1 Yohan 3
3
Gvray àngcèrì nø mvrà wá mvmvnshì we
1Vpè Gvrayí nøngmaq sv̀ng Gvray àngcèrì wa ètǿì høqshaq, kadvngshì ring dø èshòng daqshà we sv̀ng dèdvmnø̀ng. Jø̀ngjǿng ni nøngmaq nø Gvray àngcèrì íshàe. Rvgaq tø̀m vsà:ngí nø Gvray kaq mvsháò. Wervtnø̀, nøngmaq sv̀ng gø àngmaqí mèsháì. #Yoh. 1:12-13 2Shóngshø̀ng rìé, akvt nøngmaq nø Gvray àngcèrì íshàe. Íwe dvgáni kadø í lú:ngì we shini mvsháì. Ínìgø Kristu di daq kvt, nøngmaq nø Àng dø í lú:ngì we sv̀ng sháìe. Kadø íe wani, Àng kadø í we sv̀ng nøngmaqí chaqdap yv̀ng bǿìe. #2Kr. 3:18; Pil. 3:21; Kol. 3:4 3Kristu taq nøt vlǿmrà yalòng vdá we kagǿ ínìgø, Kristu nø mvrà màvl pè í dø, àng vdè gø mvrà kèní sarshìe.
4Mvrà wá mvnshì gǿ vrà:mí nø, Gvray dvrá sv̀ng vléò we íe. Pawá wani mvrà nø Gvray dvrá sv̀ng vléò lòng íe. 5Kristu dì daqì we nø nøngmaq mvràrì lúalv́m rvt í we èshánø̀nge. Vrá, Àng taq nø mvrà màvl. #Esa. 53:4-5; Yoh. 1:29; 1Pt. 2:24 6Kristu nv̀ng vzø̀m gǿ nø mvrà wá mvmvnshì. Mvrà wá ma:nò vsv̀ng kagǿ í nìgø, Àng sv̀ng mvyv̀ng dá:rò. Shá gø mvsháò. #Rom. 6:14
7Ngàcèrìé, kagǿí gø nàmaq sv̀ng yúm mèdèzv́rshìnø̀ngni. Døngman lòng wàò gǿ nø, Kristu døngman dø àng gø døngmane. #1Yh. 2:29 8Mvrà wá mvnshì gǿ nø Satanpèò íe. Pàwá wani Satan nø nv̀mlat kèní mvrà wàò pè íe. Satan bv̀nlìrì shvmv́nglv́m rvtnø̀ Gvray Àngcèpè dì daqì. #Yoh. 8:44 9Gvray àngcè kagǿ gø mvrà wá mvmvnshì. Kadø íe wani, Gvray gø̀nshaq nø àng vdòng taq vl nø̀, àng nø Gvray àngcè í rvt mvrà zv̀ndvtut wá màshvla. #1Yh. 5:18 10Døngman lòng mvwàò nø̀ àngnvm àngchvng sv̀ng mvshóngshì gǿ nø Gvray àngcè mø̀í. Yalòng taqkèní nøngmaqí Gvray àngcèrì nv̀ng Satan àngcèrì sv̀ng vwál sháìe.
Gvray àngcèrì nø vshòngké rà we
11Nøngmaq tiqgǿ nø tiqgǿ vshòngké ràe, wa kà nø, nv̀mlat kèní nàmaqí vtáshaq íe. #Yoh. 13:34; 15:12 12Kain dø mèwáshìnø̀ngni. Àng nø Satanpèò í nø̀ àngnvmpè sv̀ng shvt yà:ngà. Pàwá sha:tnòe? Àng bv̀nlì nø mvgvm we í nø̀, àngnvmpè bv̀nlì nø døngman rvt íe. #Nnp. 4:1-16 13Vnvm vchvngrìé, rvgaqtø̀m vsà:ngí nàmaq sv̀ng shèngovtnø̀ng dvgvp mènàtiqnø̀ngni. #Mat. 5:11; Yoh. 15:18-19 14Shìlòng kèní gø̀nshaq vdòng sv̀ng gòng bǿshà we shálv́m shvkse nø vnvm vchvngrì sv̀ng shóngshàì lòng íe. Àngnvm àngchvng kaq mvshóngshì gǿ nø shìlòng taq shini vle. #Yoh. 5:24; 1Yh. 2:11 15Àngnvm àngchvng sv̀ng shvngoshì we kagǿ ínìgø vsv̀ng shvtshú íe. Vsv̀ng shvtshú kagǿ taq gø dvciqlvpat gø̀nshaq màvl we nàmaqí èshánø̀nge. #Mat. 5:21-22
16Nøngmaq dvpvt Kristu gø̀nshaq zíshì lòng taqkèní, shóngnøt nø pà í we nøngmaqí sháìe. Nøngmaq gø vnvm vchvngrì dvpvt gø̀nshaq zíshì ràe. #Yoh. 15:13; Gal. 2:20 17Luqtv̀m dø vdá we tiqgǿ nø àngnvm àngchvng dvshà we sv̀ng yà:ngò nìgø, dvshá mvzaò nìnø, àng taq Gvray shóngnøt kadøwa lvvl ni? #Drd. 15:7; Yak. 2:15-17; 1Yh. 4:20 18Ngàcèrìé, nøngmaq nø kàí wa mø̀í dø, bv̀nlì taqkèní shóngnøt vjø̀ng dvtanlv́m wàì.#Yak. 1:22
19Welòng taqkèní nøngmaq nø dìnglòng taq à:lì we sháshàì nø̀, Gvray mv́rdv̀ngø nøt mòngzø̀llv́m vle. 20Vdè nøt mvsø̀:ní vdè sv̀ng mvrà shvrishàì nìgø, Gvray nø nøngmaq nøt mvsø̀n mvdv̀m te pè í nø̀, À:ngí nø pà gø shá gǿ:mò pè í we sv̀ng sháìe. 21Shóngshø̀ngrìé, vdè nøt mvsø:ní vdè sv̀ng mvrà shvrilv́m pà gø màvl nìnø, nøngmaq nø Gvray mv́rdv̀ngø nvrø̀m télv́m vl nø̀ #Rom. 5:1; Heb. 4:16 22pà rø:tnì nìgø Àng yv́ngkèní lú:nìe. Pàwá wani Àng dvkv́mkàrì nøngmaqí cà:nì sórí, Àng wv́mshì dø wàì rvt íe. #Mak. 11:24 23Àng dvkv́mkà nø, Àngcèpè Yesu Kristu sv̀ng nøngmaq ká:mì nø̀ À:ngí dèkv́m daqshà dø tiqgǿ nø tiqgǿ vshòngkélv́m lòng íe. #Yoh. 6:29; 15:17 24Gvray dvkv́mkàrì sv̀ng cv̀n rì nø, Gvray nv̀ng vzø̀m nø̀, Gvray gø àngmaq nv̀ng vzø̀me. Gvray nø nøngmaq nv̀ng vzø̀m we sv̀ng A:ngí èzí daqshà we Shànshér Pvlàcè taqkèní sháìe. #Rom. 8:9; 1Yh. 4:13
Sélection en cours:
1 Yohan 3: GSM
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2025 Rvcv́ngcè Kàru Gomidi Kristu Shvngø̀mré. All Rights Reserved.