Tʋma Labʋ 15
15
Pɔyɔɔdʋʋ abalɩbiya pɛlʋʋ tɔm Antɩyɔɔsɩ, Siirii egeetiye taa yɔ
1Nakʋyʋ wiye ɛyáa nabɛyɛ lɩnɩ Yudee egeetiye taa nɛ powolo Antɩyɔɔsɩ nɛ peheyiɣ taabalaa se yee peteyele nɛ pɛpɛlɩ-wɛ ɛzɩ palakʋʋ sɔnzɩ nzɩ́ Mooyiizi ɖʋwa yɔ sɩ-taa yɔ, paahikiɣ ñʋʋ yabʋ. 2Pɔyɔɔdɩ ḿbʋ́ lɛ, Pɔɔlɩ nɛ Barnaabaasɩ pekizini-wɛ-tʋ nɛ pa nɛ wɛ pɔhɔmnɩ ɖama tɔm pɩŋŋ. Peeɖe taabalaa tɔm se: yee ḿbʋ́, Pɔɔlɩ nɛ Barnaabaasɩ nɛ pa-taa nabɛyɛ powolo Yeruusalɛm, Krɩstʋ tiyiyaa nɛ ɛ-ŋgbɛyɛ taa sɔsaa pɔ-cɔlɔ nɛ pana-tʋ.
3Pɛɖɛɣaɣ lɛ, ŋgbɛyɛ taa ñɩma cɛlɩ-wɛ mbʋ́ pʋpɔzʋʋ-wɛ pa-nʋmɔʋ ɖɔm taa yɔ. Paatɩŋnɩ Fenisii nɛ Samaarɩɩ pa-ageeta taa nɛ Pɔɔlɩ nɛ Barnaabaasɩ pɛkɛdɩɣ a-taa ñɩma ɛzɩma mbʋ́ Ɛsɔ yeba nɛ mbá pɛtɛkɛ Yuda ñɩma yɔ papɩsɩnɩ ɛ-yɔɔ yɔ piye piye nɛ tɩla taabalaa tɩŋa leleŋ pɩŋŋ. 4Patalɩ Yeruusalɛm lɛ, peeɖe Krɩstʋ ŋgbɛyɛ taa ñɩma nɛ pɔ-sɔsaa nɛ tiyiyaa ḿbá pamʋ-wɛ. Ɛlɛ́, pɛkɛdɩ Yeruusalɛm ñɩma ḿbá mbʋ́ Ɛsɔ katɩŋnɩ pɔ-yɔɔ nɛ ɛla yɔ pɩtɩŋa payɩ.
Paɣtʋ ndʋ́ palɩzɩ-tʋ Yeruusalɛm yɔ
5Ɛlɛ́, Farɩsɩ ŋgbɛyɛ taa nabɛyɛ kɛwɛnɩ lidaʋ Yesu yɔɔ. Ḿbá kʋyɩna nɛ pɔtɔ se: «Mbá pɛtɛkɛ Yuda ñɩma nɛ pɛwɛnɩ lidaʋ ɖɔɖɔ yɔ, pʋwɛɛ se pɛpɛlɩ-wɛ nɛ peheyi-wɛ se pɔɖɔ Mooyiizi paɣtʋ yɔɔ.» 6Tiyiyaa ḿbá nɛ ŋgbɛyɛ taa sɔsaa panɩ tɔm ńdʋ́ lɛ, pekpeɣli ɖama nɛ pamaɣzɩ tɩ-yɔɔ. 7Paahɔmnɩ ɖama tɔm siŋŋ.
