यहून्ना 14
14
परमेसर तक पौंचनै को एकई रस्ता ईसु
1 “तुमरो जी ना घबराऐ। तुम परमेसर मै बिसवास रक्खौ, और मेरे ऊपर बी बिसवास रक्खौ। 2मेरे अब्बा के घर मै रैहनै की भौत सी जघै है, अगर ना होती, तौ मैं तुमसै कैह देतो। मैं तुमरे ताँई जघै तईयार कन्नै जा रओ हौं। 3और अगर मैं जाकै तुमरे ताँई जघै तईयार करौं तौ फिर आकै तुमकै अपने हिंया ले जांगो कै जहाँ मैं हौं बहाँ तुम बी रौह, 4और जहाँ मैं जा रओ हौं, तुम बहाँ को रस्ता जानौ हौ।”
5थौमा नै बासै कैई, “हे परभु, हम ना जानै हैं कै तू कहाँ जा रओ है, तौ रस्ता कैसे जानै?”
6ईसु नै बासै कैई, “रस्ता, सच्चाई और जिन्दगी मैंई हौं। बिना मेरे दुआरा कोई अब्बा के धौंरे ना जा सकै है। 7अगर तुमनै मैं जानो होतो तौ मेरे अब्बा कै बी जानते। अब सै तुम बाकै जानौ बी हौ और तुमनै बौ देखो बी है।”
8फिलिप्पुस नै बासै कैई, “हे परभु, हमकै अब्बा दिखा दे, हमरे ताँई जौई भौत है।”
9ईसु नै बासै कैई, “फिलिप्पुस, मैं इतने दिनौ सै तेरे संग हौं, फिर बी तू मैंकै ना जानै है? जिसनै मैं देखो हौं, बानै अब्बा देखो है। तू कैसे कैबै है, ‘हमकै अब्बा दिखा दे?’ 10का तू बिसवास ना करै है कै मैं अब्बा मै हौं और अब्बा मैंई मै है? जो बचन मैं तुमसै कैबौ हौं बौ अपनी ओर सै ना कैबौ हौं, पर अब्बा जो मैंई मै रैहबै है बौई अपने काम कराबै है। 11मेरो बिसवास करौ कै मैं अब्बा मै हौं और अब्बा मैंई मै है, ना तौ मेरे उनई कामौ के कारन मेरो बिसवास करौ।
12 “मैं तुमसै सच-सच कैबौ हौं, कै जो मेरे ऊपर बिसवास करै है, बे काम जो मैं करौ हौं, बौ बी करैगो और इनसै बी महान काम करैगो, कैसेकै मैं अब्बा के धौंरे जा रओ हौं। 13और जो कुछ तुम मेरे नाम सै माँगौगे, बौई मैं करंगो कै लौंड़ा के दुआरा अब्बा की महिमा हो। 14अगर तुम मैंसै मेरे नाम सै कुछ बी माँगौगे तौ मैं बाकै करंगो।
पबित्तर आत्मा को बादो
15 “अगर तुम मैंसै पियार करौ हौ, तौ मेरी आगियाँऔ कै मानौगे। 16और मैं अब्बा सै बिनती करंगो, और बौ तुमकै एक और सायता कन्नै बारो देगो, कै बौ हमेसा तुमरे संग रैहबै। 17यानी सच की आत्मा जिसकै दुनिया ना मानै है, कैसेकै बौ बाकै ना तौ देखै है और ना जानै है, पर तुम बाकै जानौ हौ, कैसेकै बौ तुमरे संग रैहबै और तुम्मै होगो। 18मैं तुमकै अनाथ ना छोड़ंगो, मैं तुमरे धौंरे आंगो। 19थोड़ी देर बाद दुनिया मैंकै फिर ना देखैगी, पर तुम मैंकै देखौगे। मैं जिन्दो हौं, इसताँई तुम बी जिन्दे रैहओगे। 20बा दिन तुम जानौगे कै मैं अपने अब्बा मै हौं और तुम मैंई मै और मैं तुम्मै हौं। 21जो मेरी बातौं कै मानै है और उनके ऊपर चलै है, बौई मैंसै पियार करै है, और जो मैंसै पियार करै है, बासै मेरो अब्बा पियार करैगो, और मैं बासै पियार करंगो और अपने आपकै बाके ऊपर परकट करंगो।”
22उस यहूदा नै जो इसकरोती ना हो, बासै कैई, “परभु, ऐंसो का भओ है कै तू अपने आपकै हम मै परकट कन्नो चाँहबै है और दुनिया मै ना?”
23ईसु नै जबाब देते भए बासै कैई, “अगर कोई मैंसै पियार करै है तौ बौ मेरे बचनौ कै मानैगो, बासै मेरो अब्बा पियार करैगो और हम बाके धौंरे आंगे और बाके संग रैहंगे। 24जो मैंसै पियार ना करै है, बौ मेरे बचनौ कै ना मानै है, और जो बचन तुम सुनौ हौ बौ मेरो ना, पर अब्बा को है जिसनै मैं भेजो हौं।
25 “जे बात तुमरे संग रैहते भए मैंनै तुमसै कैंई। 26पर सायता कन्नै बारो यानी पबित्तर आत्मा जिसकै अब्बा मेरे नाम सै भेजैगो, बौ तुमकै सब बात सिकागो, और सब कुछ जो मैंनै तुमकै कैई, तुमकै याद करागो।
27 “मैं तुमकै अपनी सान्ति देए जाबौ हौं, अपनी सान्ति तुमकै देवौ हौं, ऐंसे ना देवौ हौं जैसे दुनिया तुमकै देवै है। तुमरो मन ना घबराऐ और ना डरै। 28तुमनै सुनी, कै मैंनै तुमसै कैई, ‘मैं जा रओ हौं और फिर तुमरे धौंरे आंगो।’ अगर तुम मैंसै पियार करते तौ खुस होते, इसताँई कै मैं अब्बा के धौंरे जा रओ हौं, कैसेकै अब्बा मैंसै महान है। 29और इसके होनै सै पैले मैंनै तुमकै अबी बता दई है, जिस्सै कै जब जौ हो जाय तौ तुम बिसवास करौ। 30मैं तुमसै अब और जादा ना कैंगो, कैसेकै इस दुनिया मै राज कन्नै बारो आ रओ है, और बाको मेरे ऊपर कोई अधकार ना है, 31पर इसताँई कै दुनिया जान ले कै मैं अब्बा सै पियार करौ हौं और जिस तरै अब्बा नै मैंकै आगियाँ दई है, मैं बैसोई बाकै करौ हौं। ‘उठौ, हिंया सै चलौ।’ ”
Sélection en cours:
यहून्ना 14: TKB
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
New Life Compute Institute [NLCI] - CC BY-NC-ND 4.0
