Matta 26
26
Al-kubaaraat gammo didd al-Masiih
1Wakit Isa kammal kalaamah da, hu gaal le talaamiizah : 2«Taʼarfu baʼad yoomeen, iid al-Fisha yaji wa yisallumu Ibn al-Insaan le l-kubaaraat achaan yaktuluuh fi l-saliib.»
3Wa fi l-wakit da, kubaaraat rujaal al-diin wa l-chuyuukh lammo fi beet Gayaafa wa hu kabiir rujaal al-diin. 4Wa alʼaamaro kikkeef yakurbu Isa be achiir wa yaktuluuh. 5Wa gaalo ambeenaathum : «Ma nakurbuuh fi ayyaam al-iid achaan akuun fitne tabga ambeenaat al-chaʼab.»
Al-mara al-sabbat itir fi raas al-Masiih
6Isa gaaʼid fi hille usumha Beet Anya fi beet Simʼaan al-Mujaddim. 7Wa mara waahide jaat leyah wa jaabat maaʼuun hana hajar malaan itir khaali bilheen wa sabbatah kulla ke fi raas Isa wakit hu gaaʼid yinjamma. 8Wa wakit al-talaamiiz chaafo al-cheyy al-hi gaaʼide tisawwiih, ziʼilo wa gaalo : «Maala waddarat al-maal misil da ? 9Kan baaʼo al-itir da, yalgo gurus katiir achaan yantuuh le l-masaakiin.»
10Wa Isa irif kalaamhum wa gaal leehum : «Maala tibachtunu al-mara di ? Hi sawwat leyi cheyy sameh. 11Al-masaakiin gaaʼidiin maʼaaku daayman wa laakin ana kamaan ma nagood maʼaaku daayman. 12Hi sabbat al-itir fi jismi wa be misil da, jahhazatni le l-khabur. 13Nuguul leeku al-hagg, fi ayyi bakaan fi l-dunya al-yiballukhu foogah al-bichaara, yihajju fi l-cheyy al-hi sawwatah wa yizzakkarooha.»
Khiyaanat Yahuuza le l-Masiih
14Wa fi l-bakaan da, waahid min al-talaamiiz al-atnaachar, usmah Yahuuza al-Iskhariyooti, macha le kubaaraat rujaal al-diin. 15Wa gaal : «Tantuuni kam achaan nisallim leeku Isa ?» Wa hasabo leyah talaatiin hajar fudda. 16Wa min al-wakit da, Yahuuza gaaʼid yifattich fursa achaan yisallim leehum Isa.
Al-acha hana iid al-Fisha
17Wa fi awwal yoom min ayyaam iid al-Khubza bala Tawwaara, talaamiiz Isa jo leyah wa gaalo : «Tidoor aniina namchu ween achaan nihassulu leek acha iid al-Fisha ?» 18Wa radda leehum wa gaal : «Adkhulu fi l-madiina wa amchu fi beet naadum waahid wa guulu leyah : ‹Al-muʼallim yuguul leek : “Wakti garrab khalaas. Ana naakul acha iid al-Fisha maʼa talaamiizi fi beetak.”›» 19Wa l-talaamiiz sawwo kulla cheyy misil Isa gaalah leehum wa hassalo acha iid al-Fisha.
20Wa fi l-makhrib, Isa maʼa l-talaamiiz al-atnaachar gaʼado le yaakulu. 21Wa wakit gaaʼidiin yaakulu, hu gaal : «Nuguul leeku al-hagg, naadum waahid minku yukhuunni.» 22Wa hizno bilheen wa ayyi naadum minhum saʼalah wa gaal : «Ya sayyidna, ana walla ?» 23Wa radda leehum wa gaal : «Al-naadum al-yidiss iidah maʼaayi fi l-maaʼuun, hu bas al-yukhuunni. 24Akiid Ibn al-Insaan yumuut misil maktuub fi l-Kitaab. Wa laakin al-azaab yarja al-raajil al-yukhuunni ana Ibn al-Insaan. Akheer le l-raajil da kan ma wildooh !» 25Wa Yahuuza al-khaanah saʼalah wa gaal : «Ya muʼallim, ana walla ?» Wa Isa radda leyah wa gaal : «Inta bas gultah.»
26Wa wakit gaaʼidiin yilʼachcho, Isa chaal khubza waahide wa chakar Allah wa kasarha wa antaaha le talaamiizah wa gaal : «Chiiluuh wa aakuluuh. Da jismi.» 27Wa chaal kaas wa chakar Allah wa antaah leehum wa gaal : «Kulluku acharbo minnah. 28Da dammi hana l-muʼaahada al-jadiide al-yidaffig fi chaan naas katiiriin achaan Allah yakhfir leehum zunuubhum. 29Wa nuguul leeku, min al-yoom ana ma nachrab battaan asiir al-inab lahaddi l-yoom al-nachrab asiir al-inab al-jadiid maʼaaku fi mamlakat abuuyi.»
