Matta 11
11
Kalaam al-Masiih fi Yahya
1Wa baʼad Isa gaal kulla l-kalaam da le talaamiizah al-atnaachar, hu gamma min hinaak wa macha yiʼallim al-naas wa yiballikh al-bichaara fi hillaalhum.
2Wa fi l-wakit da, Yahya gaaʼid fi l-sijin. Wa simiʼ khabar hana amal al-Masiih wa rassal waahidiin min talaamiizah le Isa 3achaan yasʼalooh wa yuguulu leyah : «Inta al-naadum al-yaji walla waajib narjo naadum aakhar ?»
4Wa Isa radda leehum wa gaal : «Amchu wa ooru Yahya be kulla cheyy al-chiftuuh wa l-simiʼtuuh. 5Al-amyaaniin gaaʼidiin yichiifu wa l-uruj gaaʼidiin yuruukhu wa l-induhum jidaam gaaʼidiin yalgo al-aafe wa l-tarchaaniin gaaʼidiin yasmaʼo wa l-maytiin gaaʼidiin yabʼaso. Wa l-masaakiin gaaʼidiin yasmaʼo al-bichaara. 6Wa mabruuk le l-naadum al-ma yichakkik foogi.»
7Wa wakit talaamiiz Yahya gammo maachiin, Isa bada yihajji fi Yahya le l-naas al-gaaʼidiin maʼaayah wa gaal : «Wakit Yahya gaaʼid fi l-kadaade, macheetu leyah achaan tichiifu chunu ? Ageegaay al-riih tihizzaha walla ? 8Wa kan ma ke, dawwartu tichiifu chunu ? Naadum laabis khalag sameh ? La ! Achaan al-naas al-laabsiin khulgaan samhiin gaaʼidiin fi buyuut al-muluuk. 9Zeen, maragtu achaan tichiifu chunu ? Achaan tichiifu nabi ? Aywa ! Wa nuguul leeku chiftu naadum akbar min nabi. 10Wa da bas hu al-be sababah al-Kitaab yuguul : <Daahu nirassil rasuuli giddaamak wa hu yiʼaddil leek al-derib.>#11:10 Al-kalaam da talgooh fi Malaakhi 3:1.
11«Wa nuguul leeku al-hagg, ma fi naadum mawluud min mara akbar min Yahya al-Mukhattis. Wa laakin al-naadum al-sakhayyar fi mamlakat Allah, akbar minnah. 12Wa min awwal yoom hana khidmit Yahya al-Mukhattis lahaddi al-yoom, mamlakat Allah gaaʼide tiziid be gudra wa l-yadkhulu foogha yiwajjuhu al-unuf. 13Allah kallam le l-naas fi l-Tawraat wa fi kutub al-anbiya kulluhum lahaddi Yahya ja. 14Wa kan induku niiye tisaddugu kalaami da, Yahya hu Iliyaas al-gaaʼidiin tarjooh. 15Ayyi naadum al-indah adaan khalli yasmaʼ !
Kalaam al-Masiih fi naas waktah
16«Wa nuguul chunu fi naas wakitna ? Humman yichaabuhu chunu ? Humman misil iyaal dugaag laammiin fi door wa yinaadu rufgaanhum wa yuguulu : 17‹Aniina darabna leeku al-suffaara laakin intu ma liʼibtu. Aniina khanneena khine hana moot wa intu ma bakeetu !› 18Yahya ja wa hu ma yaakul wa la yachrab wa gaalo : ‹Hu muchootin›. 19Wa baʼadeen ana Ibn al-Insaan jiit wa ana gaaʼid naakul wa nachrab wa gaalo : ‹Hu akkaal wa sakkaari wa rafiig le naas al-yichiilu miiri wa l-muznibiin.› Laakin hikmat Allah al-sahiihe tinchaaf fi amal al-naas al-yitaabuʼuuha.»
20Wa Isa bada yahrij al-hillaal al-sawwa fooghum ajaayib katiiriin wa naashum ma taabo min zunuubhum. 21Wa gaal : «Al-azaab yarjaaki, ya hillit Kuuraziin ! Al-azaab yarjaaki, ya hillit Beet Seeda ! Kan awwal naadum sawwa al-ajaayib dool fi mudun al-kuffaar Suur wa Seeda, naas al-mudun dool yutuubu min zunuubhum min zamaan wa yalbaso khulgaan al-hizin wa yagoodu fi rumaad. 22Wa nuguul leeku, fi yoom al-Hisaab, al-azaab al-yanzil foog muznibiin Suur wa Seeda ma yabga chadiid misil al-azaab al-yanzil foog naasku. 23Wa inti hillit Kafar Naahuum, rafaʼti raaski lahaddi l-sama walla ? Nuguul leeki Allah yarmiiki fi l-haawiye achaan kan awwal naas Saduum chaafo al-ajaayib al-naaski chaafoohum, hillit Saduum tagood lahaddi l-yoom. 24Wa laakin nuguul leeku, fi yoom al-Hisaab, al-azaab al-yanzil foog naas hillit Saduum ma yabga chadiid misil al-azaab al-yanzil foog naaski.»
Al-Masiih naada al-taʼbaaniin
25Wa fi l-wakit da, Isa hajja wa gaal : «Chukran, ya abuuyi Rabb al-samaawaat wa l-ard achaan inta labbadt kalaamak da min al-hakiimiin wa min al-ulama. Wa wassaftah le l-naas al-juhhaal. 26Aywa, ya abuuyi, achaan da bas al-cheyy al-inta raadi beyah».
27«Abuuyi Allah wakkalaani be kulla cheyy. Ma fi naadum al-yaʼarif Ibn Allah illa abuuh. Wa ma fi naadum al-yaʼarif Allah, illa Ibn Allah wa l-naadum al-Ibn Allah yidoor yiwassif leyah abuuh.
28«Taʼaalu leyi intu kulluku al-taʼbaaniin min al-tagala al-chaayliinha fi raasku wa ana nantiiku jumma. 29Chiilu al-tagala al-nantiiha leeku wa abgo talaamiizi achaan ana daluul wa hanuun wa talgo jumma le nufuusku. 30Achaan al-tagala al-nantiiha leeku di, ma tagiile. Aywa, al-tagala al-nukhuttaha foogku khafiife.»
Sélection en cours:
Matta 11: ADT19
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Arabe tchadien (alphabet latin) Bible © Alliance Biblique du Tchad, 2019.