Tʋma Labʋ 14
14
Pɔɔlɩ nɛ Barnaabaasɩ palabɩ tʋmɩyɛ Ikoniyɔm
1Pɔɔlɩ nɛ Barnaabaasɩ pɛwɛ Ikoniyɔm ḿbʋ́ lɛ, nakʋyʋ wiye powolo Yuda ñɩma Ɛsɔ ɖɩsɛyɛ taa ɖɔɖɔ nɛ posusi Yesu tɔm siŋŋ nɛ ɛyáa sakɩyɛ: Yuda ñɩma nɛ mbá pɛtɛkɛ Yuda ñɩma yɔ petisi-tʋ nɛ pɛwɛnɩ lidaʋ ɛ-yɔɔ. 2Ɛlɛ́, Yuda ñɩma mbá petetisi-tʋ yɔ, paba ñasazɩ mbá pɛtɛkɛ Yuda ñɩma yɔ se pala Pɔɔlɩ nɛ Barnaabaasɩ mbʋ́ pɩfɛyɩ ɖeu yɔ. 3Paa ḿbʋ́ yɔ, paacaɣ Ikoniyɔm peeɖe ka ka nɛ posusuu ɛzɩma mbʋ́ Kɩpaɣlʋ lakɩ ɛyáa lootiye yɔ kaalɛyɩtʋ. Eyeba nɛ pawɩlɩ kawɩlɩsɩ nɛ pala hama lakasɩ nɛ pɩwɩlɩ se tɔm ńdʋ́ posusuu yɔ, tɩkɛ toovenim. 4Peeɖe Ikoniyɔm ñɩma tayɩ ɖama tam naalɛ nɛ lɛlaa tɩnɩ Yuda ñɩma yɔɔ nɛ pɩsɛɣ lɛlaa ñatɩnɩ Pɔɔlɩ nɛ Barnaabaasɩ pɔ-yɔɔ. 5Yuda ñɩma nɛ mbá pɛtɛkɛ Yuda ñɩma yɔ nɛ pa-awiya, pɔñɔɔzɩ pa-tɩ se panazɩ Pɔɔlɩ nɛ Barnaabaasɩ nɛ payaɣ-wɛ pɛɛ nɛ pasɩ. 6Paba nɩ ḿbʋ́ lɛ, pala lɩmaɣza nɛ pakʋyɩ peeɖe nɛ pese powolo Listrɩ nɛ Dɛɛrbɩ pɛ-tɛtʋ nɛ pɔ-hɔɔlɩŋ pa-taa Likaoni egeetiye taa 7nɛ posusuu Laŋhɛzɩyɛ Tɔm.
Pɔɔlɩ nɛ Barnaabaasɩ palabɩ tʋmɩyɛ Listrɩ
8Pɔɔlɩ nɛ Barnaabaasɩ pɛwɛ Listrɩ ḿbʋ́ lɛ, nakʋyʋ wiye pana abalʋ nɔɔyʋ caɣaɣ, ɛkɛ kalɩkalaɣ. Paalʋlɩ-ɩ ḿbʋ́, ɛtɔɖɔ wiɖiyi kaʋ. 9Abalʋ ɛnʋ ewelesaɣ tɔm ndʋ́ Pɔɔlɩ yɔɔdaɣ yɔ. Ɛ́lɛ́ cɔnɩ-ɩ pɩŋŋ lɛ, ɛna se ɛwɛnɩ lidaʋ Ɛsɔ yɔɔ se ɛpɩzɩɣ ɛla nɛ ɛ-yɔɔ cɛ. 10Peeɖe Pɔɔlɩ holaa se: «Abalʋ ña, kʋyɩ ŋsɩŋ ña-naŋgbanzɩ yɔɔ!» Ɛlɛ́ abalʋ ɛnʋ, ɛkʋyɩ ɛmaa ɛ-naŋgbanzɩ yɔɔ nɛ ɛpazɩ ɖɔm. 11Likaoni egeetiye taa ɛyáa samaɣ na mbʋ́ Pɔɔlɩ laba yɔ lɛ, pamakɩ kubusi nɛ pɔyɔɔdʋʋnɩ pɛ-tɛ taa se: «Agɔlɩma pɩsɩ ɛyáa nɛ akɔɔ ɖɔ-cɔlɔ!»
