Vikolwa 17
17
1Lwa va mala kuvita Amfipoli na Apolonia, va duka Tesalonike ha li nelisomero lya Vayuda: 2Paulo yingira kuvo, kuli miima gyigye, namasabato gavaka ya volerana navo ku mang'oda, 3ya vuula na a va mannya ga dukira Kristo a saliridzwe nokusimuguka mu vakudzi; kandi ya vola, Yesu uyu wa nzilwadza, uyu niye Kristo. 4Kandi avandi kuvo va girunkanywa myoyo, ni va hambana na Paulo na Sila kandi ku Vagreki, ava tia Nyasaye avanyingi, kandi ku vakali avanene ava suuvira, ava ta li vakekeke. 5Navutswa Avayuda va kendeha, ni va vugula avalala avadamano kuvo ava gunza mu kitu, ni va vugannya kiduma, ni va kola kivihiri mu lidala; kandi va tsia mn inyumba ya Yasoni, ni venya kuvaleta kyova kuvavika mu makono gavandu. 6Kandi lwa va vula kuvanyola, va kwesa Yasoni, navandi ku vamitu ni va va hila imbiri wavanene velidala, va kola liyoga, ni va vola, Avandu yava ava tigula lirova vadza kuduka hano kandi; 7ava Yasoni u mali kwingiridza: kandi yava vosi va hing'ana amalago ga Kaisari, ni va vola ha veye nomwami wundi, niye Yesu. 8Kandi va tihidza kiduma navanene velidala lwa va hulira vindu yivi. 9Navo lwa va mala kweganehidza Yasoni Davakye, va va leka va tsie.
10Nonoho avamitu va hila Paulo na Sila ubudiku va tsie kuduka Berea: navo lwa va mala kuduka yo vingira mu lisomero lya Vayuda. 11Yava va li kukuminywa kuvita ava Tesalonike, kigira va bugirira likuva bwangu, ni venya kazozo mu mang'oda kulola amakuva ga ve ageligali naho. 12Kigira yaga avanyingi kuvo va suuvira; kandi ku vakali avanene va Vagreki, kandi ku vasatsa ava ta li vakekeke. 13Navutswa Avayuda va Tesalonike, lwa va hulira Paulo yilwadza likuva lya Nyasaye mu Berea, va tsia yo kandi ni va vukidza ni va gema viduma. 14Hene yaho avamitu va hila Paulo kutsia kuduka ku inyanza: navutswa Sila na Timoteo va tigala yaho. 15Navutswa yavo ava hereka Paulo va mu hila kuduka Athene: kandi lwa va hebwa munwa Sila na Timoteo vadze kuye bwangu, va tsia.
16Ku, Paulo lwa ya va lirlda mu Athene, mwoyo gwigwe gwa verera kigira ya lola lidala lizula vifwananvi. 17Ku, ya hangalidzana mu lisomero na Vayuda na vandu ava tia Nyasaye, no mukitu kazozo navandu ava ya vugana navo. 18Kandi avalala ku Vaepikurio na Vasitoiko ava li vafilosofo, va mu nyola. Avalala va vola, Mudemanyi uyu yenya kuvola ki? Navandi va vola, A fwana mwilwadzi wamademone amageni: kigira ya li ni yilwadza Yesu nelisimuguka. 19Kandi va mu gumira ni va mu hila Areopago, ni va mu teva, Megidzo mahya ga ive wegidza, ku nyala kumanya kwinye? 20Kigira ive u leta mu matu getu amakuva gokugennya: kwenya kumanya kivune kyevindu yivi. 21(Kigira avandu va Athene vosi navageni ava menya yo si va kola kindu, navutswa nokuvola nokuhulira vindu vihya.) 22Kandi Paulo ya singira hagati ha Areopago, na a vola.
Mwinye vasatsa va Athene, ku vindu vyosi ndola mwinye mu veye nemiluka ligali. 23Kigira lwa nda vita, ni mbenza vindu vyemiluka gyenyu, nda nyola kandi bwali bulala bwa ng'odwa amakuva yaga, BWA NYASAYE U TA MANYWA. Inze mmu vuulira yiki kya mu kolera miluka bugira kukimanya. 24Nyasaye uyu wa lomba lirova nevindu vyosi vi veye mu, uyu, kigira a veye Mwami weligulu nelirova, si a menya mu matempeli gombakwa namakono; 25kandi si a tumekirwa namakono gavandu, kuli mudaka wekindu kali kilala, kigira niye mwene a hedzanga vosi livamwoyo nomwika, nevindu vyosi. 26Kandi ya lomba tsihiri tsyosi tsyavandu va twule ku mulala kumenya ku lirova lyosi, kandi ya haana munwa gwemihiga, na a kola tsinzako tsyevivala vyavo; 27va duke kwenya Nyasaye, ni va mwenya mbula va mu havatidze va mu nyole. Navutswa si a veye hale na kwinye kwosi: 28kigira ku uyu ku veye mwoyo, kandi ku genda, kandi ku hindira; kuli avalala ku va lomba tsinyimbu tsyenyu, va vola.
Kigira kwinye ku veye visukululwi vivye. 29Kunangwa kwinye ni ku va visukululwi vya Nyasaye, si bu li bulahi ku ganagana Nyasaye a fwana ithahabu, kinga ifetha, kinga ligina, vya kongwa nobusidza nobugeeri bwavandu. 30Tsinyinga tsyobusiru Nyasaye si ya tsi henza; navutswa kalunu u mali kulaga avandu vosi, hosi ha va veye, veganire: 31kigira u mali kulaga lidiku lyokukalagira avomkivala nobulungi, ku mundu wa ya tovola; naye ya ha vandu vosi kisuuviri kulyo kigira u mali kumusimugukidza mu vakudzi.
32Lwa va hulira lisimuguka lyavakudzi, avalala va mu henyahenya; navutswa avandi va vola, Ku la ku hulira ku yaga lidiku lindi. 33Hene yaho Paulo ya twula hagati havo na a tsia. 34Navutswa avandu valala va handa kuye ni va suuvira: na kuvo ya li mu Dionusio Muareopago nomukali wa langwa Damara, navandi halala navo.
वर्तमान में चयनित:
Vikolwa 17: MBE
हाइलाइट
शेयर
तुलना
कॉपी
Want to have your highlights saved across all your devices? Sign up or sign in
©Bible Society of Kenya, 1967
