Levitiko 22
22
Milao aimwi yabapaizi
1Lino Jehova wakaambila Musa kuti, 2#My 6:3; 15:31; Kul 13:12; 28:38; My 18:32; Dt 15:19Ambila Aroni abana bakwe kuti balipambule azintu zisalala zyabana ba-Israyeli nzibandisalazizya, kuti batasofwaazyi izina lyangu lisalalisya, Ndime Jehova. 3#Lev 7:20Kobaambila kuti, Kufumbwa muntu walunyungu lwanu mumazyalani aanu oonse uuswena kufwaafwi kuzintu zisalala zyabana ba-Israyeli nzibasalazizya Jehova, nacisofweede, oyo muntu ulatandwa kubusyu bwangu. Ndime Jehova. 4#Lev 15:2,13; My 19:11,22Kufumbwa muntu akati kabana ba-Aroni uuli acinsenda na lusenso teelede kulya zintu zisalalisya mane akasalale. Alimwi kufumbwa uuampa cintu cisofweede nkaambo kamufu nanka mwaalumi uusofweede bwaalumi bwakwe, 5#Lev 11:24; 15:7,19na muntu uuampa ciyavula ansi cikonzya kusofwaazya nanka muntu uukonzya kumusofwaazya abusofwi buli buti abuti— 6#Heb 10:22muntu uuampa cintu cili boobo ulasofwaala mane kusikila kumabbililo aazuba, alimwi teelede kulya zintu zisalalisya cita sansi asambe amubili. 7#My 18:11Lino izuba lyabbila buyo ulasalala; musule lyaboobo ulakonzya kulya zintu zisalalisya, nkaambo nzezilyo zyakwe. 8#Kul 22:31; Lev 17:15; Ezk 44:31Munyama uulifwida nanka uulumwa, teelede kulya nyama yakwe pe, kuti atalisofwaazyi. Ndime Jehova. 9#Kul 28:43; My 18:22Babambe lubeta lwangu, kuti batajani kaambo, batafwi ciindi cakulisofwaazya. Ndime Jehova uubasalazya.
10 #
Kul 29:33; My 3:10; 1 Sam 21:6 Bazwakule tabeelede kulya zintu zisalalisya. Mweenzu uuswaya kumupaizi, nanka similimo uuvola mali, boonse tabeelede kulya zintu zisalalisya. 11Pele na mupaizi waula muntu amali aakwe, oyo muntu alye. Abaabo ibazyalwa muŋanda yakwe, abo balalya cilyo cakwe. 12Na mwana musimbi wamupaizi wakwatwa kumuzwakule, teelede kulya zilyo zyacipaizyo cazintu zisalalisya. 13#Matl 38:11; My 18:11Pele na oyo mwana musimbi wamupaizi wafwidwa mulumi na kulekwa, nkabela taakwe bana, alimwi waboola kuŋanda yawisi mbubonya mbuli mumazuba aabwanike bwakwe, alye zilyo, zyawisi. Pele kutabi muzwakule uuzilya pe. 14#Lev 5:15,16Na muntu walya cintu cisalalisya mukutaziba, uleelede kuyungizya cipanzi casanu akuboozezya mupaizi eco cintu cisalalisya. 15Batasofwaazyi zintu zisalalisya zyabana ba-Israyeli nzebaletela Jehova, 16kuti batajani mulandu ciindi cakulya zintu zisalalisya, nkaambo ndime Jehova uubasalazya.
Milao aimwi yazipaizyo
17Lino Jehova wakaambila Musa kuti, 18#My 15:14Ambila Aroni abana bakwe abana boonse ba-Israyeli kuti, Kufumbwa muntu waluzubo lwa-Israyeli, na wabeenzu bakalakala mucisi ca-Israyeli, uuleta cipaizyo cakwe, neciba cipaizyo cakukonkezya neciba cakupa buyo, zyoonse nzebaletela Jehova kukumutentela, 19na muyanda kutambulika, cibe mucende uutakwe kampenda akati kaŋombe nanka imbelele nanka impongo. 20#Dt 17:1; 15:21; Mal 1:8,14; Ef 5:27; Heb 9:14; 1 Pet 1:19Cintu cijisi kampenda, mutacipaizyi pe, nkaambo tacitambuliki. 21#My 15:3,8; Dt 23:21; Int 61:8; 65:1; Muk 5:4,5Amuntu uutuulila Jehova cipaizyo cakutontozya, neciba cakukonkezya neciba cakupa buyo, munyama ngwaleta, niiba iŋombe niiba imbelele, uleelede kululama kuti atambulike; atabi akampenda nekaba komwe. 22Moofu na uutyokede na mulema na uuli azilonda na sicibulu na sibwele, abo boonse toelede kubapaizizya Jehova nekuba kubatentela Jehova acipaililo. 23#Lev 21:18Musune na kabelele uulampya cizo cimwi na uucesya cizo cimwi ulakonzya kuba cipaizyo cakupa buyo, pele tatambuliki mbuli cipaizyo cacikonsyo. 24Munyama uuli amacende aapwayikide na aapasukide na aalebukide nanka uuzibidwe tamweelede kumutuulila Jehova na kumupaizya mucisi canu. 25#My 15:15; Mal 1:14Abanyama bali boobo baulidwe kumweenzu, abalo tamweelede kubaleta mbuli zilyo zyaLeza wanu, Babija, balijisi kampenda, aboobo tabatambuliki.
26Lino Jehova wakaambila Musa kuti, 27#Kul 22:30Iŋombe na imbelele na impongo niizyalwa, ileelede kukala kulibanyina mazuba aali musanu aabili; lino kuzwa kubuzuba bwamusanu aatatu ilatambulika mbuli cipaizyo cakutentela Jehova. 28#Dt 22:6Iŋombe na imbelele impwizi, mutaijayi abana bayo boonse mubuzuba bomwe. 29#Int 107:22; 116:17; Am 4:5Alimwi na mwapaizizya Jehova cipaizyo cakulumba, amupaizye kabotu kuti mutambulike. 30Ciligwe mubuzuba bomwe; citasyaali mane kubucedo pe, Ndime Jehova.
31 #
Lev 19:37; My 15:40; Dt 4:40 Amubambe milao yangu akwiicita, Ndime Jehova. 32#Is 6:3; Mt 6:9; Lk 11:2; Joh 12:28Mutasofwaazyi izina lyangu lisalalisya. Ndemekwe akati kabana ba-Israyeli, Ndime Jehova uumusalazya, 33#Kul 6:7iwakamupozya munyika ya-Egepita, kuti mbe Leza wanu, Ndime Jehova.
Sélection en cours:
Levitiko 22: Ibbaib63
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
The Bible in Tonga (Zambia) © United Bible Societies, 1963.