Ляхнар 28
28
Мальтайиъ
1Гъирагъдихъна кудучӀвну, хатӀасуз аьгьвалат арайиз гъафиган, учуз му остров Мальта вуйиб аьгъю гъабшичуз. 2Душван агьалйири учу кьадарсуз ужуди кьабул гъапӀнийчу. Мархь дубгъну, гьавйир мичӀал хьпаз лигну, дурари, аьхю цӀа алапӀну, учуз цӀихъна дих гъапӀнийи. 3Павели саб хаб цӀирцӀар гъварч дапӀну, дурар цӀиин алахьуз хъюгъиган, цӀихьан гьебграйи битӀ дугъан хилккан ккичӀибхуру. 4Дугъан хиликк ккебхнайи битӀ дябкъну, душван агьалйири чпин арайиъ гьамци гъапнийи:
– Гьаму кас, саб шакра адарди, адми гъачӀир ву, фицики думу гьюлиъ талаф гъахьундаршра, Аллагьдин судди думу чӀивиди гъитрадар.
5Хъа Павели битӀ, чан хил дутӀубччвну, цӀигъ гъипу ва дугъаз фукӀа зиян гъабхьундайи. 6Дурар, Павелин хил аьбгъюр вая думу дишла дукӀну алдакур кӀури, ккилигурайи. Дурар Павелиз кьаназ ккилигури гъузру, хъа дугъаз фукӀара дархьиди рябкъюру. Гьадмуган дурари, чпин фикир дигиш дапӀну, думу аллагь ву пуз хъюгъру.
7Душвхьан ярхла дарди островдин гьюкумдар Публийин мулкар хьайи. Дугъу учуз чан хулаз теклиф апӀуру ва шубуд йигъан учу ужуди хялижв апӀуру. 8Публийин адаш фунин гъагъи уьзур кади ахниъ ахънади шулу. Павел дугъʼина улукьуз гъягъюру ва, ккарагну, дугъʼин чан хилар иливну, думу сагъ апӀуру. 9Мидхъан, островдиин яшамиш шулайи жара аьзарлуйирра гъюру ва Павели дурарра сагъ апӀуру. 10Мальтайин агьалйири учуз гизаф гьюрматар гъапӀнийчуз. Учу рякъюъ учӀвуз гьязур гъашиган, дурари учуз лазим вуйи гьарсабдихъди тямин гъапӀчу.
Мальтайиан Римдиз рякъ
11Шубуб вазлилан учу гьаму островдиин кьюрд адапӀурайи «Диоскурар» кӀуру Александрияйин гимийиъди гьюлиз удучӀвунча. Дидин хъюхъниин Диоскурар кӀуру кьюдюхрар вуйи идолар алийи. 12Сиракуза шагьриз гъафиган, душваъ шубуд йигъ адапӀча. 13Дилин рякъюъ учӀвну, Ригия шагьриз гъафича. Йигъ алдабхъган, кьибла микӀ хъивну кьюдпи йигъаз учу Путеола шагьриз гъафунча. 14Душваъ гъардшар гъагча. Дурарин тӀалабниинди дурарихь ургуд йигъан гъузну, хъасин Римдиз гъушча.
15Душваъ айи гъардшар, учу гъюрайиваликан деебхьну, ич улихьна, хялар дахъру шубуд хулар али Аппийин майдандиина удучӀву. Дурар гъяркъган, Павел гизаф шад гъахьи, ва дугъу Аллагьдиз чухсагъул гъапи. 16Римдиъ гъаравулди сар эскерра хъитну, Павелиз азадди яшамиш хьуз ихтияр тувнийи.
