Kwan 32
32
Nonin ma yuwok ceŋ ma Yordan
1Nonin pa Ruben kodi Gad oyido jonitie gi dhok kweth. Munyo joneno nike lowo ma Yazer kodi lowo ma Giliad oyido obedo kabedo maber ri dhok, 2joluwo gi Musa kodi Eliazar jacway ri Were i wi migam kodi jotel pa ji ka jowaco ni: 3“Ataroth, Dibon, Yazer, Nimra, Hesibon, Eliale, Sebam, Nebo kodi Beyon, 4lowo ma Rwoth omako ruwaŋ lwak pa Isiraili obedo lowo ma kwath ri dhok aka ŋecin perin jonitie gi dhok. 5K'inen watieko nwaŋo wor ruwaŋin, weyi womiy lowo me ri ŋecin perin ri lim; ikir'iwey waŋadi Yordan.”
6Musa odwoko jonono pa Ruben kodi Gad ni, “Wutmin win jolakadho lweny kareno win wibedo ka? 7Raŋo wiladwoyo cuny Joisiraili kwoŋ kadho i lowo ma Rwoth otieko miyo jo? 8#Kwan 13:17-33Bacere mewin jotimo gime munyo aoro jo wok i Kades Barineya kidho neno lowo. 9Munyo jokadho malo i milelo ma Esikol to joneno lowo, jodwoyo cuny Joisiraili kadho i lowo ma Rwoth oyido omiyo jo. 10#Kwan 14:26-35Nge pa Rwoth oliel kwoŋ jo i ndelo no aka Rwoth okwoŋere ka waco ni, 11‘Adieri ongoye jacwo ma jaoro piero kadho malo m'owok i Misir ma laneno lowo m'akwoŋere miyo ri Abraham, ri Isaka kodi ri Yakobo, kwoŋbedo jok'oluwan ma jocowere. 12Ongoye kwoŋ jo, kende nyaka Kaleb wod pa Yefune janono pa Ken kodi Yosuwa wod pa Nun, kwoŋbedo jotieko luwo Rwoth ma jocowere.’ 13Nge pa Rwoth oliel kwoŋ Isiraili, aka omiyo jo kilera i thim ma oro piero aŋwen, cuka luse je m'oyido jotimo reco ruwaŋ Rwoth jorumo. 14Onyo win pama, luse pa joreco, witieko ay i kabedo pa bacere mewin, medo nge pa Rwoth malieth kwoŋ Isiraili! 15Ka wiwire kwoŋ luwo go, go kendo lajwango jo i thim, aka lareyo woko ji me je.”
16Jobino bongi Musa aka jowaco ni, “Walageto kigo ri mwendi mawan kodi tindin ri nyithindho mawan. 17To walatiŋo gilweny to watelo yuwaŋ Joisiraili, cuka wakelo jo kama jolabed'iye. To weyi nyithindho mawan jowodoŋ i tindin m'otinda me jowobedi ma bu teko kwoŋ ji ma lowo me. 18Wakiladok pecin mawan cuka Joisiraili jotiek limo lim pajo. 19Wakilalunjo gi jo lim i thengi Yordan ma koca kodi kalo Yordan, kwoŋbedo watieko limo lim mawan yuwok ceŋ ma Yordan.”
20Musa odwoko jo ni, “Ka witimo gime adieri, ka witiŋo gilweny telo lweny ruwaŋ Rwoth, 21aka winoŋadi Yordan gi lweny ruwaŋ Rwoth, cuka go otiek riemo woko jokwor pere ruwaŋe, 22aka omaki lowo ruwaŋ Rwoth, kenyo winyalo dwoko kwoŋbedo meno witieko timo tic mewin ri Rwoth kodi Joisiraili, aka lowo me labedo lim mewin ruwaŋ Rwoth. 23To ka wikitimo gime, meno witieko timo reco kwoŋ Rwoth, aka ŋey win nike reco mewin laromo gi win. 24Geti win tindin ri nyithindho mewin, kodi kigo ri mwendi mewin, to, tim win gima witieko ciko.”
25Kenyo jonono pa Ruben kodi Gad jowaco ri Musa ni, “Ŋecin perin jolatimo paka rwoth mawan wodho or. 26Nyithindho mawan, mon mawan, mwendi mawan kodi ogwaŋe mawan je joladoŋ kenyo i tindin ma Giliad, 27to ŋecin perin jolaŋado, kisi dhano gi gilweny kadho lweny ri Rwoth, paka rwoth mawan wodho or.”
28 #
Yos 1:12-15
Ameno Musa omiyo or kwoŋ jo ri Eliazar jacway ri Were i wi migam, Yosuwa wod pa Nun kodi jotel nonin ma Isiraili je. 29Musa owaco rijo ni, “Ka jonono pa Ruben kodi Gad, kisi dhano otiŋ gilweny kadho lweny ruwaŋ Rwoth, to joŋado Yordan kanyacel gi win, to wimako lowo ma ruwaŋ win, kenyo wilamiyo jo lowo ma Giliad paka lim pajo. 30To ka jokilatiŋo gilweny ŋado gi win, jolalunjo gi win lowo ma Kanan.”
31Nyikway Gad kodi Ruben jodwoko ni, “Paka Rwoth otieko luwo ri ŋecin perin, ameno apaka walatimo. 32Walaŋado gi gilweny ruwaŋ Rwoth i lowo ma Kanan, to lim mawan ma walalunjo labedo gi wan i thenge me ma Yordan.”
33Musa omiyo jonono pa Gad kodi nono pa Ruben kodi adec nono pa Manase wod pa Yozefu, ker pa Sihon kere ma Amor kodi ker pa Og kere ma Basan, lowo kodi tindin mere, g'adec ma tindin m'othoko. 34Jonono pa Gad jogeto kendo tindin ma Dibon, Ataroth Arower, 35Atiroth Sofan, Yazer, Yogibeha, 36Beth Nimra, Beth Haran,, tindin madongo m'otinda kodi kigo ri mwendi. 37Jonono pa Ruben jogeto kendo Hesibon, Eliale, Kiriathayim, 38Nebo kodi Bal Meyon (nyingi jo me jowiro) kodi Sibima. Jomiyo tindin me nyingi jo man.
39Nyikway wod pa Manase jokadho i Giliad, jomako aka joriemo woko Joamor m'oyido jobedo kenyo. 40Musa omiyo Giliad ri Makir wod pa Manase aka go ogeto kenyo. 41Yayir nyakwar Manase okadho to mako calin mere aka omiyo jo nyingi jo man ni Hawoth Yayir. 42Noba okadho to mako Kenath kodi calin mere, aka olwoŋo gi nyingi go ni Noba.
נבחרו כעת:
Kwan 32: DHOPE
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
Dhopadhola DC Bible © Bible Society of Uganda, 2018.