12Pʋ-yɔɔ pakʋm Barnaabaasɩ hɩɖɛ se Zeesi, nɛ Pɔɔlɩ se Hɛrmɛsɩ#14.12 Zeesi nɛ Hɛrmɛsɩ: Grɛɛkɩ ñɩma agɔlɩma hɩla.. Mbʋ́ pʋyɔɔ yɔ, Pɔɔlɩ heyaɣnɩ ɛyáa tɔm. 13Ɛgɔlɩmɩyɛ nɖɩ́ payaɣ se Zeesi nɛ ɖɩ-ɖɩɣa wɛ tɛtʋ nɔɔ yɔ, ɖɩ-cɔjɔ weyi ɛkpɛyɩɣ-ɖɩ yɔ, ɛkɔnɩ naŋ abalɩñɩŋ weyi pacanɩ ɩ-yɔɔ nɛ tɩŋ hɛtʋ yɔ se ɛ nɛ ɛyáa samaɣ palaa Pɔɔlɩ nɛ Barnaabaasɩ. 14Paba nɩ ḿbʋ́ lɛ, pacɩyɩ pɔ-yɔɔ tokonaa sɔsaa nɛ pɩwɩlɩ se pɔtɔsɔɔlɩ se palaa-wɛ. Peeɖe pesewa pasʋʋ ɛyáa hɛkʋ taa nɛ pamakɩ kubusi se: 15«Taabalaa, pɩlabɩ ɛzɩma nɛ ɩlakɩ ḿbʋ́? Đɩkɛ ɛyáa ɖɔɖɔ ɛzɩ mɩ yɔ. Ɛlɛ́, ɖɩkɔm se ɖiheyi-mɩ Laŋhɛzɩyɛ Tɔm nɛ iyele agɔlɩma wena aawazɩɣ pʋyʋ yɔ, a-kpɛyʋʋ nɛ ɩpɩsɩnɩ Ɛsɔ wezuu tʋ yɔɔ. Ɛnʋ labɩnɩ ɛsɔdaa nɛ tataa nɛ teŋgu nɛ mbʋ́ pɩtɩŋa payɩ pʋwɛ kedeŋa yɔɔ cɩnɛ yɔ. 16Đooo lɛ, Ɛsɔ kaayebi ajɛya kpeekpe taa ɛyáa yem nɛ palakɩ mbʋ́ pe-liu wɛɛ yɔ. 17Ŋgʋ́, wiɖiyi eteyele ɛ-camɩyɛ lakasɩ labʋ se ɛwɩlɩ mbʋ́ ɛkɛnaa yɔ. Mbʋ́ pʋyɔɔ yɔ, ɛnʋ yekina nɛ tɛʋ nɩɣ nɛ ɩkʋŋ tɔɔnasɩ sɩ-alɩwaatʋ taa nɛ ɩtɔkɩ nɛ ɩhakɩ nɛ mɩ-taa hʋlʋmʋʋ.» 18Paayɔɔdɩ pɩtɩŋa ḿbʋ́, ɛlɛ́, pɩkazɩ ñɩɩɩ palaɣaɣ-wɛ kɩlaʋ ŋ́gʋ́.
19Pʋwayɩ Yuda ñɩma nabɛyɛ lɩnɩ Antɩyɔɔsɩ nɛ Ikoniyɔm pɛ-tɛtʋ taa nɛ powolo Listrɩ peeɖe nɛ pasazɩ ɛyáa samaɣ se ka nɛ wɛ payaɣ Pɔɔlɩ pɛɛ nɛ ɛsɩ. Pamaɣzaa se ɛsɩkɩ lɛ, potuu-i nɛ palɩzɩ nɛ tɛtʋ wayɩ. 20Ɛlɛ́, Krɩstʋ wayɩ tɩŋɩyaa wolo pekpeɣlini-i. Peeɖe ɛtɩkʋyaa nɛ ɛsʋʋ Listrɩ tɛtʋ taa. Tɛʋ fema lɛ, ɛ nɛ Barnaabaasɩ pakʋyɩ Listrɩ peeɖe nɛ powolo Dɛɛrbɩ.
