Oosana 3
3
Faíqi anaasee Anutuna ufa rukiqoo ufafa.
1Karaambaiqa Anutufa aiqama aandauqakina auquqoona qambaanaindari sakani mifa nikaru qira ufa akoofasa marinau. Mifa anaasee iramirinoo qinau. Kuqaa fee Anutufa saqariuqaki aiqama qaoo qinoo fee sia naaqee qinoo fee.
2Mi anaaseefa minara iriseenoo qimaminau. Eeoo aiqama maa afuqanakinaa saqari naaqee qifaqa naidaqa. 3Kadiqa qambaanai moodaa saqariara sia naaqee sia auqaaqee qifaqa sia naidaqa. Maasa namaseeqa kuquanauranoo.
4Sakani mina ufa iriseenoo anaasee akaru qinoo qinau. Namasee sia kuqinnara unnaqidanoo, anee sia kuqinnaranoo. 5Anutufa minara iridanoo qaoo qinoo. Innee mi saqari aqamana namasee Anutufara foora maridaqa manda ainainara faqa amiqira ainainara faqa irifoora.
6Anaasee sakani ufa iriseenoo mi saqarina afu qafamasoofanoo amiqirafa marufanoo aqama faqa qafoofanoo idaaqirafa marufanoo amiqira ainainara iriranara faqa manda ainainara iriranara faqa irufanoo amiqufanoo mi saqari aqamana diqiseenoo neenoo narí afaaqi faqa amufanoo nanau. 7Miqanda namasoofanoo mikari miqanda nifusaa irirafa kambiqoofaqa nári nifaaqa qafamasee kaqisamu maridee qimaseeqa nisauruseeqa saqari amanee didiqi amanee fooqaana qumaree akunuseeqa nári nifaaqasaa ititaqau.
8Mi faasaanna eenaanianna asooaa asooaa imarufanoo Karaambaiqa Anutufa kadidai nimarufaqa faiqí faqa anaasee faqa iriqaqara saqariuqaki nisaurusee kukeeqaqau. 9Karaambaiqa Anutufa faiqí aaramasee anee yaifee qufanoo mifa qinau.
10Anee kadidaki nuanaqa iriseeqa qinee kaqisamu maridaqa rufiaseeqa saqariuqaki kukeeqaidaqa. 11Miqi qufanoo Anutufa qinau, yafee ani kaqisamu mariannanara qimaminoo fee. Anee saqari aqama qinee qaoo qunnana neenanee. 12Faiqí iriseenoo narí qimaminoo qinau. Maa anaaseefa qini faqa marifa anee qimunafa mifa qimifaqa neeqa. 13Miqi qufanoo karaambaiqa Anutufa mi anaaseena iramirinoo qinau. Anee nanaree maa oosanna mareenanee. Mi anaaseefa iriseenoo qinau. Sakani fannoo anireenoo qini qikaru qifaqa neeqa.
Anutufa manda afaaqooqa faiqí faqa anaasee faqa sakani faqa niminau.
14Karaambaiqa Anutufa mina iriseenoo quandafinoo mi sakanina manda afaaqooqa qimamaqeenoo qinau.
Anee maa anaaseena akaru qiannanara mina akiiqara aiqama aandauqakiqari anee kai maa manda afaaqooqana mareennaranoo.
Anee maqamau amuaqundari nidana kookoomma nananua.
15Qinee qianaqa maa anaaseefa faqa anee faqa nariara nariara fidiaqaa ifaranoo.
Inniqara faiqinamu naaruara namuqaa marifaranoo.
Mi anaaseena asumu kiqari moodaa fannoo ani akiiqa radamuannoo. Anee mina asumu kinaana aiku ataa ukaqa aminnaranoo.
16Anutufa maaqi qimasee anaasee afaaqooqa qinoo qinau.
Anee amuaquqa faqa marinaqa umaara firaanaikamma amaqaanaura.
Miqimmaseeqa faiqi maqaraqoo faqa aupurarana amianaura. Ani aundura fannoo aneenna afaaqiara rida marinnaranoo.
Ani afaaqi fannoo ani uri aaqararafa marinana anee mina ureeqarafa marinnaranoo.
17Miqi qimaseenoo Anutufa quandafinoo faiqi afaaqooqa qinoo qinau.
Anee aneenna anaaqa ufa iriseena qinee qaoo qunna saqarina qaqama naananoo.
Minara maa maqana aqurarasaanana anee kadaapi ridana arirana rakeeidana maa maqanaki ummaqusee naida maria.
18Nimmuru faqa amuka faqaa ainaina faqa maqakiqari kambiqaannoo. Anee kaasau andanda neennaranoo.
19Anee tooqaamu arimarinana kadaapirumasaidana maa maqanasaa narana kambiqasaidana nana fifiinana kuqinana maqaki ani auquafannanaki finnaranoo.
Ani maqannai auquqaafanafa marianafa mariananoo. Anee maqa mariananoo kaifaa maqaikamma finnaranoo.
20Faiqí fannoo narí aanaaqara maqasaa qaraa fasiqa anaasee ninoo fee qimaseenoo auqu Eewanee qinau. (Mi auquna oosana aiqama faiqí faiqi ninoo fee qidanoo.)
21Karaambaiqa Anutufa aandau apata qumareenoo minannai qamunnara foora auqeeqeennoo Adamana faqa narí anaaqa Eewana faqa niminau.
Anutufa Adamasa Eewasa kadidakiqari niqiqanau.
22Miqimmaseenoo Karaambaiqa Anutufa qinau. Maqee faiqí faiqi maaqanda maasara foora maridaqa aaqara oosanara faqa andeeqara oosanara faqa iridaqa. Maasa sia miqandara qianaqa naaru marirana nimimari saqari aqamana diqisee neefaranoo. Diqisee namaseeqa naaruara marifoora. 23Karaambaiqa Anutufa minara iriseenoo Eedeena kadidakinaana doo miqanda nifaqaseenoo qinau. Inneeqara inni auquafanna maqanasaa maridaqa maqa auqamasaidaqa narana paquriaqa. 24Anutufa Eedeenna kadidakiqari Adamasa Eewasa niqiqoofaqa fufanoo suani oosana qaannai kadida atinni naaru marira saqari fainnai fimaru aannanasaa angiroouqa quqasoofaqa ida auru arira paipana uaqeeidaqa faiqí minni fifoora ruki tataaka imariqau.
Sélection en cours:
Oosana 3: bjr
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2017 Wycliffe Bible Translators, Inc. All rights reserved.