यहून्ना 10
10
अच्छो गरड़ीआ और बाकी भेड़
1ईसु नै कैई, “मैं तुमसै सच-सच कैबौ हौं, जो भेड़साला मै मौहड़े सै भीतर ना जावै है, पर किसी दूसरी ओर सै चढ़कै बर जावै है, बौ चोर और डाँकू है। 2पर जो मौहड़े सै भीतर जावै है, बौ भेड़ौ कै चुंगानै बारो है। 3चौकीदार बाके ताँई मौहड़ो खोलै है, और भेड़ बाकी अबाज पैचानै हैं, और बौ अपनी भेड़ौ को नाम ले-लेकै बुलाबै है और उनकै बाहार ले जावै है। 4जब बौ अपनी सब भेड़ौ कै बाहार लिकार लेबै है तौ उनके अग्गे-अग्गे चलै है, और भेड़ बाके पिच्छे पिच्छे हो लेबै हैं कैसेकै बे बाकी अबाज पैचानै हैं। 5और बे किसी दूसरे के पिच्छे कबी ना जांगी, पर बासै भाजंगी, कैसेकै बे दूसरौं की अबाज ना पैचानै हैं।”
6ईसु नै उनसै जौ दासतान कैई, पर बे ना समजे कै जौ का बात है जो बौ हम सै कैरओ है।
ईसु अच्छो गरड़ीआ
7इसताँई ईसु नै फिर उनसै कैई, “मैं तुमसै सच-सच कैबौ हौं, भेड़ौ को मौहड़ो मैं हौं। 8जितने मैंसै पैले आए बे सब चोर और डाँकू हैं, पर भेड़ौ नै उनकी ना सुनी। 9मौहड़ो मैं हौं। अगर कोई मेरे दुआरा भीतर जावै है तौ बौ मुक्ति पागो, और भीतर बाहार आगो जागो और उसकै अच्छी घाँस की जघै मिलैगी। 10चोर सिरप चोरी कन्नै, हत्तिया कन्नै और नास कन्नै आवै है। मैं इसताँई आओ हौं कै बे भरपूर जिन्दगी पा सकैं।
11 “अच्छो गरड़ीआ मैं हौं, अच्छो गरड़ीआ भेड़ौ के ताँई अपनी जान देवै है। 12जो मजदूर है, बौ गरड़ीआ ना है, और नाई भेड़ौ को मालिक है, भिड़िया कै आते देख भेड़ौ कै छोड़कै भाज जावै है और भिड़िया झपटकै उनकै इतै-उतै भजा देवै है। 13बौ इसताँई भाज जावै है, कैसेकै बौ मजदूर है और बाकै भेड़ौ की फिकर ना है।
14 #
मत्ती 11:27; लूका 10:22 “अच्छो गरड़ीआ मैं हौं, मैं अपनी भेड़ौ कै जानौ हौं, और मेरी भेड़ मैंकै जानै हैं। 15बैसेई जैसे अब्बा मैंकै जानै है और मैं अब्बा कै जानौ हौं, और मैं भेड़ौ के ताँई अपनी जान देवौ हौं। 16मेरी और बी भेड़ हैं, जो इस बाडे़ की ना हैं। मैंकै उनकै बी लानो जरूरी है, और बे मेरी अबाज सुनंगी, तब उनको एकई झुन्ड और एकई गरड़ीआ होगो। 17इसी बजै सै अब्बा मैंसै पियार करै है, कैसेकै मैं अपनी जान देवौ हौं, कै बाकै फिर लेलौं। 18कोई मेरी जान मैंसै ना छीन सकै है, पर मैं बाकै अपने आप देवौ हौं मैंकै बाकै दैनै को अधकार है, और फिर ले लैनै को बी अधकार है। जौ आगियाँ मैंकै अपने अब्बा सै मिली है।”
19इन बातौं की बजै सै यहूदिऔं मै फिर फूट पड़ गई। 20और भौत से कैललगे, “जामै दुसट आत्मा है और जौ पागल है। तुम बाकी काए सुनौ हौ?” 21दूसरे कैरए हे, “जे बात ऐंसे आदमी की ना हो सकैं हैं जिसमै दुसट आत्मा हो। का दुसट आत्मा अन्धे आदमी की आँखौ कै ठीक कर सकै है?”
