1 KORINTNA 12
12
Ҥala Musuk Lonara ɦaɗ maŋ suuna zeɗ zeɗta
1Gorsenna kay ɦala Musuk Lonara ɦaɗta,
An min ana agi wagi u gasira vi ɦal ndaɗta kiyo. 2Agi wi ana hu li ma agi ay bay vi Boy Lonana tura wanni, asi taɗagi ay u fuli suu ndumuna agi vi kagi bay u dlara. 3Ni kay ndaɗta an min ana agi wagi u boy namma kiyo, sa ma ana nam u Musuk Lonara hurumuna ka di ana, «Yesu ni ma ki baayna,» naɗi, sa ma di ana, «Yesu ni Bu Suuna,» bay Musuk Lonara hurumbi.
4Ҥala vi Musuk Lonara ka zeɗ zeɗta ɓorowoɗ ni ndaɗ Musuk Lonara dew. 5Ii sunda ka zeɗ zeɗ ni sunni Bu Suuna dew. 6Njaf sunda ka bolow zeɗ zeɗni Lona zulu ni nam halaŋ lay. 7Musukka ɦal maŋ gegelay a li jivira kay suuna halaŋ. 8Sa maari Musukka ɦam boyna u nera, ma daŋŋa ndaɗ ɦam boyna u wira. 9Musukka ndaɗta dew ma hiŋŋa ndaɗ ɦam vira, ma hiŋŋa ndaɗ ɦam saɓak ma garaɗ suu tuguɗira kina. 10Musukka ɦal saɓakŋa maŋ sa hiŋŋa kay li dlara mbuɗta, sa hiŋŋa kay jok vun Lona, sa ma daŋŋa ndaɗ ɦam saɓakŋa a wi ŋgussa cora ura gasira. Sa ma hiŋŋa ndaɗ ɦam yal ma ɓak vun ma daŋŋa, ma hiŋŋa ndaɗ ɦam yal ma jok boy namma kina. 11Ni ndaɗ Musukka ndaɗta dew zul dlara halaŋŋi ndaɗu, ndaɗ ɦal maŋ suuna zeɗ zeɗ u min maɗta.
Mbalatara dew ɓorowi zeɗ zeɗ
12Ni ko Kristu dew mbalatam ɓorowi bolowo, lini nam ɓorowi bolow lay, nammi dew. 13Aygi halaŋ suu Juifna u njaf suu daŋŋa, mborɓiina u suu vuɗina, aygi halaŋ mbusuygi batemma a taɓmi tara dewra u Musuk ndaɗta, ɦaygi ni kay aygi halaŋ taɓ ci u Musuk ndaɗta dew.
14Mbalatara ka ni kay taɗ dewɗi, ɓorowi bolowo. 15Lini gayna di ana, «Anni ka konaɗi, kay ndaɗta an ka taɓi eg mbalataraɗi,» doyɗi ni nam ka haw tam ki kay tam dewɗi. 16Lini humba di ana, «Anni ka iiraɗi, kay ndaɗta an ka taɓi eg mbalataraɗi,» doyɗi ni ndaɗ ka haw taɗ ki kay taɗɗi. 17Lini mbalatara halaŋŋi ira dew ni hin ndak hummi nanage? Lini mbalatara halaŋŋi humba dew ni hin hisni ana mege? 18A gasira Lona tin mbalatara zeɗ zeɗ hu liisini u min mamba. 19Lini mbalatara halaŋ ka taɓi hu lina dewɗi ni ka liɗi. 20Asi lii zeɗ zeɗ na may mbalatara ni dew.
21Iira ka di kona ana, «An ka li va u aŋgi,» naɗi, yamba ka ndak di gayna ana, «An ka li va u agiɗi,» naɗi. 22Ni na ɗow ana mbalata mayra ka iriy saɓakira sun maɗta kaa. 23Mbalata mayra dlaɗ ka iri ŋgolɗira, ay goloɗ jivi sura hiŋga, mbalata mayra aygi li zolona koɗta aygi ŋgayaɗ coco may. 24Mbalata mayra ndakira aygi ka ŋgayaɗɗi, Lona dlaɓ mbalatara kay a ɦal ŋgara maŋ li ma ka ndakiɗina. 25Kay ndaɗta ɓorowra ka kay mbalataraɗi, mbalatara zeɗ zeɗ halaŋ wi haw tasiya. 26Lini mbalatan ta dew wi hawra tliwin wi hawra uɗ halaŋ may, lini mbalatan taa dew fi ŋgara tliwin halaŋ li furira uɗ may.
27Agi halaŋi, mbalata Kristu, agi ni gegelay ni mbalatamu, sa hiŋŋa ni na lay. 28Ni kay ndaɗta duk suu vina Lona cuk suu vovoɗ mamba jewe, a mbara ni suu jokom vunumma, a hindira ni suu haɗta, ŋgoo daganda ni suu li dlara mbuɗta, hiŋga suu nam ɦasi saɓakŋa a garaɗ suu tuguɗira kina, hin ɦal suu njun u suuna u suu gol suuna, suu u ɦala a ɓak vun ma daŋŋa daŋŋa. 29Halaŋŋi ka suu vovoɗtaɗi, halaŋŋi ka suu jok vun Lonaɗi, halaŋŋi ka suu haɗ suunaɗi. Halaŋŋi ka suu nam ɦasi saɓak ma li dlara mbuɗtaɗi. 30Ka suu garaɗ suu tuguɗira kina belɗi, ka suu ɓak u vun ma daŋŋa belɗi, ka suu jokom kina belɗi lay. 31Saa kay ɦal mayra ŋgol su ndarayaɗnara.
An min takagi voɗ mayra ŋgol su ndarayaɗna bella.
Chwazi Kounye ya:
1 KORINTNA 12: BMS
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bible Moussey © Bible Society of Chad, 2002.