30Wa khanno khine min al-Zabuur wa marago min al-madiina wa macho jabal al-Zaytuun.
Al-Masiih gaal Butrus yankurah
31Wa Isa gaal leehum : «Al-leele di kulluku tikhalluuni achaan maktuub fi l-Kitaab : <Nadrub al-raaʼi wa l-khanam yichittu.>#26:31 Al-kalaam da talgooh fi Zakariiya 13:7. 32Wa laakin baʼad ana baʼast, namchi giddaamku fi daar al-Jaliil.»
33Wa Butrus radda leyah wa gaal : «Kan kulla l-aakhariin yikhalluuk kula, ana abadan ma nikhalliik.» 34Wa Isa radda leyah wa gaal : «Nuguul leek al-hagg, al-leele di gubbaal al-diik ma yiʼooʼi, tankurni talaata marraat.» 35Wa Butrus gaal : «Ana kan numuut maʼaak kula, abadan ma nankurak !» Wa kulla l-talaamiiz gaalo nafs al-cheyy.
Al-Masiih saʼal Allah fi Jasiimaani
36Wa khalaas Isa wa talaamiizah macho fi bakaan usmah Jasiimaani wa gaal leehum : «Agoodu hini wa ana namchi giddaam achaan nisalli.» 37Wa chaal maʼaayah Butrus wa awlaad Zabadi al-itneen wa bigi haznaan wa bada yatʼab bilheen. 38Wa gaal leehum : «Ana haznaan marra waahid lahaddi nidoor al-moot. Agoodu hini waaʼiyiin.»
39Wa macha giddaam minhum chiyya wa sajad fi l-ard wa saʼal Allah wa gaal : «Ya Abuuyi, kan da mumkin, khalli kaas al-taʼab da yibaʼʼid minni. Laakin khalli yabga misil inta tidoorah wa ma misil ana nidoorah.»
40Wa gabbal le l-talaamiiz wa ligiihum naaymiin wa gaal le Butrus : «Saaʼa waahide kula ma gidirtu tagoodu maʼaayi waaʼiyiin ? 41Agoodu waaʼiyiin wa asʼalo Allah achaan al-taʼab ma yijarrib iimaanku wa yitallifah. Achaan al-insaan indah niiye laakin ma indah gudra.»
42Wa marra taaniye tarraf minhum wa saʼal Allah wa gaal : «Ya abuuyi, kan ma mumkin kaas al-taʼab yibaʼʼid minni illa nacharbah, khalaas khalli yabga misil inta tidoorah.» 43Wa gabbal le l-talaamiiz wa battaan ligiihum naaymiin achaan noom chadiid chaalaahum.
44Wa Isa khallaahum wa macha saʼal Allah taalit marra wa gaal nafs al-cheyy misil awwal. 45Wa baʼad da, gabbal le talaamiizah wa gaal : «Intu lissaaʼku naaymiin walla ? Tidooru tinjammo ? Khalaas, al-wakit garrab. Ibn al-Insaan khaanooh wa yisallumuuh le l-muznibiin ! 46Gummu namchu ! Chiifu, al-yukhuunni jaayi !»
Al-Masiih karabooh
47Wa Isa lissaaʼ ma kammal al-kalaam da bas, Yahuuza ja. Hu waahid min al-talaamiiz al-atnaachar wa jaab maʼaayah naas katiiriin induhum suyuuf wa isay. Kubaaraat rujaal al-diin wa l-chuyuukh rassaloohum. 48Wa l-khaayin antaahum alaama min awwal wa gaal : «Al-naadum al-nihibbah, da bas hu. Akurbuuh !»
49Wa ajala, macha le Isa wa gaal : «Ya sayyidna, al-salaam aleek.» Wa habbaah. 50Wa Isa gaal leyah : «Ya rafiigi, maala inta jiit ?» Wa jo karabo Isa.
51Wa waahid min al-naas al-gaaʼidiin maʼa Isa madda iidah wa salla seefah wa darab abid hana kabiir rujaal al-diin wa gataʼ adaanah. 52Wa Isa gaal leyah : «Dakhkhil seefak fi beetah achaan ayyi naadum al-yisill al-seef yumuut be l-seef. 53Wa fikirku chunu ? Ma nagdar nasʼal musaaʼada min abuuyi achaan yirassil leyi uluuf min al-malaaʼika wa yidaawusu leyi walla ? 54Wa laakin kan sawweet ke, kikkeef al-kalaam al-maktuub fi l-Kitaab yitimm ? Al-Kitaab yuguul al-cheyy al-gaaʼid yabga hini laabudda yitimm.»
