1 KORINTNA 14
14
Hoŋ saa kay ɦala vi Musuk Lonara
1Hoŋ hal minda. Saa kay ɦala vi Musukka su saɓaki ni joka jok vun Lona. 2Sa ma ɓak u vun ma daŋŋa, ka ɓakŋi maŋ suunaɗi, ni maŋ Lona. Sa ka humum boy mammaɗi, nam di gasi mayra ŋgayra kini u saɓakŋa vi Musuk Lonara. 3Sa ma di boy ma jok vun Lona kina di ni maŋ suuna gaw, kay a wulusi hu vira, kay a gaɗasiya a ɗilisi irisi may. 4Sa ma di boyna u vun ma daŋŋa wulni viimba kay tamba doy hol, sa jok vun Lona wulni vira vi suu vina halaŋ.
5An min ana a agi halaŋ ɓakagi u vun ma daŋŋa, a jivi sura ni agi ɓakagi boy ma jok vun Lona. Kay ndaɗta sa ma jok vun Lona dlaamba ŋgol su sa ma ɓak u vun ma daŋŋa, a jivira ni sa ma ɓak u vun ma daŋŋa ko nam fi sa ma ndaki a jokom boy mamma ki maŋ suuna a wulusi hu vira. 6Gorsenna an joɓogi kiyo. Lini an mba dukugi wa ɓakagi u vun ma daŋŋa ni, an hin li irigi jivira ni u mege? An ka irigi jivi na ndeɗi, kay an dagi u va ma ka kiɗi, lini wira kala, boy ma jok vun Lona kala, lini haɗta kala ni an dagi ma kaɗi.
7Tinigi ndal boy namma ko tlesuu gi soolla na, diffa u diŋŋa. Lini ii soolla ay kagi jiviɗi, sana hin ɓorowosi ana bu ni diŋŋa ni diffa mege? 8Lini suu bu diffa duuna buuɗ ka ki jivi a yi suunaɗi, sa hin min tam kay yara ni gege? 9Lini boy ma aŋ dam u vun ma daŋŋa ka ki jiviɗi, sana hin hum ana aŋ dini kay mege? Aŋ ɓak ki ni hu semeɗna ɦawaa. 10Njaf vunna hu ndaŋgara ka zeɗ zeɗ ŋgolo, nam halaŋŋi ma bay um kaɗi. 11Lini sana dan boyna, an ka hum vun ma nam ɓak u nammaɗi, sa ma ɓakan boyna mbuɗ irin ni ko sa ma daŋŋa na, an mbuɗ irimmi ko sa ma daŋŋa na may. 12Agi hurugi ka haɗ kay ɦala vi Musuk Lonara va ma ŋgolna ni halagi a wul suu vina kolo hu vira.
13Kay ndaɗta sa ma ɓak u vun ma daŋŋa, mariyaɗ ni nam joɓ Lona a ɦam ɦala gi u boy namma kira. 14Lini an cen Lona u vun ma daŋŋa ni ŋgus manda ka hu cenda, yal manna kaki ni vuɗ ka umbi. 15An lini ana mege? An cen Lona u ŋgus manda u yal manna lay halaŋ, an gi soolla geleɗta u ŋgus manda, an gi soolla geleɗta u yal manna lay halaŋ, 16lini aŋ gi deɓ Lona u ŋgus maŋga huruŋ ɦawa na, sa ma kaki a humba ɦawa duk suu tokina hin di ana, «Amin,» u gi deɓ maŋga ni nanage? Nam ka ndak a wi va ma aŋ dammaɗi. 17Lini cen maŋga jivi coco lay ni sa ma hiŋŋa fi saɓak ka uɗ hu viimbaɗi.
18An gi deɓ Lona kay an ɓak u vun ma daŋŋa suugi halaŋ. 19Fok suu vina hu tokka, lini an di boyna vadl lay u vun ma suuna humumma halaŋŋi, haɗ suu hiŋŋa, su kay mayra an di boyna ŋgolo u vun ma sa ka humumbina.
