2 KORINTNA 8
8
Ҥal u minda ka u saɓakgi
1Gorsenna an min dagi dla mayra Lona tak oo mamba ki duk suu vina hu Masedoinda. 2Suu vina wihawra fasi ŋgol lay ni furi masira ay ŋgol suwa, asi haw ŋgol lay ni ɦizza, minda hurusira kaa. 3An ka dagi ana, asi ɦal va ma u saɓakasi na, su va ma u saɓakasina lay. 4Asi joɓomi ana lini nanagelay asi min ɦal tlesuu njunda maŋ suu vi Lona hu Yude. 5Dla ndaɗta lini su va ma ami saa kam jewna, asi hal tasi ki maŋ Bu Suuna u minda vi Lona egemi ami lay. 6Ni kay ndaɗta ami joɓ Tit nam tuɗ egegi tew tew a li sunda a mbaaragi a daɓ sunda ndaɗta kiyo. 7Agi ɦizi hu tlena halaŋ, vira, boyna, wira, tagira feɗta, iriɗ ka ŋgaayɗi, minda agi minimira. Ami min ana agi tak ɦiz magira ndaɗta hu sunda ko ndaɗta na may.
8An ka tinigi ha kagi ni gaɗtaɗi, an dagi kay dla tara feɗta vi suu daŋŋa, kay agi mba gol gasira vi min magira. 9Agi wagi oora vi Bu Suuna mayna Yesu Kristu. Nam ma ɦizina mbuɗ tam ki hawra kagiya, kay nam min ɦizigi ki u haw mamba.
10An min dagi min manda dla ndaɗta. Jivi kagi kay a tuɗ fok u dlara agi gijaŋŋa ay gasamba. Agi ni suu li ay jewna ka kay lira ɦawaɗi kay agi ɦal tagi a liya. 11Tuɗugi fok cecemi a daɓ sun ndaɗta ɗaŋ, tiniy saa mayra jivira a daɓ dla mayra agi saa kaɗ ndaɗta u va ma ka kogina. 12Lini sana tin hurum ma jivina wa a ɦala ni, Lona ŋgani ɦal mayra ka ko sanara, va ma kaɗina nam ka ŋgaambi.
13Ka ana suu ɦiw mba fi koɗ tara may agi loɓ mayra naɗi. Suuna mba lini fun tasi dew. 14Cecemi agi tlena ka kogiya, ndak a njun u suu va ka kosiɗina. Lini fali taa dew va li ka kogiɗi ni, asi tlena li ka kosiya ni hin njun ugi ni na may. Ni hin mbuɗ fun tagi dew ni na. 15Ko magaara dira na,
«Sa ma yow kom ŋgolna,
ka hin li kom ŋgolɗi lay.
Sa ma yow kom ewna,
mamma hin ka kaɗakambi lay.»
Tit u ndarayam suu koyra
16Gaygi deɓpa maŋ Lona kay nam ɦal hu ma jivina hu Tit kay boy magina. 17Nam hum joɓ mamira. Kay nam sa ma tam feɗ kay sunda min a tuɗ varagi u tamba olo. 18Ami min sun wayaygi ma suu vina halaŋ di jivira kam kay sun mamba di Boy ma Ayra ha u namu. 19Nammi sa ma suu vina halaŋ ŋgaɓam a nam li u ami a ndarami ma sunda kay di ki kay oora, di ki kay bibiŋilla vi Bu Suuna kay min mamira njun u suuna may.
20Ami li na ni a sa dami boy ma co kay ɦal mayra ŋgolla ami ka ŋgomoraɗi. 21Ami min a li dlara jivira ni ii Bu Suuna holɗi, ii suuna lay.
22Ami sun wayayna ha usiya. Ami tukum u sunda ŋgolo nam tam feɗta. Cecemi wanni tam mayra feɗta li kaki su olo kay nam minigi ɦay. 23Kay Tit ni ndaran ma li sunda ko tami dukugina, kay gorseygi suu ha umma ni suu vina halaŋ sunusi ay kay a hal ŋgolla maŋ Kristu. 24Takagi dlaagira ana agi minisi gasira, kay suu vina halaŋ mba wi ana ami ŋgaagi na ni gasi u voɗoɗu.
Chwazi Kounye ya:
2 KORINTNA 8: BMS
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bible Moussey © Bible Society of Chad, 2002.