Pʋ-yɔɔ Pɩyɛ kʋyaa nɛ eheyi-wɛ se: «Taabalaa! Ɩtɛm naʋ mɩ-maɣmaɣ se Ɛsɔ lɩzɩ-m mɩ-hɛkʋ taa cɩnɛ kajalaɣ alɩwaatʋ taa se mowolo meheyi mbá pɛtɛkɛ Yuda ñɩma yɔ Laŋhɛzɩyɛ Tɔm nɛ pɛwɛnɩ lidaʋ Yesu yɔɔ. 8Ɛsɔ naɣ mbʋ́ pʋwɛ ɛyáa laŋa taa yɔ, ɛnʋ hanɩ ɛyáa ḿbá e-Fezuu Kiɖeɖeu ɖɔɖɔ ɛzɩ ɛhaʋ-ɖʋ-kʋ yɔ nɛ pɩwɩlɩ se e-liu wɛɛ se pɛkɛ ɛ-ñɩma. 9Ɛtɔsɔɔlɩ Yuda ñɩma ɖa nɛ pɩkɩlɩ-wɛ, mbʋ́ pʋyɔɔ yɔ, mbá patɩŋa payɩ pɛwɛnɩ lidaʋ ɛ-yɔɔ yɔ, ɛñalɩ pa-kɩwɛɛkɩm. 10Pɩlabɩ ɛzɩma lɛɛlɛɛyɔ ɩtakɩɣ Ɛsɔ se ɩna nɛ ɩsʋkɩ Krɩstʋ wayɩ tɩŋɩyaa sʋʋtʋ ndʋ́ ɖa-maɣmaɣ nɛ ɖɔ-cɔzɔnaa ɖɩtapɩzɩ se ɖɩsɩɣlɩ yɔ? 11Đa lɛ, Kɩpaɣlʋ Yesu lootiye yɔɔ pɩtɩŋnaa nɛ ɖɩwɛnɩ lidaʋ nɛ ɖihiɣ ñʋʋ yabʋ ɛzɩ ḿbá yɔ.»
12Peeɖe mbá patɩŋa paakpeɣlaa yɔ, posum ɖiɣ ɖiɣ nɛ pewelesiɣni Barnaabaasɩ nɛ Pɔɔlɩ. Paba kɛdaɣ-wɛ kawɩlɩsɩ nzɩ́ Ɛsɔ tɩŋnɩ pɔ-yɔɔ nɛ ɛwɩlɩ yɔ nɛ hama lakasɩ nzɩ́ ɛtɩŋnɩ pɔ-yɔɔ nɛ ɛla mbá pɛtɛkɛ Yuda ñɩma yɔ pɛ-hɛkʋ taa yɔ sɩ-tɔm. 13Pɛtɛm-wɛ kɛdʋʋ lɛ, Yakubu heyi-wɛ se: «Taabalaa! Iwelesi nɛ ɩnɩɩ. 14Siimɔɔ Pɩyɛ kɛdɩ ɛzɩma mbʋ́ Ɛsɔ kɔcɔnɩ mbá pɛtɛkɛ Yuda ñɩma yɔ pɔ-yɔɔ ɖooo kiɖe tɛɛ nɛ ɛlɩzɩ pa-taa lɛlaa se pɛkɛ ɛ-ñɩma yɔ. 15Pʋwɛ ɛzɩ pamaʋ náyaa mbá Ɛsɔ tiyi-wɛ yɔ pa-takayɩsɩ taa yɔ. Pamawa se:
16‹Kɩpaɣlʋ tɔm se:
pʋwayɩ lɛ, manpɩsɩɣ mɔnkɔɔ nɛ
menkpeɣli wiyaʋ sɔsɔ Daaviidi ñɩma mbá pamɩzɩ ɖama yɔ:
pɛwɛ ɛzɩ ɖɩɣa ŋgá kɔyɔkaa yɔ.
Ɛlɛ́, manɖaɣnɩɣ-kɛ maʋ
nɛ mɔñɔɔzɩ-kɛ.
17Malakɩ ḿbʋ́ se mbá pɩkazaa yɔ,
pañɩnɩ-m nɛ
ɛyáa tɩŋa, pɩkpɛndɩnɩ agɔmaa
mbá manɖʋwa se pɛkɛ ma-ñɩma yɔ patɩŋa payɩ.
Tɔm ńdʋ́ ma Kɩpaɣlʋ mɔyɔɔdaa.
18Kɩpaɣlʋ weyi ma meyeba nɛ ɛyáa tɩlɩ pʋnɛ pɩtɩŋa payɩ
ɖooo lɔŋ yɔ, mɔyɔɔdɩnɩ ḿbʋ́.›
19Pʋ-yɔɔ ma Yakubu meheyiɣ-mɩ se ɩtaakɔnɩ kaɖɛ mbá pɛtɛkɛ Yuda ñɩma nɛ pɔsɔɔlɩ se papɩsɩnɩ Ɛsɔ yɔɔ yɔ. 20Ɛlɛ́, ɖɩma-wɛ takayaɣ nɛ ɖiheyi-wɛ se pataatɔɔ kɩlaʋ nandʋ, mbʋ́ pʋyɔɔ yɔ, tipisiɣ ɛyáa. Pataatɔɔ ɖɔɖɔ calɩm nɛ kpɩna wena pɛtɛcɛ a-liŋ tɛɛ yɔ. Pakpa pa-tɩ nɛ yem yem lakasɩ. 21Mɔyɔɔdɩ ḿbʋ́, mbʋ́ pʋyɔɔ yɔ, ɖooo lɔŋ ɛyáa wɩlaɣ Mooyiizi paɣtʋ paa tɛtʋ ndʋ́ tɩ-taa paa kɩyakʋ kɩhɛzʋʋ ŋgʋ́ ki-wiye Yuda ñɩma Ɛsɔ ɖɩsɛyɛ ndɩ ndɩ taa.»
Yesu tiyiyaa nɛ Krɩstʋ ŋgbɛyɛ taa sɔsaa ma takayaɣ Siirii ɛjaɖɛ taa Antɩyɔɔsɩ egeetiye taa Krɩstʋ ñɩma
22Pʋwayɩ lɛ, Krɩstʋ tiyiyaa nɛ ɛ-ŋgbɛyɛ taa ñɩma nɛ pɔ-sɔsaa, patɩŋa payɩ pala lɩmaɣza se palɩzɩ pa-taa nabɛyɛ nɛ pɔsɔzɩ Pɔɔlɩ nɛ Barnaabaasɩ pɔ-yɔɔ nɛ petiyi-wɛ Antɩyɔɔsɩ. Peeɖe palɩzɩ Yuudi weyi pakʋm hɩɖɛ se Barnaabaasɩ yɔ nɛ Silaasɩ. Taabalaa lɛlaa ñaŋaɣ-wɛ siŋŋ. 23Pʋcɔ pɛɖɛɛ lɛ, paɖʋzɩ pe-nesi taa takayaɣ. Pama ka-taa se:
«Taabalaa, Krɩstʋ ñɩma mbá mɩ ɩtɛkɛ Yuda ñɩma nɛ ɩwɛɛ Antɩyɔɔsɩ tɛtʋ taa nɛ Siirii nɛ Siliisii pa-ageeta taa yɔ! Đa mɩ-taabalaa Krɩstʋ tiyiyaa nɛ Yeruusalɛm ŋgbɛyɛ taa ñɩma nɛ pɔ-sɔsaa ɖamaɣnɩ-mɩ takayaɣ kanɛ, ɖɩsɛ-mɩ! 24Đɩnɩwa se ɛyáa nabɛyɛ lɩnɩ ɖɛ-tɛ nɛ pɔkɔɔ mɩ-tɛ nɛ peliɣti-mɩ nɛ pɛkpɛzɩ mɩ-kalɩzasɩ nɛ pɔ-tɔm. Đɩtana pɔ-yɔɔ kpem. 25Ḿbʋ́ labɩna nɛ ɖɩnɩɩnɩ ɖama nɛ ɖɩlɩzɩ ɖa-taa nabɛyɛ nɛ ɖitiyi pa nɛ taabalaa kʋsɔɔlaa Pɔɔlɩ nɛ Barnaabaasɩ mɩ-cɔlɔ. 26Ḿbá kelemni pa-tɩ sɩm nɔɔ taa ɖa-Kɩpaɣlʋ Yesu Krɩstʋ yɔɔ. 27Pʋ-yɔɔ ɖitiyiɣ Yuudi nɛ Silaasɩ se peheyi-mɩ tɔm ndʋ́ ɖɩma takayaɣ kanɛ ka-taa yɔ nɛ pa-maɣmaɣ pɔ-nɔɔ. 28Mbʋ́ pʋyɔɔ yɔ, ɖa nɛ Fezuu Kiɖeɖeu ɖɩlabɩ lɩmaɣza se ɖɩtaasʋʋ-mɩ sʋʋtʋ natʋyʋ yem nɛ pɩtasɩnɩ ndʋ́ pʋpɔzʋʋ-mɩ yɔ. 29Ńdʋ́ lɛ se: ɩtaatɔɔ kɩlaʋ nandʋ yaa calɩm yaa kpɩna wena pɛtɛcɛ a-liŋ tɛɛ yɔ. Ɩkpa mɩ-tɩ nɛ yem yem lakasɩ. Ɩlabɩ pɩtɩŋa payɩ ḿbʋ́ yɔ, pʋwɛɣ ɖeu. Taabalaa, ɖɩsɛ-mɩ!»