यहूदिऔं को अबिसवास
22जाड़े के टैम मै ऐरूसलेम मै समरपन तौहार#10:22 समरपन तौहार (सब्द भन्डार मै देखौ) मनाओ जा रओ हो। 23और ईसु मन्दर मै सुलेमान के दैहरी मै टैहल रओ हो। 24तबई यहूदी नेताऔं नै बाकै घेर लओ और बोले, “तू हमकै कब तक तंग करतो रैहगो? अगर तू मसी है, तौ साप-साप बता।”
25ईसु नै उनकै जबाब देओ, “मैंनै तुमसै कैई ही पर तुमनै बिसवास ना करो, जो काम मैं अपने अब्बा के नाम सै करौ हौं, बेई मेरे बारे मै गभाई देवै हैं। 26पर तुम बिसवास ना करौ हौ कैसेकै तुम मेरी भेड़ौ मै सै ना हौ। 27मेरी भेड़ मेरी अबाज सुनै हैं और मैं उनकै जानो हौं, और बे मेरे पीछे-पीछे चलै हैं। 28और मैं उनकै हमेसा की जिन्दगी देवौ हौं, और बे कबी नास ना हौंगी, और कोई बी उनकै मेरे हातौ सै छीन ना सकै है। 29मेरो अब्बा, जिसनै उनकै मैंकै देओ है, सबसै महान है, और कोई बी उनकै अब्बा के हातौ सै छीन ना सकै है। 30मैं और मेरो अब्बा एक हैं।”
31यहूदिऔं नै बाकै मारनै के ताँई फिर पत्थर उठा लए। 32ईसु नै उनकै जबाब दओ, “मैंनै तुमकै अब्बा की ओर सै भौत से अच्छे काम दिखाए, उनमै सै किस काम के ताँई तुम मेरे ऊपर पत्थर मार रऐ हौ?”
33यहूदिऔं नै बाकै जबाब दओ, “हम अच्छे काम के ताँई तेरे ऊपर पत्थर ना मारै हैं, पर परमेसर की बुराई कन्नै के कारन, और इसताँई बी कै तू आदमी होकै अपने आपकै परमेसर बताबै है।”
34ईसु नै उनकै जबाब दओ, “का तुमरे नियम मै ना लिखो है, ‘कै मैंनै कैई, तुम सबई भगबान हौ?’ 35जबकि बानै उनकै भगबान कैई ही जिनके धौंरे परमेसर को बचन पौंचो और पबित्तर सास्तर की बात कबी झूँटी ना हो सकै हैं। 36तौ जिसकै अब्बा नै पबित्तर ठैराकै दुनिया मै भेजो है। तुम बासै कैबौ हौ कै तू परमेसर की बुराई करै है, इसताँई कै मैंनै कैई, ‘मैं परमेसर को लौंड़ा हौं’। 37अगर मैं अपने अब्बा को काम ना करतो तौ मेरो बिसवास ना करौ। 38पर अगर मैं उनकै करौ हौं और तुम मेरो बिसवास ना करौ हौ, पर उन कामौ के कारन तौ बिसवास करौ कै तुम जानौ और समजौ कै अब्बा मैंई मै है और मैंई अब्बा मै हौं।”
39तब उनौनै बाकै पकड़नै की कोसिस करी, पर बौ उनके हात सै बचकै लिकर गओ।
40 #
यहून 1:28
और बौ फिर यरदन नद्दी पार बा जघै मै चलो गओ जहाँ यहून्ना पैले जल संस्कार देवै हो, और बौ बहीं रैहैल लगो। 41भौस्से आदमी बाके धौंरे आकै जौ कैबै हे, “यहून्ना नै तौ कोई चिन्न ना दिखाओ, फिर बी बानै जो कुछ इस आदमी के बारे मै कैई ही, बौ सब सच हो।” 42बहाँ भौत से आदमिऔ नै ईसु मै बिसवास करो।
Sélection en cours:
यहून्ना 10: TKB
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
New Life Compute Institute [NLCI] - CC BY-NC-ND 4.0
