DIHA 18
18
Na wai ngerada ba hapajia-ha da ratu dàngu da tau Lewi
1I MIRI napanii-nya i Harungu, “Nyumu, da anamu dàngu da tau Lewi lupangu-ma ipàdanya na injana rukuna da nja - njalaka da matumbu daa la Maünggu, na nyuna didi-akau nyumu dàngu da anamu mapàda-nya bàdi na injana la paràma-da da ratu. 2Da angu dedimu na kabihu Lewi lupangu-ma ku-pakaria-nggaunja ba jiaha da ma-pambapangu bau pahàra-nya na wai ngeramu dàngu na wai ngerada da anamu. 3Lupangu-ma na wunda wai ngerana na kabihu Lewi hanggangu lai nyimi dàngu ka daràma-ha da wai ngerada la Maünggu, na nyuna àmbu jia lihi-danya na ngia pawotu maraku dàngu àmbu da-jonggaru-ha da banda da malanja la Rowa Matua. Jàka dapangga-ya na kalaratu yiana ka nyudakai ka nyimikai lupangu-ma imeti. 4Lupangu-ma nyuda daràma pambapa danggai nyimi dàngu ka dawunda-ha da wai ngera da ma-panuangu la mbuu ndàbana na pa-paloku daa la Maünggu. Na nyuna mbuta biana na panda wuangu wai ngera ndumana nuna, pa-hiringu-ya paràma dànggai nyimi. 5Mbulungu didi-akau nyumu, Harungu, dàngu da anamu bàdi ma-pahàrangu wai ngera la Rowa Matua dàngu la ngia pawotu maraku, ka àmbu kuhili mbeninya na banjaru Ihirailu. 6Langatàka-ma, mbàda pindi-ngguhaka da angu dedimu na kabihu Lewi welingu la honga banjaru Ihirailu, ba jiaha nyuda da pawua-nggunggau nyumu. Pa-pahinggilu-mahaka nyuda ndumanggu Nyungga, ka peku pahàra-danja da wai ngerada daa la Maünggu. 7Na nyuna didi-akau nyumu dàngu da anamu mapeku pa-pahàrangu wai ngera ratu, la mbuu ndàba paràma ma-panuangu la ngia pawotu maraku dàngu da maninja la Rowa Mahupu Matua. Nunaya na pa-hanobaku-mi, nadu ba mbàda wua-nggunyaka na mandapu ratu lai nyimi. Nimbihu-na na tau na manda ningu ngabangu lai nu pa-hukungu metiya jàka na lihinja da banda dàngu da malanja matua,” wàna.
Da kangeha ndumada ba hapajia-ha da ratu
8I MIRI napanii-nya i Harungu, “Namu-maya! Mbuu ndàbada da hunggu maraku pa-panuda-ngga Nyungga da panda tunu, ndumamu nyumu-mahaka. Nudaha da kangeha-mu da pambàda kawuku nduma lundu nu - nu. Nuda kuwua-ha lai nyumu dàngu la ana umbuku-mu. 9Welingu la hunggu maraku da marihi matua halawàla da panda tunu la pinu ngia pawotu maraku, da patiki pandàkingu ndumamu nyumu-maha: Da hunggu maraku mangejingu, da hunggu maraku jàmangu njala dàngu da hunggu maraku himbalu runggi. Mbuu ndàbada nuda hunggu maraku matua-ha ndumamu nyumu-maha dàngu ndumada da ana-mamuha. 10Nuda ma-matua-ha ndumami nyimi, jia ba tuna lupangu-ma inganja la pangia ma-matua-mbu. Mbulungu tau minia mapeku la pangaanja.
11Mbuu ndàbada hawiangu da hunggu maraku pa-panudangu wàngu da pawotu tau Ihirailu lai Nyungga, ndumamu nyumu-mbuha. Kuwua-ha lai nyumu, la anamu mini dàngu la anamu kawini. Na kalaratu yiana pawàngu lundu nu - numaya. Nimbihu-da da ihi kuru umamu da manda iraku pekuda la pangaanja.
12Kuwua-nggauha nyumu mbuu ndàbada da mahàmu halawàla welingu la kawunga ihi woka da pawotu-dangga nimbihu ndaungu da tau Ihirailu nu da mina haitungu, wai angguru dàngu uhu nggàndumu. 13Mbuu ndàbada nuda ndumamu nyumu-maha. Nimbihu-da da ihi kuru umamu da manda iraku pekuda la pangaanja.
14Mbuu ndàbada la tana Ihirailu da pambàda panuda-ngga Nyungga, ndumami nyimi-maha.