30Pamʋ takayaɣ ŋ́gá ḿbʋ́ lɛ, pakpaɣ Antɩyɔɔsɩ nʋmɔʋ. Patalaa lɛ, pekpeɣli ŋgbɛyɛ taa ñɩma tɩŋa payɩ nɛ pɛcɛlɩ-wɛ-kɛ. 31Pakalɩ-kɛ patɩŋa pɛ-ɛsɩndaa lɛ, pɩlabɩ-wɛ hʋnʋm nɛ pa-laŋa hʋlʋmɩ. 32Yuudi nɛ Silaasɩ pa-maɣmaɣ paakɛ náyaa. Pʋ-yɔɔ paba ñɛkɛdɩ-wɛ tɔm sakɩyɛ se pɩlabɩ-wɛ hʋnʋm nɛ pɛtɛzɩ pɩʋ Ɛsɔ nʋmɔʋ taa. 33Paacaɣ peeɖe alɩwaatʋ cabɩ. Pʋwayɩ lɛ, ŋgbɛyɛ taa ñɩma ḿbá palabɩ-wɛ wele wele se papɩsɩ mbá paatiyi-wɛ yɔ pɔ-cɔlɔ nɛ laŋhɛzɩyɛ. [ 34Ɛlɛ́, Silaasɩ tɔ se ɛɛpɩsɩɣ.]
35Piyebi Pɔɔlɩ nɛ Barnaabaasɩ lɛ, paba ñacaɣ Antɩyɔɔsɩ peeɖe nɛ pa nɛ lɛlaa sakɩyɛ pawɩlɩɣ nɛ posusuu Kɩpaɣlʋ tɔm.
Pɔɔlɩ nɛ Barnaabaasɩ pɛcɛbɩ ɖama
36Pacaɣ Antɩyɔɔsɩ kɩyakɩŋ cabɩ lɛ, Pɔɔlɩ heyi Barnaabaasɩ se papɩsɩ taabalaa cɔlɔ tɛtʋ ndʋ́ tɩtɩŋa tɩ-taa paasusi Kɩpaɣlʋ tɔm yɔ nɛ pana se pɩsɩnɩ le. 37Peeɖe Barnaabaasɩ tɔm se pɛkpɛndɩnɩ Yohanɛɛsɩ weyi pakʋm hɩɖɛ se Maarkɩ yɔ. 38Ɛlɛ́, Pɔɔlɩ la lɩmaɣza se pataakpɛndɩnɩ-ɩ. Mbʋ́ pʋyɔɔ yɔ, eesewa nɛ eyebi-wɛ Pamfilii nɛ ɛtatasɩ-wɛ sɩʋ pa-tʋmɩyɛ taa. 39Pʋ-yɔɔ Pɔɔlɩ nɛ Barnaabaasɩ pɔhɔmnɩ ɖama tɔm ka ka nɛ pɩnɩɩ-wɛ nɛ pɛcɛ ɖama. Ɛlɛ́, Barnaabaasɩ kpaɣ Maarkɩ nɛ ɛ nɛ ɩ pasʋʋ mɛlɛ nɛ powolo Ciiprɩ ɛjaɖɛ taa. 40Piyele Pɔɔlɩ ñakpaɣ Silaasɩ nɛ taabalaa ɖʋzɩ-wɛ Kɩpaɣlʋ nesi taa se ɛlabɩ-wɛ lootiye. Pʋwayɩ lɛ, pacaŋ pɛɖɛɛ. 41Paatɩŋnɩ Siirii nɛ Siliisii pa-ageeta taa nɛ peyele a-taa Krɩstʋ aŋgba taa ñɩma tɛzɩ pɩʋ Ɛsɔ nʋmɔʋ taa.
Trenutno odabrano:
Tʋma Labʋ 15: KABI
Istaknuto
Podijeli
Usporedi
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj