Oosana 2
2
1Miqimmaseenoo Anutufa aiqama innaaruna faqa maqa faqa auqu taikanau.
2Dinni taikasee dinni oonu qaaraqanda marasee 7 faasaana Anutufa narí ainainirana taikanau. 3Dinni taikasee dinni oonu qaaraqanda 7 faasaanara Anutufa afaaqooqa qimasee, aaduma naaquqara faasaanee qinau. Narí kadaapirirana mi faasaanna taikoonara mi faasaannara naaquqara faasaanee qimasee idooanau.
Adamafa faqa Eewafa faqa.
4Miqimmaseenoo Anutufa innaaruna faqa maqa faqa auqinau. 5Indaaru karaambaiqa Anutufa maa maqana faqa miri innaaruna faqa auqu aukuanna aaku sia maqasaa quqoonara oosana oosana andanda qaqama sia kambiqanau. Faiqí maqa apaurirafa faqa sia marinau. 6Mikamuqoo nammari fannoo maqakiqari urureenoo aiqama maqa maaqa uqeena amaqanau.
Eedeena saqama ufa.
7Mikari karaambaiqa Anutufa maqa qumareenoo faiqí minannoo auqinau. Auquseenoo marirana nimi maru aidoona aikaamarai fuaqasoofanoo mi fasiqafa kasirana maranau. 8Mi fasannai Anutufa suani afu oosanai Eedeenna maqa maaqaki kadiqa firaana auquseenoo narí auquqoo fasiqana minaki quqanau. 9Anutufa oosana oosana amiqira saqariara qufanoo minaki kambiqafufaqa amiqira aqama iraqau. Kadiqa qambaanai saqari qaaraqanda marinau. Moo saqari fannoo marirana nimi maru saqarifa marinau. Kafaa moo saqari fannoo mandainainara faqa amiqira ainainara faqa irimaria iriranna nimimarufa marinau.
10Nammari moo fannoo Eedeena maqa maaqakiqari qumureenoo kadiqa qambaana maqa uqeena uqeena ianifeera qumiqareenoo qaara faqa qaara faqaki raina fufanoo ooqufinau. 11Moo amara auqu Pisoona nammari fee qiqau. Mifa Qafiraa maqa maaqa atindannai ooqu finau. 12Miqoo koora amiqirafa maridanoo, amiqira afundi maru saqari anoonafa faqa miqoo marinau. Firaa feefauru aqimaria oonifa faqa miqoo marinau. 13Kafa moo amara auqu Kiqoona nammari marinau. Mifa Kusa maqa maaqa atindanai qumifi marinau. 14Kafa moo amara auqu Taikirisa nammari marinau. Mifa Asiria maqa maaqa suani oosana qaannai atindanai qumi marinau. Moo amara auqu Eeufarateesa nammari marinau.
15Karaambaiqa Anutufa narí auquqoo fasiqana mareeqee Eedeena kadidakina quqanau. Kadidaki maqa apauridanoo aiqama ainainasaa mi kadidanaki rakisianifeera quqanau. 16Anutufa quqaseenoo mi fasiqana maaqi qimaseenoo aakapanau. Anee kadidakina aiqama saqari qaqama diqisee naannee qinau. 17Moodaa saqariara kai qinee qaoo qidaqa. Manda ainainara irirana faqa amiqira ainainara irirana faqa nimi mari saqarina kai sia naa. Anee namaseenana mikari kai kuqinnaranoo.
18Mi fasannai karaambaiqa Anutufa mi fasiqanara qinau, maa fasiqafa naríaraa marifanoo siamma andeeqaidanoo. Qinee mina aqoonnana auqusaananoo mina dadaaqiannoo.
19Anutufa maqa qumareenoo minannai aiqama aandau faqa ufiniuqa faqa auqinau. Auquseenoo aiqama naarammeeqeenoo faiqí maruqoo nuquraanifeera quqasoofanoo nana ainainee auquroofa doo mi nuquna faqaasa mariqau. 20Miqimmaseenoo faiqí fannoo kooqikinaa aandauqa faqa kaasau aandauqa faqa ufiniuqa faqa nuqu rama quqanau. Miqiqa marufanoo Anutufa mi fasiqana aqoonnanaikiranara misaki randeenoo sia paqurinau. 21Minara faiqarana faiqí aminau. Faifufanoo Anutufa mina aqaasana moodaa tatuseenoo mina amaqinnai minaki ititanau. 22Ititaseenoo karaambaiqa Anutufa mina aqaasanannoo anaasee auqinau. Auquseenoo faiqí maruqoo afiqee finau.
23Quqasoofanoo faiqí fannoo qafamaseenoo qinau.
Doo maqee uqanna qini fooqaairafa uqanna maridanoo,
amudaani qini qimudaani kinaafa,
amaqi qini qimaqinnai auqirafa,
qinee minara anaasee fee qimasee auquraanaura,
mifa faiqí kinaafa marinara miqi qimasee auqu raanaura.
24Minara kai faiqí narí anoona akoona minnisee narí anaaqa faqa moodaanaki mafi moodaara foora maridaqa.
25Mi fasiqafa narí anaaqandiri kaqisamu maruqanda mariqau, sia nariara nariara nisauri mariqau.
Sélection en cours:
Oosana 2: bjr
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2017 Wycliffe Bible Translators, Inc. All rights reserved.