20Gorsenna, lakagi hu dlaagira ko gorkemba naɗi, lakagi ko gorkemba na hu dla cora, a gi ii boyna ni agi lakagi ko suu ŋgolona na. 21Gologi va ma magaara damma,
«Bu Suuna di ana an di maŋ suu asina,
an ɓakasi ni u vunna vi suu daŋŋa
ki fun suu daŋŋa ni suu mansina ka humumbi.»
22Ҥala ɓak boyna u vun ma daŋŋa ni kay suu bay vina ka kay suu vinaɗi, ni na ɗow ana ɦala jok vun Lona ni maŋ suu vina, ndaɗta ka kay suu bay vinaɗi may.
23Lini suu vina tok wa na bel, gijaŋŋa a ɓak u vun ma daŋŋa, lini suu bay vina u suu haɗ Boy Lonana kaɗina ka dukugiya ni hin di ana agi ki guruɗiya naɗi su? 24Lini suuna halaŋ jok vun Lona, sa ma ka wi Boy Lonnaɗina u ma bay vina mba dukugi wanni, nam hin wi coomba kay boy ma nam humumma. Ɓakŋa hin vammi u boy ma nam humumma halaŋ. 25Saa mamba ŋgay hurum kay tam dewra hin mba ki kiɗiki, ni nam hin goɓ yam kaŋga cen Lona anaba, «Lona ka dukugi gasi.»
Tlesuu li duk suu vina
26A da boy namma kira ni ay li ni ana mege gorsenna? Hu li ma agi tokogi tagina wanni sa ma dukugi ma gi soolla kaa, sa ma haɗ suuna ka may, ma gi u dlara ŋgayra vi Lonara kina kaa, sa ma hiŋŋa ɓak u vun ma daŋŋa, sa ma gi u boy namma kina ka may. Halaŋŋi kay wul suu vina kolo hu vira. 27Lini suuna goy mba' u hindi a ɓak u vun ma daŋŋa asi varak tasi varakiya, sa ma dew hin jokom ki may. 28Lini sa ma jokom kina kaɗi ni, asi lak ɦawa bay ɓak u delesi kolo eŋga duk suuna hu tokka. Nam ɓak maŋ tamba u Lona doy hol. 29Lini suu jok vun Lona mba' kala hindi kala ka di boyna suu hiŋŋa saa kamu. 30Lini Lona tak dlaamba ŋgayra irimu, nam a di ki kaɗta ni, sa ma jewna seŋ tamu. 31Agi ndak a di boy ma jok vun Lona kina halaŋ, ni varak tagi varakiya, suuna halaŋ fi haɗta, fi saɓakŋa lay. 32Suu jok vun Lona kina Musukka ɦasi ɦala di boyna kira ni masiya. 33Lona yaygi ni ka ana aygi lakŋi hu ɦay ɦayraɗi, lakŋi hu heɓpa.
Ko duk suu vina vi Lona halaŋga na. 34Hu tokka vi suu vina ni boyogina lak ɦawa bay di vaa, voɗta ka kay asi ɓak boy huɗi, ko gaɗta di ana asi hoŋ yasi kaŋgara na. 35Lini asi a joɓ kay vaa, ni joɓ njufuyusi ha voo. Ka jivi kay cara a ɓak boyna duk suuna hu tokka vi suu vinaɗi.
36Ɗowba Boy Lonana mbay kini varaki su? Nam mba tew ni egegi agi hol su? 37Lini sana saa kay tam ana nammi sa ma jok vun Lona u ɦala vi Musukka ni nam sa namma ndak wi tlesuu an ɓiirisina ni gaɗta vi Bu Suuna. 38Lini sana ka wi u boy namma kiɗi ni hinim ɦawa na.
39Gorsenna halagi dla mayra di boy ma jok vun Lona kina, doo sa ma di boyna u vun ma daŋŋa kiɗi may. 40Hin tlena halaŋ mba li u gaɗta duk suu vina.
Chwazi Kounye ya:
1 KORINTNA 14: BMS
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bible Moussey © Bible Society of Chad, 2002.