Якьубдин 1
1
Хъугъвал ва аькьюл
1Аллагьдин ва Агъа Иса Месигьдин лукӀ Якьубдихьан вари дюнʼя вуйибси дарагънайи Израилин йицӀикьюб тухмин Аллагьдин адмийириз – саламар!
2Йиз гъардшар, учвʼин гьар жюре читинвалар алахьруган, учву лап бахтлу касарси гьисаб апӀинай, 3фицики, ичв хъугъувал читинвалариантина удубчӀвруган, сабурлувал арайиз гъюруб аьгъячвуз. 4Ва гьамциб сабурлували чан ляхин кӀулиз адабгъну ккунду, гьамдиинди учву гьуркӀдар ва тамамдар шулачва, учвуъ камивал хьибдар.
5Эгер учвкан шлиз аькьюл гьубкӀрадарш, дугъу, гьяйиф ктарди багъиш апӀру ва камивалар дарагру Аллагьдикан тӀалаб апӀри ва Аллагьди дугъаз тувди. 6Хъа учву хъугъвал ади тӀалаб дапӀну ккунду, саб шак адарди, фицики, шаклу шлур, микӀру гьипнайи ва ибикьурайи гьюлин лепейиз ухшар ву. 7Мицир касди, Агъайихьан фукӀа-мукӀа шулиз кӀури, фикир дарапӀри. 8Шаклу вуйири кьюбдикан фикир апӀури шулу, думу чан ляхнариъ ижмир шулдар.
Гьякь девлетнакан
9Касибвалиъ айи гъардаш Аллагьдин улихь учв заан вуйивалиин фурслуди ккунду. 10Хъа девлетлур чан мютӀюгъвалиин фурслуди ккунду, гьаз гъапиш, думу, чӀурдин кюкюси, жвартӀ хьиди. 11Ригъ гьудубчӀвуру ва убцрушин абхъру. Убцрушнаан укӀ чубхуру, дидин кюкю алдабхьуру ва дидин уччвувал йибкӀуру. Гьамдиз ухшарди девлетлуйирра, чпин вари ляхнарра хъади, терг хьиди.
12Читинвалариъ ахърур хушбахтавар ву. Читинвалариан Аллагь ккунди удучӀвуриз, Аллагьдихьан, Чав Гаф тувнайиси, гьаргандин уьмрин таж рубкьиди. 13Читинвалариъ ахъру сарира «Му читинвалар Аллагьди гьаънайидар ву» дупну ккундар, фицики Аллагьдин писваларихъди вуйиб гьич фукӀара адар ва саризра читинвалар гьаъдар. 14Хъа гьарсар кас чан тямягьяри зигура, хъа ккаъра ва дючӀюркьну гъитра. 15Тямягьну, дишагьлийикси, гунагь кибшру ва апӀуру, хъа гунгьи, ликриин гъабшиган, аьжал хуру.
16Йиз масан гъардшар, учву учвуз кучӀлар апӀрубси мапӀанай. 17Гьарсаб ужувлаз апӀурайи ляхин ва гьубкӀну вуйи хъуркьвал заълан, Аллагьдихьан, аьршарин акв арайиз гъабхи Адашдихьан вуйиб ву. Аллагь гьаммишан сабсир ву ва гьюдюхрур дар. 18Дугъу Чан гьякь вуйи Гафналантина, Чав халкь гъапӀубдик варибдик варитӀан заан вуйидар хьпан бадали, ухькан Чаз веледар ктаъну.
Хъпехъуз ва кӀул ккивуз аьгъю йибхьай.
19Йиз масан гъардшар, гьаммишан гафар апӀузтӀан – кӀурубдихъ хъпехъуз гьяракатнаъ йихьай ва хъял кубчӀвуз гьялак махьанай, 20даршиш, инсандик хъял кайивали Аллагьдиз ккуни дугъривал хурдар. 21Гьаци вуйиган, учву апӀурайи ляхнариъ писваларихьанна гьякьсузваларихьан ярхла йихьай ва ичв кӀваъ урзурайи Аллагьдин аьгъювалар мютӀюгълуди кьабул апӀинай, фицики гьаму аьгъювалари ичв рюгьяр уьрхиди. 22Аллагьдин гаф тамам апӀинай, хъа эгер учву думу деебхьнутӀан гъибтдарш, учву учвуз кучӀлар апӀурачва. 23Эгер шли, Аллагьдин аьгъювалариъ кӀурайидар дарапӀри, деерхьнутӀан гъитрадарш, думу гюзгдиан чан маш рябкъюрайириз ухшар ву. 24Думу чаз дилигну гьудучӀвиди ва гьадму гагьди, учв фицир вуш, кӀваълан гьархди. 25Хъа, азадвал хру варитӀан заан вуйи Аллагьдин закон кӀваантӀан аьгъю апӀрур ва кӀваълан гьадрапӀри гьаддихъди чан ляхнар кӀулиз адагърур, чан ляхнариъ бахтлу хьиди. 26Эгер шли учв дугъри вуза кӀури фикир апӀураш, хъа чан мелзнан эйсивал апӀуз аьгъдарш, дугъу чав чаз кучӀлар апӀура ва дугъан дугъривал файдасуз ву. 27Аллагьдизна Аьршарин Адашдиз ккуни чиркин дару марцци дугъривал – касибвалиъ айи ачӀни хпаризна йитимариз кюмек апӀувал ва жвув гьаму дюнʼяйин чиркинвалариккан уьрхювал ву.
Trenutno odabrano:
Якьубдин 1: ТабГК
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© Институт перевода Библии, 2010, 2013, 2016, 2018, 2023