Kwan 31
31
Lweny Maleŋ kwoŋ Jomidian
1Rwoth oluwo gi Musa ka waco ni: 2Cul kwor ri Joisiraili kwoŋ Jomidian, aka rumacen icoki ji kanyacel.
3Musa owaco ri ji ni, “Yer win cwo ma jolweny, ŋey jowomonji Jomidian nyalo culo kwor pa Rwoth kwoŋ Midian. 4Wilayero cwo gana acel wok i kisi nono ma Isiraili kadho lweny. 5Ameno joyero cwo gana acel wok i kis nono, aka kanyacel cwo gana apar g'ario joyikere lweny. 6Musa ooro jo lweny kanyacel gi Finehas wod pa Eliazar jacway ri Were i wi migam, g'atewe ma Ot pa Were kodi gwarin ma kudho i cinge. 7Jolwenyo gi Midian, paka Rwoth oyido owodho or ri Musa, aka joneko kisi jacwo. 8Joneko kerin ma Midian abic, Evi, Rekem, Zur, Hur kodi Reba medo i wi joman ma joneko; to joneko bende Balam wod pa Bewor g'abor. 9Joisiraili jomako mon ma Midian kodi nyithindho pajo paka jotwec, jonyaga dhok pajo je, mwendi pajo, kodi gigipiny pajo je. 10Jowaŋo woko tindin pajo je m'oyido jobed'iye kodi kambi je. 11To jotero gigipiny pajo ma jomako kanyacel gi jotwec kodi ogwaŋe je. 12Kenyo jokelo jotwec je kodi gigipiny ma jonyaga ri Musa, Eliazar jacway ri Were i wi migam kodi lwak pa Isiraili i kambi i kam'obipere ma Mowab i thengi Yordan i Yeriko.”
Jolweny jodwoko
13Musa, Eliazar jacway ri Were i wi migam kodi jotel pa lwak jowok romo gi jolweny woko ma kambi. 14Musa omako nge gi jotel pa jolweny, jomituka ma ganin kodi jomituka ma miyin m'oyido jodwoko wok i lweny. 15Musa openjo jo ni, “Wiweyo mon je doŋ ma jokwo? 16Mon me, ma Balam omiyo jo rieko, jomiyo Joisiraili timo maker kwoŋ Rwoth i wac ma mako kwoŋ Pewor, ŋey thoyamo opodho kwoŋ ji pa Rwoth. 17Onyo riameno, neki win nyithindho mayac je i dier jo kodi mon je ma jotieko nindo gi jacwo. 18To nyir mambula wey win jo makwo riwin. 19Bedi win woko ma kambi ma ndelo abirio, kisi ŋat'oneko dhano moro je kosa omako delkwoŋ gim'otho, jowolonyere kodi jotwec mewin i ndelo mar'adek kodi i ndelo mar'abirio. 20Wiripo lonyo law je, kisi gim'otim gi pien je, kisi gim'otim gi yer diel, kodi kisi gim'otim gi mbawo.”
21Eliazar jacway ri Were i wi migam owaco ri ji m'oyido jowok i lweny ni, “Me fonji ma cik ma Rwoth owodho or ri Musa kwoŋe. 22Zahabu, feza, ywel, cuma, nyweny kodi waya, 23kisi gima kinyal waŋ i mac, iripo rewo i mac aka labedo m'olony. T'iripo bende lwoko gi pi, aka kisi gima nyalo waŋ i mac, ilalwoko gi pi. 24Wiripo lwoko nangin mewin i ndelo mar'abirio, aka wilabedo m'olony, rumacen to widwoko i kambi.”
Poko gigipiny m'onyaga
25Rwoth oluwo gi Musa ka waco ni, 26In kodi Eliazar jacway ri Were i wi migam kodi jotel ma nonin wiripo kwano gigipiny m'onyaga, ji kodi ogwaŋe je. 27Pok win gigipiny kadirio, i dier ji ma jowok lweny kodi lwak je. 28Wok kwoŋ migew pa jolweny ma jowok lweny, kethi gicen misolo ri Rwoth, acel wok kwoŋ kisi gigipiny miya abic, obedi dhano, dhok, punde, rombo kosa diegi. 29Kwany kwoŋ adec pajo aka imiy Eliazar jacway ri Were i wi migam paka mic ri Rwoth. 30Kwany wok kwoŋ adec pa Joisiraili acel kwoŋ kisi piero abic, obedi ji, dhok, punde, rombo kosa diegi; wok kwoŋ ogwaŋe je aka imiy Jolevi ma jokuro Wema pa Rwoth.
31Kenyo Musa kodi Eliazar jacway ri Were i wi migam jotimo paka Rwoth owodho or ri Musa.
32Gigipiny m'odoŋ wok kwoŋ gigipiny ma jolweny jonyaga oyido romo rombo 675,000 33dhok 72,000 34punde 61,000 35kodi nyir ma fodi jokuya cwo 32,000. 36Migew pa jolweny m'oyido jowok i lweny obedo, rombo kodi diegi 337,500 37aka misolo pa Rwoth oyido obedo rombo kodi diegi 675. 38Dhok oyido obedo 36,000 aka misolo pa Rwoth oyido obedo dhok piero abirio g'ario. 39Punde oyido obedo 30,500 aka misolo pa Rwoth oyido obedo punde piero aucel g'acel. 40Ji oyido obedo 16,000 aka misolo pa Rwoth oyido obedo piero adek g'acel. 41Ameno omiyo Eliazar jacway ri Were i wi migam misolo paka mic ri Rwoth cungo kwoŋ or ma Rwoth owodho ri Musa.
42Migew pa ji ma Musa opoko kwoŋ migew pa jolweny oyido obedo, 43rombo kodi diegi 337,500 44dhok 36,000 45punde 30,500 46kodi ji 16,000. 47Wok kwoŋ migew pa Joisiraili Musa okwanyo acel kwoŋ kisi piero abic, ma ji kodi ogwaŋe, aka omiyo Jolevi m'oyido jokuro Wema pa Rwoth, cungo kwoŋ or ma Rwoth owodho ri Musa.
48Kenyo jotel jolweny m'oyido jotelo jolweny, jomituka ma ganin kodi jomituka ma miyin, jobino bongi Musa, 49aka jowaco rigo ni, “Watieko kwano jolweny je m'oyido watelo, aka ongoye kada ŋat'acel kwoŋ wan m'ongoye. 50Watieko kelo mic pa Rwoth ma kisi dhano kwoŋ wan onwaŋo, gigipiny ma zahabu, pogo kodi atege, petin, milomin kodi tikin, paka mic ma cul mawan ruwaŋ Rwoth.” 51Musa kodi Eliazar jojolo zahabu wok bongi jo, je i cal ma gigipiny m'ocwey. 52Zahabu je ma jomiyo paka mic ri Rwoth, wok bongi jomituka ma ganin kodi jomituka ma miyin oyido romo kilo 200. 53Jolweny wegi oyido jotieko kwanyo gigipiny ma jonyaga. 54Musa kodi Eliazar jacway ri Were i wi migam jojolo zahabu wok bongi jomituka ma ganin kodi jomituka ma miyin, aka jokelo i Wema ma Romo paka rapoy ri Joisiraili ruwaŋ Rwoth.
נבחרו כעת:
Kwan 31: DHOPE
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
Dhopadhola DC Bible © Bible Society of Uganda, 2018.