Vikolwa 16
16
1Kandi ya duka Derbe na Lustra. Na henza, ya li ho mwegidwzi mulala, wa langwa Timoteo, mwana womukali Muyuda wa suuvira; navutswa ise ya li Mugreki. 2Naye, avamitu ava li mu Lustra na Ikonio, va mu lolekidza a veye mulahi. 3Paulo yenya uyu a tsie halala naye; kandi ya mu vugula na a mu keva kigira Avayuda va li ha zana, kigira vosi va manya ise wewe ya li Mugreki. 4Lwa va vodonkana mu madala, va va ha malago ga lagwa navatumwa navakulundu ava li mu Yerusalemi, va ga gumire. 5Kunangwa mavugana ga hebwa tsingulu mu lisuuvira, ni ga dasika kazozo.
6Va vita mu kivala kya Frigia nekya Galatia kigira Roho Mutakatifu ya va gaya kwilwadza likuva mu Asia; 7kandi lwa va duka himbi Misia, va geridza kutsia Bithinia; navutswa Roho wa Yesu si a va ha munwa; 8ma va vita Misia, ni va duka Troa. 9Liloto lya duka ku Paulo ubudiku: Mundu wa Makedonia u singiye na a mu goonya, na a vola, Wambuke udze mu Makedonia u ku konye. 10Lwa ya mala kulola liloto, nonoho kwa geridza kutsia Makedonia, kigira kwa vola ligali Nyasaye a ku langa kuvilwadzira ivangeli.
11Kwa nina mu bwato mu Troa ni ku tsia bulungi kuduka Samothraki kandi mugamba kwa duka Neapoli; 12kandi ku a duka Filipi, li veye Iidala lya Makedonia, linene lyolusoma, kandi lya Varomi vadikira mu: kandi kwa menya mu lidala yili amadiku ga duki. 13Ku lidiku lyelisabato kwa vita kiribwa ku twula mu lidala kutsia ku luginga lwomugera, ha kwa vola ni hoku saala; ni kwikala ni ku volera avakali ava vugana. 14Mukali mulala wa langwa Ludia, mugulidzi we kiforosadi, welidala lya Tuatera, mundu wa sigamira Nyasaye, ya ku hulira: wo Mwami ya kunula mwoyo gwigwe kuhulira vindu vya Paulo ya vola. 15Kandi lwa ya batidzwa, halala navenyumba yeye, ya ku saala na a vola, Ni mu lola inze mbeye musuuviri ku Mwami, mwingiri mu inyumba yange mu menye. Kandi ya ku niga. 16Kandi lwa kwa tsia hokusaala, mukana mulala wa li nomwoyo gwokulagula, ya vugana na kwinye, wa letera avami veve vyambeti vinyingi ku bulaguli bwibwe. 17Naye ya londa Paulo na kwinye, na a hanzuka na a vola, Avandu yava navatumwa va Nyasaye U Veye Igulu Ligali, ava mwilwadzira inzira yobuhonnyi. 18Ya kola ndiyo madiku manyingi. Navutswa Paulo ya verera ligali, na a girunkana na a volera mwoyo yigwo, Nku laga ku lieta lya Yesu Kristo, u twule kuye. Kandi gwa twula isaa zana yeyo.
19Navutswa avami veve lwa va lola lisuuvira lyavo lyokunyola vyambeti li goti, va gumira Paulo na Sila ni va va kwesa ni va va hila mu kitu imbiri wavanene; 20kandi lwa va mala kuvahila wa vanyampara, va vola, Avandu yava ava li Avayuda, va kwononnyira lidala lyetu ligali. 21Kandi vegidza miima gyi ta li milahi kwinye ku gyi londe kandi si bu li bulahi ku kole, kwinye Avaromi. 22Kandi kiduma kya va twulira halala: kandi avanyampara va tandula tsingubo tsyavo tsi twula kuvo, ni va haana munwa va kuywe netsimpimbo. 23Kandi lwa va mala kuvakuya nobukinduki bunyingi va va vika mu inyumba yavahambe ni va volera mulindi wavahambe kuvalinda ligali. 24Naye ya hebwa munwa ndi ya va vika mu inyumba yomugati, kandi ya boha virenge vyavo mu mikatale. 25Navutswa himbi ubudiku hagati Paulo na Sila va saala ni vimba tsinyimbu tsyo kwidzominya Nyasaye, kandi avahambe va va huliridza; 26bwangu ha li nelidegera linene lyelirova nevikongo vyenyumba yavahambe vya dengeyidzwa: kandi nonoho miliango gyigulika, neminyororo gya vosi gya boholoka. 27Kandi mulindi wavahambe ya vuka mu tsindolo na a lola miliango gyenyumba yavahambe gyalami, ya somola kivavi kikye ni yenya kwiita, kigira ya ganagana avahambe viruki. 28Navutswa Psulo ya hanzuka na a vola, U tekola kindu kidamano mba, kigira kwinye ku veye hano kwosi. 29Na ye yenya tsitaya ni yingira, na a degera nobutii bunene, na a gwa hasi imbiri wa Paulo na Sila, 30na a va Ieta kyova, na a vola, Avami, ga ndukira nkole ki, nduke kuhonnywa? 31Va mu volera, U suuvire Mwami Yesu, na ive u la honnywa, ive navenyumba yoyo. 32Va mwilwadzira likuva lyo Mwami halala nnvenyumba yeye vosi. 33Ku isaa zana yobudiku ya va vugula, na a vogidza ubukinduki bwavo; kandi ya batidzwa, uyu navenyumba yeye vosi. 34Kandi ya vanegiridza kuduka mu inyumba yeye, na a vihula vyokulia, na a yanza munonono halala navenyumba yeye, kigira u mali kusuuvira Nyasaye.
35Navutswa lwa bwa kya, avanyampara va tuma avasikari, ni va vola, Mu boholole avandu yavo va tsie. 36Kandi mulindi ya volera Paulo amakuva yaga, na a vola, Avanyampara va tumi avandu mu bohololwe: kunangwa kalunu mu twule, mu tsie nemirembe. 37Navutswa Paulo ya va volera, Va mali kukukuya imbiri wavandu, ku kikiri kukalagirwa, kwinye Avaromi, kandi va ku viki mu inyumba yavahambe kandi kalunu va ku kunga makiriri? Auwa, ligali; navutswa vadze avene va ku twulidze. 38Kandi avasikari yavo va hila amakuva yaga ku vanya mpara; navo va tia lwa va hulira va veye Avaromi; 39ku, vadza ni va va goonya; kandi lwa va mala kuvatwulidza, va venya va twule mu lidala. 40Kandi va twula mu inyumba yavahambe, ni vingira inyumba ya ludia: lwa va mala kulola ava mitu, va va leminya myoyo ni va tsia.
वर्तमान में चयनित:
Vikolwa 16: MBE
हाइलाइट
शेयर
तुलना
कॉपी
Want to have your highlights saved across all your devices? Sign up or sign in
©Bible Society of Kenya, 1967
