Tihlabelelo 57
57
Umthandazo wekucela kusindziswa ekuhlushweni
(Hla. 108:1-5)
Sihlabelelo saDavide lesiyimiktamu leligugu njengegolide kuye. Wasihlabela asemgedzeni ngesikhatsi abalekele Sawula; setfulwe kumhlabelisi kutsi sihlatjelwe ngendlela letsi: “Ungabhubhisi.”
1 Ngihawukele, Nkulunkulu, ngihawukele,
ngobe wena usiphephelo semphefumulo wami,
ngiyawukhosela emtfuntini wemaphiko akho,
kuze kwendlule tivunguvungu temashwa.
2Ngikhala kuNkulunkulu
Losetikwako Konkhe,
kuNkulunkulu longifezela tinjongo takhe.
3Uyawutfumela asezulwini, angisindzise,
ahlazise labo labangigcobagcobako. Cabanga.
Nkulunkulu uyawubonakalisa
umusa wakhe nekwetsembeka kwakhe.
4 Ngisemkhatsini wemabhubesi,
labantfu labashwabudzelanako.
Ematinyo awo atikhali nemicibisholo,
tilwimi tawo tinkemba letikhaliphako.
5Nkulunkulu,
phakama ube ngetulu kwemazulu,
inkhatimulo yakho
yengamele umhlaba wonkhe.
6 Tinyatselo tami batibekele lugibe,
umphefumulo wami ushone phansi.
Bembe umgodzi wekungihholokoshisela
endleleni yami,
kodvwa sekuhholokoshele bona. Cabanga.
7 Inhlitiyo yami ime sibindzi, Nkulunkulu,
inhlitiyo yami ime sibindzi,
ngiyawuhlabela
ngibonge ludvumo lwakho.
8 Vuka, mphefumulo wami,
vuka habhu yami,
nawe lugubhu lwami.
Ngiyawuphaphamisa intsatsakusa.
9Ngiyawukubonga emkhatsini wetive, Simakadze,
ngikudvumise emkhatsini wetive.
10 Ngobe umusa wakho mukhulu,
ufikela etulu emazulwini,
nekwetsembeka kwakho kufikela emafini.
11Nkulunkulu,
phakama ube ngetulu kwemazulu,
inkhatimulo yakho
yengamele umhlaba wonkhe.
Sélection en cours:
Tihlabelelo 57: SWT
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
© Bible Society of South Africa 1996. Used with permission. All rights reserved.