2 KORINTNA 9
9
Njunda maŋ suu vina
1Kay ka jivi coco a an ɓiirigi magaara ha kay a njun u suu vina vi Lona hu Yuderaɗi. 2An wagi min magira, kay ndaɗta an ŋgaagi fok suu Masedoinna ana gorsegi suu Gresna tasi mini a ɦal njunda ki gasam day. Tagira feɗta kay sunda ɦal eŋga maŋ suu hiŋŋa. 3An sunugi gorsegi suu ha wana kay va ma ami ŋgaagi ki kamma mba li ki ɦawaɗi, an min ana agi li gasi ko va ma an di kagina na. 4Lini suu Masedoinna mbay un wa fagi tagi ka miniɗi ni, ami hin mbuɗ zolona kay dlara ami di kagi jewra zolo namma ka mamina oloɗi, mbuɗ ni magina. 5An cuk gorsenna ha ni egegiya, agi min tagi ha ki fokon jew kay va ma agi di kam a ɦamma. Ni dla ndaɗta hin li zak hu li ma an mbana hin wi ana agi ɦal ni u huu ma jivina ka u ɦeɓpaɗi.
6Humugi gagi kay boy ma di anaba, sa ma zaa ka ŋgolɗina hin feɗ ni ew may, sa ma zaa ŋgolna hin feɗ ni ŋgol may. 7Sana ɦal ni u va ma nam saa hurum a ɦamma, ka va ma sa yoo tam kambi, ka ko ɦeɓpa naɗi lay. Lona min sa ma ɦal u furira. 8Lona ndaki kay a ɦaŋ tlena zeɗ zeɗ su lay kay agi mba fi tlesuu agi minisina halaŋ, usi mba hin kogi a ndakagi kay sunda jivira bel lay. 9Ko magaara dira naa,
«Nam ɦal maŋ suu wihawra,
jivi mamba ka daɓ kiɗira.»
10Lona ma ɦal njaf tlena maŋ suu horokŋa, ɦasi funa kay tiisina, nam hin ɦagi njaf tlesuu agi minsina halaŋ, wulusiya, nam hin zulugi u ɗegee magira fok ŋgolo. 11Nam hin mba ɦizigi ki u tlen hu lina halaŋ, kay agi mba tak ki ɦiz magira, ni suuna ŋgolo hin gi deɓ Lona kay ɦala agi ɦamira a ami ɦasirara. 12Sunda agi laɗta ka ndak daɓ minda vi suu vina vi Lona doy holɗi, mba li ki a gi deɓpa vi suuna bolow fok Lona. 13Sun mayra agi laɗ ndaɗta tak ki kay tagira, suuna ŋgolo mba geleɗ Lona kay hum vun magina ma tak viigira u Boy ma Ayra vi Kristu, asi mba geleɗemu kay ɦiz magira agi ɓorow tlegeyegi ki u asira, u suu daŋŋa halaŋ lay. 14Asi hin cen kagiya kay min magira ŋgolla, kay oora vi Lona ta mbuɗ mbuɗta nam laɗ kagira. 15Geleɗ Lona kay ɦal mamba ŋgolla bay ŋgara.
Chwazi Kounye ya:
2 KORINTNA 9: BMS
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bible Moussey © Bible Society of Chad, 2002.