रोमानियनमन 14
14
अपन भाई उपरे दोष ना लगावा
1जे बिसवास में कमजोर अहे, उके अपन संगति में लेई लेवा, मगर खाएक पियेक केर चीज उपरे उकर से बक-झक ना करा कि उके का खाएक चाही आउर का नी खाएक चाही। 2काले कि एक झन के बिसवास अहे कि सोउब कुछ खाएक उचित अहे, मगर जे बिसवास में कमजोर अहे, उ साग-सब्जी हें खायला। 3एक झन माँस खायला आउर एक झन साग सब्जी खायला, माँस खाएक वाला, साग सब्जी खाएक वाला के तुच्छ ना करोक, आउर साग सब्जी खाएक वाला, माँस खाएक वाला केर उपरे दोष ना लगाओक, काले कि परमेश्वर दुइयो के ग्रहण करेला। 4तोंय केहर हेकिस जे दोसर केर सेवक उपरे दोष लगाइसला? उ आदमी परमेश्वर केर सेवक हेके। उकर जितेक या हारेक उकर मालिक उपरे हें टिकल अहे, बल्कि उ जीतये जाई, काले कि प्रभु उके जितवाएक पारेला।
5केऊ तो एक दिन के दोसर दिन से बाइढ़ के मानेला, आउर केऊ सोउब दिन के एक बराबइर मानेला। हर एक झन अपन मन में हें ठाइन लेवोक। 6जे केऊ कोनों दिन के मानेला, तो उ एइसन इ लगिन करेला, काले कि उ प्रभु के आदर देवेक चाहेला। आउर जे केऊ माँस खायला, उ प्रभु लगिन खायला काले कि उ परमेश्वर के धन्यबाद देवेला, आउर जे माँस नी खायला, उ प्रभु लगिन नी खायला आउर परमेश्वर के धन्यबाद देवेला। 7काले कि हमरे सोउब प्रभु केर हेकी। से लगिन हमरे के सिरिफ अपन ले नी जियेक चाही, आउर अगर हमर में से केऊ मोरेला, तो उ सिरिफ अपन लगिन नी मोरेला। 8अगर हमरे जिंदा अही तो प्रभु केर लगिन जिंदा अही, आउर अगर मोरिला तो प्रभु केर लगिन मोरिला, से हमरे जियब चाहे मोरब हमरे प्रभुवे केर हेकी। 9मसीह एहे लगिन मोरलक आउर जी हों उठलक, ताकि उ मोरलमन आउर जिंदामन दुइयो केर प्रभु कहाओक।
10तो तोंय काले अपन बिसवासी भाई उपरे दोष लगाइसला? चाहे तोंय काले अपन भाई के तुच्छ जानिसला? हमरेमन में से सोउब केऊ के परमेश्वर केर फैसला करेक केर कुरसी केर सामने ठड़ा होवेक होवी। 11काले कि पवितर किताब में लिखल अहे कि प्रभु कहेला, “मोंय खुद अपन जिंदगी केर किरिया खावना, हरेक झन मोर सामने ठेहुना टेकबैं, आउर हरेक झन अपन मुँह से परमेश्वर के माइन लेबैं।” 12तो फिन, हमर में से हरेक झन के अपन-अपन काम केर हिसाब परमेश्वर के देवेक होवी।
अपन बिसवासी भाई के भटकाएक वाला ना बना
13से लगिन अब से आगे हमरे एक दोसर उपरे दोष नी लगाब, मगर तोहरेमन इ ठाइन लेवा कि दोसर बिसवासी के पाप करवाएक वाला नी बनब। 14मोंय जानोना, आउर प्रभु यीशु में मोके पक्का बिसवास अहे कि कोनों खाएक केर चीज अशुद्ध नखे, मगर जे उके अशुद्ध समझेला उकर लगिन अशुद्ध अहे। 15अगर तोर बिसवासी भाई तोर खाएक केर चलते दुःखी होवेला, तो तोंय तोर बिसवासी भाई से प्रेम नी करिसला, अगर तोर खाएक केर चलते तोर भाई परमेश्वर केर आगया मानेक छोइड़ देवेला, तो तोंय उ खाएक केर चीज के ना खाबे, काले कि मसीह तोर बिसवासी भाई केर लगिन हों अपन जान के देई हे। 16से लगिन, जे तोंय कराथिस उ अगर बेस हेके, मगर केऊ दोसर उके बुरा मानेला तब तोंय उके ना करबे। 17काले कि परमेश्वर केर राइज में खाएक आउर पियेक खास ना लगे, मगर परमेश्वर केर देखेक में धरमी बनेक, आउर मेल-मिलाप आउर उ खुशी जे पवितर आत्मा से मिलेला, 18ओहे खास हेके। जे केऊ इ नियर मसीह केर सेवा करेला, परमेश्वर उकर से खुश होवेला, आउर दोसर आदमीमन इके पसिंद करैना। 19इ लगिन हमरे के उ गोइठमन में मन लगाएक अहे, जेकर से मेल-मिलाप आउर एक दोसर केर सुधार होवी।
20तोहरे जे खावाला उकर चलते परमेश्वर केर काम के ना बिगड़ावा। सोउब खाएक केर चीज शुद्ध तो अहे, मगर उ चीज के खाएक तब बुरा अहे, जब उके खाएक से दोसर आदमीमन के ठेस लगेला। 21भला तो इ अहे कि तोंय ना माँस खाबे आउर ना दारू पिबे, आउर ना कोनों एइसन काम करबे, जेकर से तोर भाई के ठेस लगी। 22इ सोउब चीजमन केर बारे में तोर जे बिसवास अहे, उ परमेश्वर आउर तोर बीच केर गोइठ हेके। धाइन हेके उ, जे उ गोइठ में जेके उ ठीक बुझेला, खुद के दोषी नी ठहरायला। 23मगर जे, कोनों चीज के खाएक में शंका करेला, आउर उके खायला तो उ पाप करेला, काले कि उ अपन बिसवास केर मोताबिक नी चलेला, आउर जे कोनों बिसवास से नी होवेला उ पाप हेके।
Sélection en cours:
रोमानियनमन 14: SCK
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
Sadri Bible by The Love Fellowship is licensed under Creative Commons Attribution-ShareAlike 4.0 License.
