1 Yohan 1
1
Yesu nø gø̀nshaq Mòngkà í we
1Nv̀mlat nv̀mpv́ng kèní vv́lshaq pè, nøngmaqí vtáshaq, neí gø yv̀ng yv̀ngshà nø̀, nøngmaqí dvjaqì nø̀ wu:rí gø shup yv̀ngshà pè, Àng nø gø̀nshaq Mòngkà í we dvtáa:tnìni. 2Vpè nv̀ng tiqdø vl we gø̀nshaq í pè sv̀ng, nøngmaq kaq dètan daqshà. Dvciqlvpat gø̀nshaq í pè sv̀ng, nøngmaqí yv̀ng yv̀ngshà nø̀ shvkse wáshàì sórí, nàmaq sv̀ng dvtáa:tnìe. #Yoh. 1:1,14 3Nøngmaqí vyv́ngshaq, vtáshaq rì nàmaq sv̀ng dvtáì we nø, nàmaq nø nøngmaq nv̀ng vzø̀m vzvplv́m dvpvt íe. Nøngmaq nø Vpè nv̀ng gø Àngcèpè Yesu Kristu ó gø vzø̀m vza:pmì we íe. 4Nøngmaq nø dvbù lòng dv̀nzø̀nglv́m dvpvt, yadv́ng pv̀n vrua:tnìe.
Gvray nø gálòng í we
5Àng yv́ngkèní tá bǿshà nø̀ nàmaq sv̀ng dvtá mvyǿì we shv̀ngkà nø, Gvray nø gálòng í nø̀ Àng vdòng taq dølòng tiqhvncè gø màvl, wa kà íe. 6Wervt, nøngmaq nø Gvray nv̀ng vzø̀m vza:pmìe, wàì dá:ngí dølòng vdòng la cv́n mvnshàì nìnø, nøngmaq nø vyàì nø̀ dìnglòng mvwàì we íe. #Yoh. 3:20-21; 1Yh. 2:4 7Íwe, Gvray nø gálòng vdòng vl dø tiqdvchá, nøngmaq gø gálòng vdòngø cà:nì kvtnø, nøngmaq tiqgǿ nø tiqgǿ vzø̀:mì nø̀, Àngcèpè Yesu Àng shvwií nøngmaq mvrà í dv́ngte dèshvngaìe. 8Nøngmaq nø mvrà màà:lì, la wàì nìnø, vdè sv̀ng yúmshàì nø̀, nøngmaq vdòng taq dìnglòng màvl. 9Gvray nø kv́mv́m vrvm nø̀ døngman pè íe. Wervt nøngmaq mvrà vchángshàì kvtnø, mvrà èchutnaì nø̀, nøngmaq mvdøng mvma:nì we í dv́ngte sv̀ng dèshvngaìe. #Ksh. 28:13 10Nøngmaqí mvrà mvwà dá:rì, la wàì nìnø, Gvray kaq vyá naá:mì we í nø̀, Àng mòngkà gø nøngmaq vdòng taq màvl.
Sélection en cours:
1 Yohan 1: GSM
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2025 Rvcv́ngcè Kàru Gomidi Kristu Shvngø̀mré. All Rights Reserved.