KUTUHUKA 35
35
1Mose yakungulula chikungulwila cheswe cha A-Izalele. Yamba kuli ayo ngwenyi, Maliji Yehova hamba hanga nukaalinge, wano. 2Nukalinge milimo ha matangwa asambano alioze ha tangwa liamuchishimbiali kumukukapwa tangwa lisandu kuli yenu, Sambata ya uhwimino ulemu kumeso ja Yehova. Mweswawo malingilaho milimo yeswayo, nukamushihe lume. 3Kanda nukawika kahia nikamwe ha tangwa lia Sambata ndusu mazuwo jenu.
4Mose yahanjika ni chikungulwila cheswe cha A-Izalele ngwenyi, Che chuma Yehova hamba chino, ngwenyi, 5Anjilenu Yehova mulambu hakachi kenu. Mweswawo uli ni mbunge ya kutá, akanehe we mulambu kuli Yehova wa oru, ni prata, ni unengu; 6ni mahina alauluka, ni a ufungo, ni a ngengu, ni apema atoma, ni uzangi wa pembe; 7ni malambu a kuji a mapanga a kulomba achila, ni malambu a yipanyundu, ni mitondo ya mukesha; 8ni maji a ndeya, ni tumbuto twa lupembo mupema twa maji a kuwayisa no, ni twa insensu; 9ni mawe a sardonica, ni mawe akaalamike ha efode ni ha chipwiko.
10Mutu mweswe ukwete mbunge ya mana, eze akalinge yize yeswe Yehova hamba. 11Ye tabernakulu, ni mbalaka yayo, ni chifuko chayo, ni sepe jayo, ni matabua jayo, ni njalo jayo, ni manguji jayo, ni yimanyino yayo; 12ni mushete ni mikambo yawo, ni chitwamo cha keke, ni hina lia chikalakala; 13ni mesa ni mikambo yayo, hamwe ni yikashi yeswe yayo, ni mbolo ja kutumbieka; 14ni chikwachilo cha ndeya cha kuhana pangu ni yikashi yacho, ni ndeya jacho, ni maji a ndeya; 15ni chilumbilo cha insensu, ni mikambo yacho, ni maji a kuwayisa no, ni insensu ya lupembo mupema, ni hina lia kufuka ku chikolo cha tabernakulu; 16ni chilumbilo cha milambu ya kulumba, hamwe ni sambu jacho ja unengu, ni mikambo yacho, ni yikashi yeswe yacho, ni lumbasia lwa kusanyina ni nganda yalwo; 17ni mahina a kuzezeleka a yize ni manguji jo, ni yimanyino yo, ni hina lia kufuka ku chikolo cha ku yize; 18ni mbambo ja ku tabernakulu, ni mbambo ja ku yize, ni mihipu yajo; 19ni mazalo a kutonga ni ulangaji a kulingila muma musandu, mazalo asandu a sasendote Arone, ni mazalo ja ana jenyi a malunga mukulingila usasendote.
20Chikungulwila cheswe cha A-Izalele chakatukile kumeso ja Mose. 21Mba atu eswe, mutu mweswe mbunge yenyi yinazange, Spiritu ya kutá ali nayo yaya, yatwala mulambu wa Yehova, ukapwe wa milimo ya ku mbalaka ya chikungulwila, ni wa uvumbiko weswe wayo, ni wa mazalo asandu. 22Mba yaya, malunga ni mapwo eswe apwile ni mbunge ja kutá, yatwala mikosa, ni yingelengele, ni tuzeya, ni yijingo, ni upite weswe wa oru. Mukwa kulambula mweswe, walambwile Yehova mulambu wa oru. 23Mutu mweswe wapwile ni mahina alauluka, ni a ufungo, ni a ngengu, ni apema atoma, ni uzangi wa pembe, ni malambu a kuji a mapanga a kulomba achila, ni malambu a yipanyundu, yaatwala. 24Mutu mweswe yoze walambwile mulambu wa prata ni wa unengu atwalile mulambu wa Yehova. Mutu mweswe wapwile ni mitondo ya mukesha ayitwalile, yikapwe ya milimo yeswayo ya uvumbiko. 25Mapwo eswe apwile ni mbunge ja mana yahosa ni moko jo, yatwala chize ahosele te mahina alauluka, ni a ufungo, ni a ngengu, ni apema atoma. 26Mapwo eswe aze mbunge jo jazangile ni mana, yahosa uzangi wa pembe. 27Miata yatwala mawe a sardonica ni mawe akaalamike a efode ni a chipwiko. 28Ni tumbuto twa lupembo mupema, ni maji a ndeya, ni maji a kuwayisa no, ni a insensu ya lupembo mupema. 29A-Izalele yatwalila Yehova mulambu wa vumbi, lunga mweswe, pwo mweswe mbunge jo jatayile mukutwala ha milimo yeswe yize ambile Yehova akayilinge ku kwoko lia Mose.
30Mose yamba kuli A-Izalele ngwenyi, Yehova hanatambika ni jina lienyi Mbezalele, mwana Uri, mwana Hure, wa ku vungu lia Yunda. 31Hanamuzalisa ni Spiritu ya Zambi, ni mana, ni malinjekela, ni yinyingi, ni ulangaji weka ni weka, 32mukutomba milimo ya ulangaji ya oru, ni ya prata, ni ya unengu, 33ni ya kutota mawe a kunjisa mu yituwa yo, ni ya kwola ha mitondo mukulinga milimo yeswe yeka ni yeka ya ulangaji. 34Yamwahacho mu mbunge yenyi akalongese, neye ni Aholiambe, mwana Ahisamake wa ku vungu lia Ndane. 35Hanazalisa wano ni mana mukulinga ulangaji weka ni weka ni wa mukwa kwola ha mawe, ni wa chilangaji, ni wa mukwa kwola ha mahina alauluka, ni a ufungo, ni a ngengu, ni apema atoma, ni wa mukwa kuseleka, ni wa a kutomba milimo ya ulangaji.
Sélection en cours:
KUTUHUKA 35: Csa
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
Chokwe Bible © Bible Society in Angola, 1975.
