मत्ती 25
25
दस कुँआरिऔं की दासतान
1 #
लूका 12:35
“उस टैम सुरग को राज उन दस कुँआरिऔं के जैसो होगो, जो अपनी अपनी मसाल लेकै दूलाह सै मिलनै लिकरी। 2उनमै पाँच मूरख और पाँच समजदार हीं। 3मूरखौं नै मसाल तौ लंई, पर मसाल के संग तेल ना लाँई। 4समजदार अपनी मसाल के संग-संग कुप्पिऔं मै तेल बी लाँई। 5जब दूलाह के आनै मै देर भई, तौ बे सब टूलल लगीं और सो गंई। 6आधी रात मै धूम मची, कै दूलाह आ रओ है, बासै मिलनै के ताँई चलौ। 7तब बे सबई कुँआरी उठकै अपनी अपनी मसाल ठीक करल लगीं। 8और मूरख कुँआरिऔं नै समजदारौं सै कैई, अपने तेल मै सै थोड़ो हमकै बी दे दो, कैसेकै हमरी मसाल बुत रई हैं। 9समजदारौं नै जबाब दओ, ‘का पतो, कहीं हमरे और तुमरे ताँई तेल पूरो ना पड़ै, भलो तौ इसई मै है, तुम दुकान जाकै अपने ताँई मोल लेलो।’ 10जब बे मोल लैनै जाई रई हीं कै दूलाह आ पौंचो, और जो तईयार हीं, बे बाके संग बिहा के घर मै चली गंई और मौहड़ो बन्द कर दओ गओ।
11 #
लूका 13:25
“इसके बाद बे दूसरी कुँआरी बी आकै कैललगीं, मालिक, हे मालिक, हमरे ताँई किबाड़ खोल दे। 12तब उसनै जबाब दओ, कै मैं तुमसै सच कैरओ हौं, मैं तुमकै ना जानौ हौं। 13इसताँई जगते रैहऔ, कैसेकै तुम ना तौ उस दिन कै जानौ हौ, ना उस घड़ी कै।
तीन नौकरौ की दासतान
(लूका 19:11–27)
14 #
लूका 19:11–27
“सुरग को राज उस आदमी के जैसो है, जिसनै परदेस जाते टैम अपने नौकरौ कै बुलाकै, अपनी दौलत उनकै सौंप दई। 15बानै हर एक की काबलियत कै धियान मै रखकै एक नौकर कै पाँच हजार, दूसरे कै दो हजार और तीसरे कै एक हजार असरपी दंई। इसके बाद बौ परदेस चलो गओ। 16जिसकै पाँच हजार असरपी मिली हीं, उसनै तुरन्त जाकै उनसै लेन-देन करो, बानै पाँच हजार असरपी और कमा लंई। 17इसई हाँई जिसकै दो हजार असरपी मिली हीं, बानै और दो हजार कमा लंई। 18पर जिसकै एक हजार असरपी मिली हीं, बानै जाकै गड्ढा खोदो और अपने मालिक की असरपी दबा दंई।
19 “भौत दिनौ के बाद उन नौकरौ के मालिक नै लौहटकै उनसै हिसाब माँगो। 20जिसकै पाँच हजार असरपी मिली हीं, बानै और पाँच हजार लाकै कैई, ‘मालिक, तैनै मैंकै पाँच हजार असरपी सौंपी हीं, देख, मैंनै पाँच हजार और कमाई हैं।’”
21 “बाके मालिक नै बासै कैई, ‘साबास, भले और ईमानदार नौकर! तू थोड़े मै ईमानदार रैहओ, मैं तेकै और जादा को अधकार दंगो। अपने मालिक की खुसी मै सामिल हो जा।’” 22“इसके बाद बौ आओ जिसकै दो हजार असरपी मिली हीं। बानै कैई, ‘मालिक, तैनै मैंकै दो हजार असरपी सौंपी हीं। देख, मैंनै और दो हजार कमाई।’”
23 “बाके मालिक नै बासै कैई, ‘साबास, भले और ईमानदार नौकर! तू थोड़े मै ईमानदार रैहओ, मैं तेकै और जादा को अधकार दंगो। अपने मालिक की खुसी मै सामिल हो जा।’
24 “बाद मै बौ आओ जिसकै एक हजार असरपी मिली हीं। बानै कैई, ‘मालिक, मैंकै मालूम हो कै तू कठोर आदमी है। तू बहाँ काटै है जहाँ तैनै बोओ ना है, और जहाँ तैनै कोई बीज ना डारो बहाँ फसल बटोरै है। 25इसताँई मैं डर गओ और मैंनै जाकै तेरी असरपी गड्ढा खोदकै दबा दंई, देख, जो तेरो है, बौ बापस लौहटा रओ हौं।’
26 “बाके मालिक नै जबाब दओ कै, ‘हे दुसट और आलसी नौकर, तेकै मालूम हो कै मैंनै जहाँ ना बोओ, बहाँ काटौ हौं और जहाँ ना बखेरो, बहाँ बटोरौं हौं, 27तौ तेकै मेरी असरपी साहूकारौं कै दे देनी हीं, तब मैं आकै अपनो धन बियाज समेत ले लेतो। 28इसताँई जे हजार असरपी जासै लेलो और जिसके धौंरे दस हजार हैं, बाकै दे दो। 29#मत्ती 13:12; मरकु 4:25; लूका 8:18कैसेकै जिसके धौंरे कुछ है, बाकै और दओ जागो और बाके धौंरे भौत हो जागो, पर जिसके धौंरे कुछ ना है, बासै बौ बी ले लओ जागो जो बाके धौंरे है। 30#मत्ती 8:12; 22:13; लूका 13:28और इस निकम्मे नौकर कै, बाहार इन्धेरे मै फैंक दो, जहाँ लोग रोंगे और अपने दाँत पीसंगे।’
आदमी के लौंड़ा दुआरा सबको नियाय
31 #
मत्ती 16:27;
मत्ती 19:28
“जब आदमी को लौंड़ा अपनी महिमा मै आगो, और सब सुरगदूत बाके संग आंगे तौ बौ अपनी महिमा के सिंगासन मै बिराजमान होगो। 32और सबई जातिऔं के लोग बाके सामने इखट्टे करे जांगे। जैसे गड़रिया भेड़ौ कै बकरिऔं सै अगल करै है, उसई हाँई बौ लोगौ कै एक दूसरे सै अगल कर देगो। 33और बौ भेड़ौ कै अपनी खानी ओर और बकरिऔं कै बाँई ओर खड़ी करैगो।
34 “तब राजा अपने खाने हात बारे लोगौ सै कैगो, हे मेरे अब्बा के धन्न लोगौ, आऔ और उस राज के हकदार बन जाऔ, जो दुनिया के सुरू सैई तुम लोगौ के ताँई तईयार करो गओ है। 35कैसेकै मैं भूँको हो और तुमनै मैंकै खानै कै दओ, मैं पियासो हो और तुमनै मैंकै पानी पिबाओ, मैं परदेसी हो, तुमनै मैंकै अपने घर मै ठैराओ, 36मैं नंगो हो, तुमनै मैंकै लत्ता पैहराए, मैं बेमार हो, तुम मेरो हालचाल पूँछनै आए, मैं जेल मै हो, तुम मुस्सै मिलनै आए।”
37 “फिर जबाब मै धरमी लोग बासै पूँछंगे, कै ‘हे परभु, हमनै तू कब भूँको देखो और तेकै खबाओ? या पियासो देखो और तेकै पिबाओ? 38हमनै कब तू परदेसी देखो और अपने घर मै ठैराओ या नंगो देखो, और लत्ता पैहराए? 39हमनै कब तू बेमार या जेल मै देखो और तेसै मिलनै आए?’
40 “तब राजा उनकै जबाब देगो, ‘मैं तुमसै सच कैरओ हौं, कै तुमनै जो मेरे इन छोटे से छोटे भईयौ मै सै किसी एक के संग करो, बौ तुमनै मेरे ताँई करो।’
41 “फिर बौ राजा अपनी बाँई ओर बारौ सै कैगो, ‘अरे अभागौ! मेरे सामने सै उस हमेसा की आग मै चले जाऔ, जो सैतान और बाके दूतौ के ताँई तईयार करी गई है। 42कैसेकै मैं भूँको हो, और तुमनै मैंकै खानै कै ना दओ, मैं पियासो हो, और तुमनै मैंकै पानी ना पिबाओ। 43मैं परदेसी हो, और तुमनै मैं अपने घर मै ना ठैराओ, मैं नंगो हो, और तुमनै मैंकै लत्ता ना पैहराए, मैं बेमार और जेल मै हो, तुमनै मेरी खबर ना लई।’
44 “तब बे जबाब दंगे कै, ‘हे परभु, हमनै तू कब भूँको, या पियासो, या परदेसी, या नंगो, या बेमार, या जेल मै देखो, और तेरी सेवा टहल ना करी?’
45 “तब राजा उनकै जबाब देगो, ‘मैं तुमसै सच कैरओ हौं कै तुमनै जो इन छोटे से छोटौ मै सै किसी एक के संग ना करो, बौ मेरे संग बी ना करो।’
46 “फिर जे बुरे लोग हमेसा के ताँई सजा भुगतंगे, पर धरमी हमेसा की जिन्दगी मै परबेस करंगे।”
Sélection en cours:
मत्ती 25: TKB
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
New Life Compute Institute [NLCI] - CC BY-NC-ND 4.0
