Matayo 19
19
Makani aakuleka banakazi
(Marko 10:1-12)
1 #
Mk 10:1-12
#
Mt 7:28; 11:1; 13:53; 26:1 Lino Jesu naakamana kwaamba obo, wakazwa ku-Galilaya, waya kucisi ceengelede caku-Judaya mutala lya-Jordano. 2Nkabela kwakamutobela makamu makamu aabantu, lino wakabaponya nkukonya.
3 #
Mt 5:31,32 Mpawo kwakamusikila ba-Farisi, bamusunka, baamba bati, Sa kuliluleme kuti muntu aleke mukakwe nkaambo kamakani oonse? 4#Matl 1:27; 5:2Nkabela wakavuwa, wakati, Sa tamubalide kuti oyo iwakabalenga kuzwa kumatalikilo wakabacita baalumi abanakazi? 5#Matl 2:24; Ef 5:31Alimwi wakaamba kuti, Nkaambo kaako mwaalumi asie wisi abanyina, akakatile mukakwe, kuti aba bobile babe nyama yomwe. 6#1 Kor 7:10,11Lino tabacili bobile pe, baba nyama yomwe. Nkaambo kaako, abo mbaakakakatizya Leza muntu atabapambukanyi. 7#Dt 24:1-4; Mt 5:31Bamwaambila bati, Pele nkaambonzi Musa wakalailila kuti amupe lugwalo lwacilekanino, elyo amuleke? 8Wabaambila wati, Nkaambo kabuyumu bwamyoyo yanu ncaakamuzuminina Musa kuleka banakazi banu. Nekubaboobo kuzwa kumatalikilo teekwakali boobo. 9#Mt 5:32; 1 Kor 7:10-11; Lk 16:18Ndamwaambila kuti umwi aumwi uuleka mukakwe akukwata umbi, nkutaamba nkaambo kakuvuula luzutu, waba sibwaamu. Nkabela oyo uukwata mwanakazi uwakalekwa waba sibwaamu. 10Basikwiiya bamwaambila bati, Kuti makani aamwaalumi amukakwe ali boobo tacili cibotu kukwata. 11#1 Kor 7:7,17Nkabela wakabaambila wati, Teensi bantu boonse bakonzya kutambula inkani eyi, pele abo bapedwe. 12Nkaambo nkubali bazibe bamwi ibakazyedwe obo kuzwa mwida lyamanyina, alimwi nkubali bazibe bamwi ibakacitwa obo kubantu, alimwi nkubali bazibe bamwi ibakalicita obo beni nkaambo ka-Bwami bwakujulu. Oyo uukonzya kutambula atambule.
Jesu mbwaakalongezya twana
(Marko 10:13-16; Luka 18:15-17)
13 #
Mk 10:13-16; Lk 18:15-17 Lino kwakaletwa kulinguwe twana, kuti atwaampe amaanza aakwe akukomba. Nkabela basikwiiya bakabakalalila. 14#Mt 18:2,3Pele Jesu wakaamba wati, Amuzumizye twana kuti tuboole kulindime. Mutatukasyi pe, nkaambo Bwami bwakujulu mbubwabo bali boobo. 15Lino naakatwaampa amaanza aakwe wakatozya kumbi.
Mukubusi muvubi
(Marko 10:17-31; Luka 18:18-30)
16 #
Mk 10:17-31; Lk 18:18-30 Lino mpawo kwakamusikila umwi, wakati, Mufundisi, ncintunzi cibotu ncinti cite kuti mbe abuumi butamani? 17#Lk 10:26-28Wakamwaambila wati, Ino nkaambonzi wandibuzya acibotu? nkwali omwe mubotu. Pele kuti koyanda kunjila mubuumi, tobela milazyo. 18#Kul 20:13-16; Dt 5:17-20Wamwaambila wati, Milazyonzi? Nkabela Jesu wakaamba wati, Utajayi, Utaciti bumambi, Utabbi, Utalengeleli umwi cakubeja, 19#Kul 20:12; Dt 5:16; Lev 19:18Lemya uso abanyoko, nkabela, Yanda mweenzinyoko mbuli mboliyanda omwini. 20Lino oyo mukubusi wamwaambila wati, Eyi yoonse ndaijatisya. Ino ncinzi ncincibula? 21#Mt 6:20; Lk 12:33Jesu wakamwaambila wati, Kuti koyanda kulondoka, koya ukauzye imbono zyako, ukaabile bacete, nkabela uzoojana buvubi kujulu, lino uboole kuzootobela ndime. 22#Int 62:10Nkabela mukubusi naakamvwa obo, wakainka cakuusa, nkaambo kakuti kajisi imbono zinji.
23Lino Jesu wakaambila basikwiiya bakwe wati, Ncobeni ndamwaambila kuti kumuvubi nkuyumu kunjila mu-Bwami bwakujulu. 24Alimwi ndamwaambila kuti, Nkutete kunkamele kuti iinde muliso lyansunda kwiinda kuti muvubi anjile mu-Bwami bwa-Leza. 25Nkabela basikwiiya nibakaswiililila obo bakagamba loko, bakati, Ma! ino nguni uukonzya kufutuka. 26#Matl 18:14; Job 42:2; Zek 8:6Lino Jesu wakabacebuka, wabaambila wati, Kubantu tacikonzeki, nekubaboobo zintu zyoonse zilakonzeka kuli-Leza. 27Mpawo Petro wakavuwa, wamwaambila wati, Langa! iswe tulisiide zintu zyoonse kuzootobela nduwe. Ino tuyoopegwanzi? 28#Mt 25:31; Lk 22:30; Dan 7:9,10Nkabela Jesu wakabaambila wati, Ncobeni ndamwaambila kuti inywe mwakanditobela, kumacitulwido naazookala Mwana a-Muntu acuuno cabulemu bwakwe, anywebo muzookala azyuuno zili ikumi azibili, mukabeteke misyobo iili ikumi aibili yaba-Israyeli. 29#Heb 10:34Alimwi umwi aumwi uusiide maanda nanka babunyina nanka bacizi nanka wisi nanka banyina nanka bana nanka myuunda nkaambo kazina lyangu uzootambula kwiinda mwaanda nkabela uzookona buumi butamani, 30#Mt 20:16; Lk 13:30Pele bataanzi banji bazooba bamusule, abalo bamusule bazooba bataanzi.
Sélection en cours:
Matayo 19: Ibbaib63
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
The Bible in Tonga (Zambia) © United Bible Societies, 1963.