Malakai 3
3
Epeɗiaknu deɗ uɗikku
1Yawe Nukka Ɠagattag Oh Ele Nug atte. “Antte! Da heppi, dahil nai awa ukkak danab laa nug ukka, dahil ib da nool awa bappaidkku.
Nug anam heeb amu, da Naɗi, ag da aniɗkkulagnu mattiɗtteb amu, da pahanab da laulppa uɗikkul.
Ao da, da am nug tituana nai qakkak nainu Okkai daattem, ag dahil uɗiaknu oolag huana hette ele amu, antteg! Da uɗikkul.” Yawe Nukka Ɠagattag Oh Ele Nug anam awa atte.
2Nug anam uɗikku, amge haen nug uɗieb amu, aun nug deɗ amuppa ɠagattag daakkunu elele?
Ao, haen Nug miag atieb amu, aun nug ena hibaitta daakku?
Aɗinu?
Nug silwa, gol keeke babaitta epeɗia awak uɗat hak danab nug aab gakkaɗaknab, amuppa he, dubuttid laa ii daatte, Nug aab amubia daakku.
O iitta, Nug sop ɠagattag, dubuttid ihaeg na gotte, Nug amubia daakku.
3Laa nug silwa babaitta epeɗia awak uɗat hette, Nug amubia hekku.
Ao, Nug heeb, laa ag gol, silwa ele babaitta epeɗia awak uɗat hetteb, amubia Nug heeb, Lewi buɗub ag oppiak ele daaglag.
Nug anam heeb, ag genab tutukku hak danab Yawe eppegppa daan, ag doɗ manadna Yawe mettaglag. 4Nug Juda danab ah, laala Jerusalemnu, laa am Juda wanppa laih laihnu amu, Nug heeb, ag oppia mettak daaglag; amu Yawe Nug ahilag mana mettaknu am ena, elele dookku. Anukka, maɗ kuɗum ukkom, Nug ahilag mana mettaknu anam doyom, amubia Nug mana mettak ahilagnu ena, elele dookku. 5Amu Yawe Nukka Ɠagattag Oh Ele Nug atte. “Haen amuppa da ag hettoɗiakppa maadkkul. Da danab ag onig awak heppig, danab wau uuitta ah laa ele oipiɗ, laa hambuppunna, nai hambuppuaknu, da dahil nai ɠagattag qein, nai amuam genab attem, appig ele amu, da ahilag kobol nau amunu paha mattien, naippa yaaladkkulnu daakkul. Laa ag ahilkad uɗat nid daden elele ii madappig, laa ag ah qab, gamulkad mauhppig, amu nid anilkad mamelkad mauhppig ele eheɗ hadappig, amu laa ag wan laihnu danab ag uɗin, ag oolagppa daaegeg, ag ahilagnu nai doya mala hettoɗia epeɗia elele mettak kobol ii dim lamidppig amu, da ahilag kobol nau amunu paha mattien, naippa yaaladkkulnu daakkul. Danab ah nau amu hetteb ele amu, ag dahilnu ebehilag oh bodoetta le ii mette amunu, da anam hekkul.” Yawe Nukka Ɠagattag Oh Ele Nug anam atte.
Kayaknu keeke yab awak
6Yawe atte. “Da am Yawe, da baoliak ii hettem, diig amunu Jakop buɗub, ag nauhna, iittanab ii meppig. 7Am ag mamelkad aɗi ag dahil ɗo dimettan, dim ii lamidppig, ag ele anam hetteb. Gemu ag dahilppa eɗun uɗippeg, da ag ahilagppa eɗue wakkul.” Yawe Nukka Ɠagattag Oh Ele Nug anam atte. Nug anam atte, amge ag Nug oɗ medatteb. “Ig attem heta, nahip-ppa eɗut wakkunig?” aon atteb. 8Amu Kayak Nug atte. “Laa nug da, Kayak, nug dahil keeke yab aokku am enate? Amuam ena iitta, amge ag dahil keeke yab heppig,” awa atte. Nug anam atte, amge ag oɗ mena atteb. “Ig kobol aɗippa nahip keeke yab aomut?” aon oɗmak hetteb. Ag anam aeg, Kayak Nug ag oɗelagppa awa atte. “Ag keeke obatak eblaih tanig ele ooppanu obatak laippu da Yawe, da ii meɗappig; aria, ag doɗ laa manan da meɗaglagnu daatteb amu, ag da amu meɗalob, amge ag anam ii heppig. 9Israel danab ah oh ag, ag dahil keeke yab heegeg uɗie, gemu ele hetteb amunu, ag eheɗ laa awaknu anak waappa daatteb. 10Amu ee elele da laulppa daakkunu amu, Israel danab ah ag, ag keeke obatak eblaih tanig ele ooppanu obatak laippu amu oh aon, da laulnu ee bakkalenu maknu oo, ag oo amuppa keeke amu oh meig! Ag ma anttak meɗan, anam hekkulag dayeb amu, da hab aabppan itittak ena naɗi madakkul. Da huanaknab madappi, meppeg ambeeb, ag dabmettaglagnu aben elele iitta daakku! Ag anam hena anitteg! Da genab meu heppi beeb anidkkulag!” Yawe Nukka Ɠagattag Oh Ele Nug anam atte. 11Amu Yawe Nukka Ɠagattag Oh Ele Nug ele atte. “Ag da amibia hekkulag dayeb amu, oɗe nau, gawat nau ele, da heppi, ag ahilag dadppa ii noppeg, ag ee kuɗum ele daaglag. Da heppi, muɗi grep ii qaɗaiettamna; ag meu okkulag. 12Wan ahilag am geha enanagnab daakku amunu, wanppan wan ohnu danab ah ag da ag itadmi akkulag.” Yawe Nukka Ɠagattag Oh Ele Nug anam atte.
