प्रेरित.कामी 24
24
राज्यपाल फेलिक्स रअः मड़ांग रे पौलुस आला सुनवाई
1पाँच रोज तयोम बड़े पुरोहित हनानियस, थोड़ेक नेताकु के तेकर तेरतुलुस नुमू रिनी वकील लोः कैसरिया सोदोर नेनाय, हुनी राज्यपाल रअः मड़ांग रे पौलुस रअः बिरोध रे नलीस लःअय। 2-3पौलुस के राअः लियाय तेकर तेरतुलुस हुनी तेङ रे दोस लगाव केते, “ए महामहिम फेलिक्स हुजूर, आम रअः चलते आले मुरुक सानती से ताहिनोअ तनाले आउर आम आला बढ़ियाँ देख-रेख रअः चलते, आबु आला जाईत रे जामा बरन रेनअः आउर जामा ठाँव रे मड़ांग बड़हाः ताना। नोःआँ बात के आले जामा ठाँव आउर जामा लकान रे धन्यवाद संहित मना-आले। 4ईङ आम आला बगरा समय ईइदी काईङ चहाअ ताना बकिर ईङ, आम माया केते मि-बार कड़ी आ-आयुम लःअय गोहराअ तनिङ बेता लियाय। 5आले आला अंदाज एदनाआ ची नुई होड़ भा-भड़कावी हेके। नुई दुनिया भाईर रिनकु जामा जाहुदीकु ताला रे छिट-फुट चिकुआय आउर नासरत कु खुड़हा रिनी नेता हेके। 6नुई बड़े बिनती ओड़ाअ के फाफंड़ाव रेनअः होः कुरनीसे केनाय, हिना लःअय आले नुई के सःब लियाले। (आले अपन कनहुन रअः मोताबिक नुई के डांड़ एमा तकियाले) 7बकिर पलटनकु आली सरदार लुसियस हीःग केते, जबरजसती आले आला तीः तरअः रेःग लिदयाय, 8तेकर हुनी तेंग रे ना-नलीस कु के आम मड़ांग रे हिजोअ लःअय हुकूम एमा लिकुआय। आम नुई तरअः कुली गथा केते होना जामा बात रे सचाई रेनअः पता लगाव सकायापे, जेकर बात रअः बारे आले हुनी तेङ रे दोस लगायाले।” 9जाहुदीकु नोःआँ बात सचेगी हेके मेन केते, नोःआँ सुनवाई रे तेरतुलुस के कंहड़ी गतिओ लिकुआकु।
पौलुस आला उतारा एमोअ
10जब हाकिम पौलुस के क-कंहड़ी लःअय अड़िःग लियाय, दो पौलुस कंहड़ी रूवाड़ लःअय ईङ नोःआँ पाड़ी केते, ची आम ढेर साल तरअः नुकू जाईत आला फ-फैसलाई हेके, हिना लःअय ईङ खुसी ते अपन बचाव रे कंहड़ीः दिंग। 11आम अपन-हारते गी पाड़ी सकायाम, ची ईङ के जिरोसलेम आ-आराधना सेनोः, बारह दिन तरअः जादे का हुयाव ताना। 12हुंकू ना दो बड़े बिनती ओड़ाअ रे, ईङ के ओके लोः होः बा-बहस आउर ना दो बिनती ओड़ाअ रे आउर ना जहान दुबाःड़े सहर रे, चाहे होड़कु के भा-भड़काव नाम तदिङाकु एतान? 13आउर ना दो हुंकू होना बात के, जे दोस हुंकू ईङ तेङ रे लगायाकु, नुकू आम मड़ांग रे होना रेनअः एतान साबुत होः एमोअ इरकु दड़ीआ। 14बकिर ईङ आम मड़ांग रे नोःआँ मनाअ तानिङ, ची जे होरा के हुंकू नोःआँ होरा बेस नलागे मेन गेआकु, हिना रअः मोताबिक ईङ अपन पुरखाकु आली परमेसर के सेवायींग तेकर जे बात के मुसा आला कनहुन तेकर आगमजानीकु आला पुथी रे लिखा लअः एदनाअ होना जामा रे बिसवासे ईङ। 15तेकर परमेसर रे जे लकान नुकू आसरायाकु हिना लकान ईङ होः आसरा दोहोयीङ ची धरमी तेकर अधरमी बनार आला जिवीःड-बिरिडोः हुयाव कोआ। 16हिना लःअय ईङ होः परमेसर आउर होड़कु आला नजाईर रे, जामा बेरा अपन सुध भितरी मन के बेकासुर दोदोहो लःअय भाईरसक मेहनाईत एकायीङ।
