2 KORINTNA 7
7
1Banayanna vi vun ma namma halaŋŋi maygi aygiya, laygi taygi ki teteɗ u tlesuu ɓeŋ ta sana u iiri mamba, sooygi taygi ki kay a kak teteɗ u ndaana vi Lona.
Furira vi Pol
2Ҥami hurugiya ami li vama co ka eg saɗi, ami ɓeŋ sa ka kiɗi lay, ami tli va vi sa ka komiɗi lay. 3An di na ni kaagi ka ni ɓak kagiɗi. Kay agi ka ni hurumi kurufuwa, lini miɗ ni miɗi lay, li ni kak iiri lay aygi ni ko taygiya. 4An hurun haɗ kagiya an ŋga tan ŋgol lay ni kakiya. Hu wihaw mamira halaŋ an kak u ɗigilla furira oy hurun ŋgol lay.
5Hu li ma ami mba hu Masedoin wanni fami koɗta ka hu na ndeɗi, ami fami wihawra ŋgolo. Njogoɗ ko tammi u suu daŋŋa, ndaana hurumi coco lay. 6Lona ma ɦal saɓakŋa maŋ suu ki maŋina, hin ɦami saɓakŋa hu li ma Tit mba egemina. 7Ami fi ɗil iira ni ka u mbaamba ɦawaɗi. Nam dami olo ko agi ɗilim irimba na may. Nam ɓakami kay saa magira, u yoo magira lay, kay tagi ka mini a njun kanda. Ni kay ndaɗta an cecemi li furira ŋgolo.
8Lini magaara an ɓiirigira hara, mbuɗugi hurugi yoo lay ni, an ka jok boy daŋgi, an li hin jok boy daŋi an wi kiwa ana mbuɗugi yoora nde ni ndaɗu. 9Cecemi an ka li furira ni ka kay yoo magiraɗi kay yoo magira mbuɗugi a agi jok dlaagira agi laɗta zeɗ. Yoora mba kaki ndaɗta ni u minda vi Lona. Lini amiya ni lagi va ma co ka egegiɗi. 10Yoo mayra eg Lonara ni jok iirira ki zeɗ, tuɗ sana hu suɗta, sana ka ndak a saa kaɗ oloɗi. Yoora hu ndaŋgara ni tuɗ sana hu miɗna. 11Gologi va ma agi lamma kay yoo ndaɗta ko Lona minda na. Agi saa kay dla ndaɗta, agi tin vun ndemma, agi mbuɗ yara, agi mbuɗ ndaana, agi min wanu, agi mbuɗ tagi feɗta, agi kaɓakŋa kay cora. Hu tle asina halaŋŋi agi tak ki ana agi li va ma co ka huɗi.
12An ɓiirigi magaara ha ni ka kay sa ma li cora dukugi naɗi, ka kay ma cora li ay egemmaɗi lay, ni kay humugi gagi kay Lona, ni njunda agi njun umira. 13Kay ndaɗta sun magira ɦami saɓakŋa ɦay.
Ni ka kay ami fi saɓakŋa ɦawaɗi may ami li furira ŋgol kay ami wi Tit lay, kay dlara agi lamba egem jivira. 14An ŋga tan kaki egemu, kay agi tagira ganan yan kaɗi. Na lay ami tew tew dagi ni gasira, ŋga mayra ami ŋga tami fok Tit ni u voɗoɗ daŋ may. 15Min mamba nam minigira ŋgol cocoo. Hu li ma humum gam kagina, kay agi halaŋ hum um jiviya. Agi vam dukugiya, dlak ndaana komu. 16An furi coco hu li ma an ŋgaagi hu tlena halaŋ.
Chwazi Kounye ya:
2 KORINTNA 7: BMS
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bible Moussey © Bible Society of Chad, 2002.