Pɔɔlɩ nɛ Barnaabaasɩ papɩsɩ Antɩyɔɔsɩ, Siirii egeetiye taa
21Powoba lɛ, posusi Laŋhɛzɩyɛ Tɔm nɛ ɛyáa sakɩyɛ pɩsɩ Krɩstʋ wayɩ tɩŋɩyaa. Pʋwayɩ lɛ, pakʋyɩ papɩsɩ Listrɩ nɛ Ikoniyɔm nɛ Antɩyɔɔsɩ, Pisidii egeetiye taa. 22Patalaa lɛ, peyele pɩla peeɖe Krɩstʋ wayɩ tɩŋɩyaa hʋnʋm nɛ pa-laŋa hɛɛ. Paaheyi-wɛ se pɔ́ɖɔ́kɩ lidaʋ ŋgʋ́ pɛwɛnɩ Yesu yɔɔ yɔ nesi naalɛ kpam. Paatasɩ-wɛ heyuu se pʋwɛɛ se pɔtɔɔ kʋñɔŋ siŋŋ nɛ pʋcɔ pasʋʋ Ɛsɔ Kewiyaɣ taa.
23Paa Krɩstʋ ŋgbɛyɛ nɖɩ́ ɖɩ-taa lɛ, Pɔɔlɩ nɛ Barnaabaasɩ palɩzaɣ nabɛyɛ se pɛkɛnɩ sɔsaa. Palɩzɩɣ-wɛ ḿbʋ́ lɛ, pa nɛ wɛ pɔhɔkɩ nɔɔ nɛ pɛsɛɛ Kɩpaɣlʋ Ɛsɔ. Pʋwayɩ lɛ, paɖʋzɩ-wɛ e-nesi taa, mbʋ́ pʋyɔɔ yɔ, ɛ-yɔɔ pɛwɛnɩ lidaʋ. 24Pakʋyɩ Pisidii egeetiye taa peeɖe lɛ, powolo Pamfilii ñɩnɖɛ taa. 25Powoba lɛ, peheyi ɛyáa Ɛsɔtɔm Pɛɛrjee tɛtʋ taa, pɛtɛma lɛ, pɛɖɛɛ Atalii ñɩndʋ taa. 26Peeɖe pasʋ mɛlɛ nɛ papɩsɩ Antɩyɔɔsɩ, Siirii egeetiye taa. Peeɖe paaɖʋzɩ-wɛ Ɛsɔ nesi taa se ɛlabɩ-wɛ lootiye nɛ pala pa-tʋmɩyɛ nɖɩ́ palaba ɛzʋnɔ yɔ.
27Patalaa lɛ, pekpeɣli Krɩstʋ ŋgbɛyɛ taa ñɩma nɛ pɛkɛdɩ-wɛ mbʋ́ pɩtɩŋa Ɛsɔ tɩŋnɩ pɔ-yɔɔ nɛ ɛla yɔ nɛ ɛzɩma mbʋ́ ɛha mbá pɛtɛkɛ Yuda ñɩma yɔ waɖɛ nɛ pɛwɛnɩ lidaʋ Yesu yɔɔ yɔ. 28Pɛtɛm-wɛ kɛdʋʋ ḿbʋ́ lɛ, pa nɛ Krɩstʋ wayɩ tɩŋɩyaa pacaɣ alɩwaatʋ sakɩyɛ Antɩyɔɔsɩ peeɖe.
Trenutno odabrano:
Tʋma Labʋ 14: KABI
Istaknuto
Podijeli
Usporedi
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj