Khiav Dim 7
7
1Tus TSWV hais rau Mauxes tias, “Kuv yuav ua kom koj zooli Vajtswv rau Falaus, thiab koj tus tijlaug Aloos yuav ua koj tus cevlus. 2Koj yuavtsum piav rau Aloos txog txhua yam uas Kuv xaaj koj, mas nws yuav hais kom Falaus tso cov Yixalayees tawm hauv nws lub tebchaws mus. 3Tiamsis Kuv yuav ua kom Falaus muaj lub siab tawv heev, txawm yog nws yuav pom Kuv ua tej txujci txaus ntshai heev nyob hauv tebchaws Iziv no npaumtwg los nws yuav tsis mloog koj tej lus. #Teshl 7:36 4Thaum ntawd Kuv yuav tsa Kuv txhais tes rautxim hnyav rau cov Iziv thiab yuav coj Kuv haivneeg Yixalayees txhua xeem tawm hauv tebchaws Iziv mus. 5Thaum Kuv tsa Kuv txais tes los tawmtsam cov neeg Iziv thiab coj haivneeg Yixalayees tawm hauv lawv lub tebchaws mus, lawv yuav paub tias Kuv yog tus TSWV tiag.”
6Mauxes thiab Aloos thiaj ua rawsli uas tus TSWV tau xaaj tseg rau nkawd. 7Thaum nkawd mus cuag Falaus, Mauxes muaj hnubnyoog yimcaum xyoo, thiab Aloos yog muaj yimcaum-peb xyoos.
Aloos Tus Pas Nrig
8Tus TSWV hais rau Mauxes thiab Aloos nkawd tias, 9“Yog Falaus hais kom neb ua txujci rau nws saib, ces koj kom Aloos muab nws tus pas nrig povrhees rau ntawm Falaus xubntiag, ces tus pas ntawd yuav hloov kiag ua ib tug nab.”
10Yogli ntawd, Mauxes thiab Aloos txawm mus cuag Falaus thiab ua rawsli tej uas tus TSWV tau xaaj tseg rau nkawd. Aloos muab nws tus pas nrig povrhees rau ntawm Falaus thiab nws cov nomtswv xubntiag, ces tus pas ntawd txawm hloov kiag ua ib tug nab. 11Falaus txawm hu nws cov neeg txawjntse thiab cov txawj ua yeessiv tuaj, thiab lawv ua tau yeessiv ib yam li Mauxes nkawd ua. 12Lawv muab lawv tej pas pov rau hauv av, tej pas ntawd txawm hloov ua nab tag li thiab. Tiamsis Aloos tus pas nrig muab lawv tej pas nrig nqos tag huv tibsi lawm. 13Txawm yogli ntawd los Falaus lub siab tseem tawv li qub, raws nraim li tus TSWV tau hais tseg lawm, nws yeej tsis mloog Mauxes thiab Aloos nkawd tej lus li.
Subtawg Subntsha Los Raug Tebchaws Iziv
Ntshav
14Ces tus TSWV hais rau Mauxes tias, “Falaus lub siab tawv heev, nws tsis kam tso cov neeg tawm mus. 15Yogli ntawd, thaum sawvntxov koj ciali mus cuag Falaus thaum nws mus nram tus Dej Nais. Nqa tus pas nrig uas hloov tau ua nab, thiab mus tos nws nram ntug dej. 16Koj hais rau Falaus tias, ‘Tus TSWV, uas yog cov Henplais tus Vajtswv, txib kuv tuaj hais kom koj ciali tso Nws haivneeg mus, kom lawv thiaj yuav tau mus pehawm Nws tom tiaj suabpuam. Tiamsis los txog rau tamsim no los koj tseem tsis mloog Nws lus li thiab. 17Falaus, tus TSWV hais tias zaumno koj yuav paub tias Nws yog leejtwg los ntawm tej txujci uas Nws tseem tabtom yuav ua no. Koj saib nawb, kuv yuav muab tus pas nrig no nplawm tus Dej Nais, mas tus dej yuav hloov ua ntshav. #Tshwm 16:4 18Ntses yuav tuag, thiab dej yuav tswlwj ntxiag, ua rau cov neeg Iziv yuav haus tsis taus tej dej ntawd li.’ ”
19Tus TSWV hais rau Mauxes tias, “Koj kom Aloos muab nws tus pas nrig tsa rau saum txhua tus dej loj, dej me, thiab tej pas dej hauv tebchaws Iziv. Tej dej ntawd yuav dhau mus ua ntshav, thiab yuav muaj ntshav thoobplaws lub tebchaws, txawm yog hauv tej thoob ntoo thiab tej hub pobzeb los yuav muaj ntshav tag huv tibsi.”
20Ces Mauxes thiab Aloos txawm ua rawsli tus TSWV tau xaaj tseg. Aloos muab nws tus pas nrig nplawm tus Dej Nais tabmeeg Falaus thiab nws cov nomtswv, ces tej dej txawm hloov ua ntshav tag huv tibsi. 21Tej ntses hauv dej tuag tag, tswlwj ntxiag ua rau cov neeg Iziv haus tsis taus tej dej ntawd li. Muaj ntshav thoobplaws tebchaws Iziv. 22Cov Iziv uas txawj ua yeessiv, los lawv kuj ua tau ib yam li ntawd thiab, ces Falaus thiaj tseem muaj lub siab tawv li qub. Nws yeej tsis mloog Mauxes thiab Aloos tej lus, raws nraim li tus TSWV tau hais tseg lawm. 23Thaum zooli ntawd ces Falaus thiaj rovqab mus tsev thiab tsis quavntsej txog zaj no li. 24Cov neeg Iziv thiaj mus khawb qhovdej raws tus ntug Dej Nais los haus, rauqhov lawv haus tsis taus tus Dej Nais ntawd lawm.
25Tomqab xya hnub uas tus TSWV muab dej hloov ua ntshav tau dhau mus.
Chwazi Kounye ya:
Khiav Dim 7: MWW2022
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2022 United Bible Societies. All rights reserved.