1 KORINTNA 13
13
Minda
1Lini an ɓak vunna vi suuna halaŋ u ma vi suu sunda huulona lay, min manda li kaɗi ni, boy manna an damma hin kini ko gaŋgana a cira ɦawa na, ɗowba ko koŋ koŋŋa a tiira ɦawa na. 2An ndak a fi ɦal mayra di Boy Lonana ki maŋ suuna, an ndak a fi wira halaŋ hum u tlesuu ŋgayna kiyo, an ka u vira ndak a jok ɦinira kiyo, lini min manda kaɗi ni an kini ɦawaa. 3An ndak a ɓorow tlegeyen ki halaŋ, ɦal tan a ŋgal kira lay, lini min manda kaɗi ni ka li va dewɗi.
4Minda ɗiliya, minda jiviya, ka li huu ma co eg saɗi, minda ka tli yam taɗ koloɗi, minda ka ŋga taɗɗi. 5Minda ka li va zoloɗi, minda ka godlombi, minda ka mbuɗ yaɗi, minda ka vi boy huruɗ gak gakgi, 6minda ka furi kay coraɗi, furi ni kay gasira. 7Minda ka takaŋ ana aŋ siɓ dlara halaŋ, ndaɗ min ana ay tew tew ni hu vira, juɓ u ɗigilla.
8Minda ndaɗ din din ka daɓ kiɗi. Boy ma sana fam ay ko Lonna hin daɓ kiyo, ɦala ɓak u vun ma daŋŋa zeɗ zeɗta hin daɓ kiyo, wira hin daɓ ki lay. 9Kay ay ka way u tlena ki belɗi, way ni nde nde ɦawaa. Boy Lonana ma dam kina lay ni ɦiw ɦawaa. 10Ma gasina mba wa ɗaŋŋi tlesuu ka u voɗosiɗina hin daɓ kini na gaw.
11Hu li ma an ay goo tuna ni an ɓaka, saara, gi ii dlara lay ni, ko gogoona na, hu li ma an mbuɗ ki sana ni hin dlara goora ki halaŋ. 12Cecem wanda aygi gol taygi ko ŋgussa hu kotoromma na, aygi hin waygi taygi u iriygiya. Cecem wanda an ka wi ki jiviɗi, ha fokka an hin wi ki jivi ko Lona wanda na.
13Cecem wanda ni tlena hindi kaa, vira, juɓa, u minda, va ŋgol duk tlesuu asina ni minda.
Chwazi Kounye ya:
1 KORINTNA 13: BMS
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bible Moussey © Bible Society of Chad, 2002.