Павели Римдиъ аьгъювалар улупуб
17Шубуд йигълан Павели жугьдарин арайиъ вартӀан гьюрматлу вуйи адмийир сабишвʼина уч гъапӀнийи. Дурар вари уч гъашиган, дугъу дурариз гъапи:
– Гъардшар! Узу ихь халкьдиз вая ихь абйирин аьдатариз къаршу вуди фукӀа гъапӀундаршра, узу Ерусалимдиъ римлуйирин хилиз дустагъ дапӀнайирси тувна. 18Римлуйири узхьан силис гъадабгънийи ва, узук йикӀбаз лайикьлу вуйи саб тахсирра ктруган, дурариз узу азад апӀуз ккун гъабхьнийи. 19Жугьдари мидиз манигъвал гъапӀнийи ва гьадмуган узу Римдин паччагьдихьна гъайих пуз мажбур гъахьнийза. Хъа узу, йиз халкь мидин тахсиркар ву, кӀурадарза. 20Гьаддиз узуз, учву дяркъну, сюгьбат апӀуз дих гъапӀунза. Узу, ялгъуз Израилин гележегдихъ хъугънайивализ лигну, зунжрариъ тӀаъна.
21Дурари Павелиз кӀуру:
– Учу яв гьякьнаан Ягьудияйиан сабкьан кагъаз гъадабгъундарча ва душвʼан гъафи гъардшарира увкан саб чӀуру хабарра тувундарчуз. 22Хъа учуз, увкан уву фици фикир апӀураш гъеебхьнийиш, ккундийчуз, фицики яв аьгъюваларикан варишвариъ чӀуруди улхурайибдикан хабар вучуз.
23Дурари мидин гьякьнаан уч шлу йигъ тяйин апӀуру, ва гьадму йигъан Павел дергнайишваз хъанара артухъ жугьдар сатӀи шулу. Дугъура, гвачӀинтӀан хябяхъдиз Аллагьдин Паччагьлугъдикан ктитури ва шагьидвал апӀури, Мусайин къанундинна Пайгъамбрарин китабарин бинайиин алди Исайикан гъапидар вари гьякь вуйивал субут апӀуйи. 24Дугъу саб пай уч духьнайидар чан гафариинди умудлу апӀуйи, хъа гьатмундар хъугъдайи. 25Чиб-чпин арайиъ сабвалихъна дарфиди, дурар алдагъуз гьязур духьнайи арайиъ Павели дурариз кӀуру:
– Гирами Рюгьну ичв абйириз Ишая пайгъамбриланмина гъапи му гафар гьякь вуйиштӀан:
26«Душну гьадму халкьдиз йип:
Учву хъпехъури ва учвуз ебхьури гъашишра,
фтинкӀа гъаври ахъидарчву,
лигури, рябкъюри гъашишра,
фукӀа рябкъидарчвуз.
27Гьаз гъапиш му халкьдин аькьюл
хъунти дубхьна,
дурарин ибар кар духьна
ва улар кур духьна.
Му вари, чпин улариз дярябкъри,
ибариз деребхьри,
юкӀв гъаври адрабхъри, кӀури
ва, чпи сагъ апӀбан бадали,
Узухьна дарифри кӀури,
гьаци дапӀнайиб ву».
28Эй жугьдар! Учвуз аьгъю йибхьайки, Аллагьдин уьрхювал жугьуд дарудариз гьапӀнайиб ву, ва дурар Дугъахъ хъпехъиди! [29]#28:29 Грекарин саспи БикӀбариъ дибикӀна: «Павели гьамци гъапихъан, жугьдар, чиб-чпин арайиъ яман гьюжатар апӀури, гъушнийи».
30Павел, саб хал дибисну, чахьна гъафикьандар вари кьабул апӀури, кьюд йисан яшамиш шулу. 31Думу Аллагьдин Паччагьлугъдикан аьгъювалар улупури ва дирбашди Агъа вуйи Месигь Исайин Ужувлан хабар рабгъури гъахьну.
Trenutno odabrano:
Ляхнар 28: ТабГК
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© Институт перевода Библии, 2010, 2013, 2016, 2018, 2023