15Mbuu ndàbada da ma-kawunga dedi la tau jàka ndia la banda da pahunggu maraku-da da tau Ihirailu lai Nyungga, ndumami nyimi-maha. Na nyuna lupangu-ma ipalohu pahàla-ha da kawunga anami, dàngumbu da ana banda manda hida da ma-kawunga dedi. 16Da ana lupangu-ma palohu pahàla-ha ba hau wulada, na bila pa-kawuku ndumana nuna lima àmahu bara, pa-namatu-nya na bila pakàli wàngu la Maünggu. 17Na nyuna da hapi da mbimbi da kamàmbi ma-kawunga dedi nda peku-ana la pa-palohu pahàla-ha. Da banda nuda mbulungu ndumanggu Nyungga-maha, tàka hi lupangu wotu-maha bàdi ka kameti maraku-ha. Buriha da riada la ngia pawotu maraku, tàka da aparu-da tunuha ka hunggu maraku-ha. Na wau hiritu-na nuna na hunggu maraku naliya na etinggu. 18Na toluna ndumamu nyumu-maya, hama tuna na kakau dàngu na winju kawana-na welingu la hunggu maraku pa-panujurungu lai Nyungga.
19Ndumana la rehi lundu nu - nu, mbuu ndàbada da hunggu maraku pa-panudangu pawua-dangga Nyungga da tau Ihirailu, kuwua-nggauha nyumu dàngu da anamu mini kawini-hakai. Yiana hau pa-njanjingu manda peku la pabota-ya lai Nyungga dàngu nyumu dàngu da ana umbuku-mu,” wana.
20Nahili paniinya i Harungu i MIRI, “Nda ningua kangeha pangala-mi. La tana panjanji-nggunggai nda hakadipu tanambu pamangu-mi. Nyungga MIRI, jia-maka kangeha ndumami nyimi,” wàna.
Da kangeha ndumada da tau Lewi
21Napanii i MIRI lai Harungu, “Mbuu ndàbada da hangia la hakambulu da pahunggu maraku-dangga da tau Ihirailu, mbàda wua-nggunjaka da tau Lewi. Yiada jiaha da kangehada nyuda ndumana na ràmada la Maünggu.
22Nda peku-adapa da tau Ihirailu hawiangu palihi-nya nuna na Maü, ka àmbu da paruunya na njala dàngu na hukungu meti nduma wikida. 23Piti welingu nàhu didi-ahaka da tau Lewi da mapeku pa-tanara-ya na Maünggu dàngu da ma-hanobaku ndàbaya na paràma nuna. Na kalaratu yiana nanggàna-mbuha da ana umbuku-mu lundu nu - nu. Da tau Lewi nda ningua kangeha-da la Ihirailu, 24nadu ba mbàda wua-nggunjaka kangeha-da nyuda mbuu ndàbada da hangia la hakambulu da pahunggu maraku-dangga da tau Ihirailu, ba jiaha da pa-panuda-dangga Nyungga. Tuna nu duka hi kiri panii-nggunja da tau Lewi ba nda ningua kangeha-da la Ihirailu,” wàna.
Da hangia la hakambulu da hunggu maraku tau Lewi
25I MIRI na-paràha-nya i Muha 26pa-patàka-nya yiana na pareta la tau Lewi: Jàka ikeiha da hangia la hakambulu welingu la tau Ihirailu da pawua-na i MIRI lai nyimi kai mangunja, lupangu-ma nyimi kai wuanya i MIRI hangia la hakambulu-da ka hunggu maraku pa-panudangu wànguha. 27Na hunggu maraku pa-panudangu wàngu ba rekiya na pahama dàngu na hunggu maraku uhu nggàndumu bidi dàngu wai angguru bidi. 28Ba tuna nu na pawàngu, welingu la mbuu ndàbada da hangia la hakambulu da pakeimi welingu la banjaru Ihirailu, napa iwuangu-mbu nyimi hunggu maraku pa-panuda-minya i MIRI. Da hunggu maraku nuda da pa-panudangu wàngu lupangu-ma iwuaha lai Ratu Harungu. 29Wuangu-wa mahàmu halawàla welingu la pakeimi. 30Bai hàlaka pa-wuangu-ha da mahàmu halawàla, pekuna kai pitiha da rihida hama tuna na haàtu tau raïngu ba napiti-ha da marihi ba nahàla-ka pawotu-ha da hunggu maraku-na. 31Nuda da marihi pekuna kai nganja la nggi biaya na ngia pangaa-minja dimi dàngu kuru umami, nadu ba wunda-miha dimi nuda, ndumana na paloku-mi la Maüna i MIRI. 32Nda jia njala-ami jàka ingaanja, mili àru nyuna mbàda hunggu maraku-minjaka lai MIRI da mahàmu halawàla. Àmbi pa-iraku-ha da hunggu maraku matua tau Ihirailu bai wàngu panganya na hangia la hunggu maraku nuna ba dàngu ndedi panuda-nya i MIRI na mahàmu halawàla welingu la hunggu maraku nuna. Jàkai panggaya nuna na pareta imetima napa.
Trenutno odabrano:
DIHA 18: KAM
Istaknuto
Kopiraj
Usporedi
Podijeli
Želiš li svoje istaknute stihove spremiti na sve svoje uređaje? Prijavi se ili registriraj
@LAI 1995 Indonesian Bible Society (Lembaga Alkitab Indonesia)