55Wa Isa hajja le l-naas wa gaal : «Kikkeef intu jiitu takurbuuni be seef wa asa da ? Ana mujrim walla ? Kulla yoom ana gaaʼid fi fadaayit beet Allah wa gaaʼid niʼallim al-naas wa intu ma karabtuuni. 56Wa laakin bigi misil da achaan kulla cheyy al-anbiya katabooh yitimm.»
Wa khalaas kula talaamiizah khallooh wa jaro. 57Wa l-naas al-karabo Isa waddooh fi beet Gayaafa kabiir rujaal al-diin. Al-ulama wa l-chuyuukh lammo fi beetah wa gaaʼidiin yarjoohum. 58Wa Butrus taabaʼah min baʼiid lahaddi beet kabiir rujaal al-diin wa andassa wa gaʼad tihit been al-askar achaan yichiif al-cheyy al-yabga.
Al-Masiih giddaam al-chariiʼa
59Wa kubaaraat rujaal al-diin wa kulla naas hana l-majlas al-kabiir lammo wa achchaawaro. Wa fattacho chuhuud kaddaabiin achaan yahkumu le Isa be l-moot. 60Wa chuhuud kaddaabiin katiiriin jo wa laakin ma ligo naas itneen al-kalaamhum waahid. Wa baʼad wakit tawiil, naaseen gammo 61wa gaalo : «Al-naadum da gaal : ‹Ana nagdar nikassir beet Allah wa fi talaata yoom nabniih battaan.›»
62Wa kabiir rujaal al-diin gamma wa saʼal Isa wa gaal : «Ma turudd leena walla ? Ma simiʼt chahaadithum foogak walla ?» 63Wa Isa gaaʼid saakit bas. Wa kabiir rujaal al-diin saʼalah battaan wa gaal : «Nihallifak be usum Allah al-Hayy. Guul leena ! Inta al-Masiih Ibn Allah walla ?» 64Wa Isa radda leyah wa gaal : «Misil inta gultah. Wa nuguul leeku yoom waahid yaji tichiifu Ibn al-Insaan fi kursi jamb Allah al-Gaadir fi nussah al-zeenaay#26:64 Al-kalaam da talgooh fi Zabuur 110:1. wa tichiifuuh jaayi fi sahaab al-sama.#26:64 Al-kalaam da talgooh fi Danyaal 7:13-14.»
65Wa kabiir rujaal al-diin chagga khalagah min al-zaʼal wa gaal : «Khalaas ! Hu achrak ! Wa battaan ma nidooru chaahid aakhar. Intu zaatku simiʼtu kalaam al-muchrik da ! 66Kharaarku chunu ?» Wa raddo leyah wa gaalo : «Hu khaati wa waajib leyah al-moot !» 67Wa bazzakho fi wijhah wa darabooh wa waahidiin chaddagooh 68wa gaalo : «Ya l-Masiih, ooriina yaatu al-darabak !»
Butrus nakar al-Masiih
69Wa fi l-wakit daak, Butrus gaaʼid barra fi l-hooch. Wa khaddaama waahide jaat leyah wa gaalat : «Inta kula maʼa Isa al-min daar al-Jaliil !» 70Wa giddaam kulla l-naas Butrus nakarah wa gaal : «Kalaamki da ma naʼarfah.»
71Wa macha fi khachum al-hooch wa khaddaama aakhara kula chaafatah wa irfatah wa hajjat le l-naas al-gaaʼidiin hinaak wa gaalat : «Al-naadum da kula maʼa Isa al-min al-Naasira.» 72Wa taani marra Butrus nakar al-kalaam wa halaf wa gaal : «Ana ma naʼarif al-raajil da.»
73Wa baʼad chiyya, al-naas al-waagfiin hinaak jo leyah wa gaalo : «Sahiih, inta waahid minhum ! Naʼarfuuk achaan ratiinak misil ratiinhum.» 74Wa Butrus gamma halaf wa gaal : «Khalli Allah yalʼanni kan kalaami ma sahiih. Abadan ma naʼarif al-raajil da !» Wa tawwaali al-diik ooʼa. 75Wa Butrus fakkar fi l-kalaam al-Isa gaalah : «Gubbaal al-diik ma yiʼooʼi, tankurni talaata marraat.» Wa khalaas, Butrus marag min al-beet wa baka baki chadiid.
Sélection en cours:
Matta 26: ADT19
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Arabe tchadien (alphabet latin) Bible © Alliance Biblique du Tchad, 2019.