17 #
प्रे.कामी 21:17–28
ढेर बरीस बाहरी तहीनोः तयोम, ईङ अपन जाईतकु के दान सो-सोदोर तु लःअय तेकर बड़े बिनती ओड़ाअ रे भेंट रा-रकाःब लःअय जिरोसलेम रे हीःग थिनिङ। 18जब ईङ नोकाने किनिङ-गी ची हुंकू ईङ के बड़े बिनती ओड़ाअ रे भेंट रकाबे किनिङ रे, ईङ लोः ना भीड़ ताही नेना आउर ना आसानती थिना, हिमीन रे दसतुर रआ मोताबिक सुध थिनिङ रे नाम लिङाकु। 19बकिर एसिया रिनकु थोड़ेक जाहुदी ताही नेनाकु, हुंकू के उचित ताहिनेना ची जदि ईङ रअः बिरोध रे, हुंकू दुबाःड़े जहानअ बात ताही नेना दो नोआँड़े आम मड़ांग रे हीःग केते ईङ तेङ रे दोस ला-लगाव चाही। 20चाहे दो नुकुगी उदूगेआकु ची जे बेरा ईङ बड़े पंचाईत रअः मड़ांग रे तिंगु ताही निनिंग दो, नुकू ईङ तेङ रे एतान दोस नाम थिलाआकु। 21#प्रे.कामी 23:6हाँ! ईङ हुंकू तलारे तिंगु केते जोर से बेता थिलकुईङ, ईङ बिसवासे ईङ ची गोएःग उनकु जिवीःड-बिरिःड कोआकु रआ चलते आपे मड़ांग रे तिसिंग ईङ तेङ रे, केंस-फाउदारी चलाअ ताना।
22फेलिक्स नोःआँ होरा रआ बारे रे बढ़ियाँ से खभाईर दोहोय केनाय। हुनी जाहुदीकु के बेता लिकुआय “जब पलटनकु आली सरदार लुसियस हिजोअ आय दो, आपे आला बात रेनअः फैसला यींग” मेन केते सुनवाई रोकाव केदाय। 23फिन हुनी सुबेदार के, पौलुस के जेहेल रे दोहोईपे, कटिःग हुनी के निछुन बाई ताईपे तेकर हुनी आलकु गाती के हुनी के सेवा-सुसार रे आलपे रोकाव किकु मेन केते हुकूम एमा लिकुआय।
फेलिक्स तेकर दोरुसिल्ला मड़ांग रे पौलुस
24थोड़ेक दिन तयोम फेलिक्स अपन गोमकाईन दोरुसिल्ला लोः हीःग नेनाय। हुनी मियांड जाहुदी थिनाय, फेलिक्स पौलुस के रा-राअः आगु कुलगोःड लिकुआय, आउर ईसु ख्रीस्त रे बिसवास रआ बारे हुनी तरअः आयुम लःअय। 25बकिर जब पौलुस धरम आउर अपन के काबू रे दोदोहो तेकर हिजोअ वाला नेयाय रआ दिन बारे रे, आउर भलाई रेनअः बखाने केनाय, दो फेलिक्स के बोर भिनाव ना तेकर आम नोःआँ बेरा सेन सकाआम, मोका भेटाअः होले आम के फिन राअः मेईङ बेता लियाय। 26हुनी के पौलुस पखा तरअः ढिबुवा भेटाअः रेनअः आसरा होः ताही नेना, हिना लःअय हुनी पौलुस के घड़ी-घड़ी रा-राअः कुलगोःड कु केनाय तेकर हुनी लोः बाते केनाय।
27बार बरीस बिताअः तयोम पुरकियुस फेस्तुस, फेलिक्स रअः ठाँव रे हीःग नेनाय, फेलिक्स जाहुदीकु के खुखुस लःअय पौलुस के जेहेल रे बाईःग-तु लियाय।
Sélection en cours:
प्रेरित.कामी 24: ASR
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2023 NLCI CC BY-NC-ND 4.0
