13Tus TSWV hais rau Mauxes tias, “Tagkis koj ciali sawvntxov mus cuag Falaus thiab hais rau nws tias, tus TSWV, uas yog cov Henplais tus Vajtswv, hais tias, ‘Koj ciali tso Kuv haivneeg mus, lawv thiaj tau mus pehawm Kuv. 14Zaumno tsis yog Kuv yuav rautxim rau koj cov nomtswv thiab koj cov pejxeem xwb, tiamsis Kuv yuav rautxim rau koj thiab ntag, kom koj thiaj yuav paub tias nyob thoobplaws lub ntiajteb no yeej tsis muaj ib tug uas zooli Kuv. 15Yog Kuv tsa tes los ntaus koj thiab koj cov pejxeem los ntawm qhov uas tso kab mob los rau nej, ces nej yeej yuav tuag tu noob nrho mus. 16Tiamsis Kuv yuav tsis pub koj tuag, rauqhov Kuv xav kom koj pom Kuv lub hwjchim, kom Kuv lub koobmeej thiaj yuav nrov-ncha moo lug mus thoobplaws lub ntiajteb. #Loos 9:17 17Nimno koj tseem tsa hwjchim thiab tsis kam tso Kuv haivneeg mus. 18Tagkis lub sijhawm no Kuv yuav tso lawg los hlob heev. Txij thaum muaj lub tebchaws Iziv no los, yeej tsis tau muaj dua ib zaug lawg los hlob npaum li zaum no. 19Koj yuavtsum xaaj kom neeg muab koj tej tsiajtxhu lawv los rau hauv nkuaj thiab muab txhua yam uas koj muaj nyob tom tej tshavpuam coj los tso rau hauv tsev, rauqhov lawg yuav los ntaus cov neeg thiab tej tsiaj uas nyob tom tej tshavpuam es tsis muaj chaw nkaum kom tuag tag hauv tibsi.’ ”
20Falaus cov nomtswv qeeleej ntshai heev vim tej lus uas tus TSWV hais ntawd, lawv thiaj coj lawv cov qhev los tsev thiab cab lawv tej tsiaj los rau hauv nkuaj. 21Tiamsis cov neeg uas tsis quavntsej tus TSWV tej lus ceebtoom, lawv tso lawv cov qhev thiab tej tsiaj nws nyob nws rau hauv tej tshavpuam.
22Ces tus TSWV hais rau Mauxes tias, “Ciali tsa koj txhais tes rau saum ntuj, kom lawg poob los thoobplaws lub tebchaws Iziv, los ntaus neeg, ntaus tej tsiajtxhu, thiab tej qoobloo uas nyob hauv tej teb kom puastsuaj tag huvsi.” 23Yogli ntawd, Mauxes thiaj muab nws tus pas nrig tsa rau saum ntuj, ces tus TSWV ua xob nroo, tso lawg poob los, thiab muaj xob laim los ti nkaus rau hauv av. 24Tus TSWV tso lawg los hlob heev ua rau xob laim liab pes vog. Txij thaum muaj lub tebchaws Iziv los, yeej tsis tau muaj dua ib zaug uas lawg yuav los hlob npaum li zaum no. #Tshwm 8:7; 16:21
25Tej neeg, tej tsiajtxhu thiab txhua yam uas nyob tom tej tiajnrag thoobplaws lub tebchaws Iziv, raug lawg ntaus puastsuaj tag. Lawg tseem ntaus tej qoobloo uas cog rau hauv tej teb thiab txhua tsob ntoo lov tag huv tibsi. 26Tsuas tshuav cheebtsam Nkausees uas yog thaj chaw cov Yixalayees nyob thiaj tsis muaj lawg poob los xwb.
27Falaus txib neeg mus hu Mauxes thiab Aloos nkawd tuaj cuag nws thiab hais tias, “Zaumno kuv ua txhaum lawm; tus TSWV yeej ua yog lawm, kuv thiab kuv cov pejxeem puavleej ua txhaum. 28Thov koj thov tus TSWV lau! Vajtswv tej suab xob nroo thiab tej lawg no txaus peb kawg li lawm! Kuv thov coglus hais tias kuv yuav tso nej mus, nej tsis tas yuav nyob hauv no ntxiv lawm.”
29Mauxes teb Falaus hais tias, “Thaum kuv tawm kiag hauv lub nroog no mus, ces kuv yuav tsa tes thov tus TSWV. Xob yuav tsis nroo, thiab lawg yuav tsis los ntxiv lawm, kom koj thiaj yuav paub tias lub ntiajteb no yog tus TSWV tug. 30Tiamsis kuv paub tias koj thiab koj cov nomtswv yeej tseem tsis ntshai tus TSWV, uas yog Vajtswv li.”
31Tej maj thiab nplej raug puastsuaj tag, rauqhov nplej tabtom siav, thiab maj tabtom tawgpaj. 32Tiamsis tej mog tsis raug puastsuaj, rauqhov tseem tuaj tsis tau nto npoo av.
33Mauxes tawm hauv Falaus lub loog thiab mus rau sabnraum ntug nroog, ces nws txawm tsa tes thov tus TSWV. Xob ciali ntsiag, lawg thiab nag ciali tu. 34Thaum Falaus pom tias xob tsis nroo, lawg thiab nag tsis los lawm, ces nws rov ua txhaum dua. Nws thiab nws cov nomtswv lub siab rov tawv li qub, 35raws nraim li uas tus TSWV tau hais rau Mauxes lawm tias Falaus yeej yuav tsis kam tso cov Yixalayees mus.
Chwazi Kounye ya:
Khiav Dim 9: MWW2022
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2022 United Bible Societies. All rights reserved.