13Yawe atte. “Ag nai nau mattin yaaiɗtteb,” awa atte. Nug anam atte, amge ag Nug amegppa atteb. “Ig aɗi nai nau mattit yaaidttem?” aon atteb. 14Ag anam aeg, Yawe Nug ag oɗelagppa awa atte. “Ag inam appig. Ig Kayak waappa daata, Nug oɗe dim lamidkkunig amu, ig meu ena laa ii anidmata. Aɗinu? Ig nuhig ɗo dim lamidmut amu, amuppa ig aɗi keeke ena aomut? O laa amu, ig Yawe Nukka Ɠagattag Oh Ele noobppa danab nug hipunin qa, ooppa guittak okkai amunu doya, lamen heɗiag ele takka, Yawe noobppa anam oitte bia oimut amu, amuppa ig aɗi keeke ena aomut? 15Anam amunu, ig inam attem. Beɗuppa tak danab ag itittak ena aon oitteb. Laa ag eheɗ hetteb, ag en okkai aotteb, am laa ag Kayak Nug ahilagnu eheɗ hekkunu, Nug amegppa atteb ele amu, ag uug laa ii anidtteb amunu, ig anam attem. Ag dahilnu anam atteb.” Yawe Nug anam atte.
Yawenu oo gai-iitta doya oo metta ehanittaknu kobol dim lamidkku
16Amu laa ag Yawenu anam eheɗ mattin appig, amge laa ag genab Yawenu ebehilag oh bodoetta le mette ele, ag akka akka ⌊Yawenu⌋ mattiak ⌊tutukku⌋ heeg, Yawe Nug ag keeke madippig amu doyom. Nug doya he, laa Nug noobppa daya, laa amu onilag buk itoɗiakppa daakkunu yom. Amuam laa ag Yawenu ebehilag oh bodoetta le mette, ag Nug binag metteb ele, nug ag onilag buk itoɗiak amuppa yom. 17Amu Yawe Nukka Ɠagattag Oh ele Nug atte. “Deɗ adekkuppa da dahil keeke enanag oh qagmaadkkul amu, deɗ amuppa danab ah amu ag dahiladnab daaglag. Nid mameg nug nid nuhig dabmetta ehanidtte amu, uug beebeb, mameg nug nid amunu oo bodoetta le mak doyaya, uug bette ele amu, mameg nug nid amuppa bemanu wagai mette, amubia da danab ah amu dilagnu oo bodoetta le mak doyeye, uug ahilagppa bemanu aib akkul.
18Anam aakku beeb, ag baula aɗi keeke laa genab tutukku hak danab dilagppa bette, amu aɗi keeke, nau hak danab ele dilagppa bette, keeke amuam piɗe piɗe, ag amu anidkkulag.
Ao, ag baula aɗi keeke laa danab ag Kayak waappa daan, Nug oɗe dim lamidtteb dilagppa bette, amu aɗi keeke danab ag Kayak waappa ii daan, Nug oɗe dim ii lamidtteb dilagppa bette, keeke amuam piɗe piɗe, ag amu anidkkulag,” awa atte.
Sélection en cours:
Malakai 3: NB
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2022, Wycliffe Bible Translators, Inc. All rights reserved.