Dibandu 2
2
1Anana julu na butamba na biotsu abivu muna bimasundulu. 2Yiotsu yiyilumbu yimusambuali Nsambi amamana bisalu biandi biotsu; mu yilumbu yimusambuali amavuma, amamana bisalu biandi biotsu. 3Kabogu Nsambi amagusula yilumbu yimusambuali na amayivaga yilumbu yiuvuma diwendi rie: yilumbu yiandi mu mbari muna yilumbu yieni bisalu biandi biotsu bimusunditsi bimasuka. 4Anana julu na butambu bimasundulu.
Nungi Eden
Ava Fumu Nsambi amavayila tsi na julu 5vasamaleba ne muiri umosi va tsi na vasamaleba ne yivaru yimosi. Fumu Nsambi mbe asakanoyisa mfula na mbe asakasunda mutu usalanga butamba. 6Vamaba dimungi adimamatanga uyenatsatsanga butamba buotsu.
7Fumu Nsambi amabonga butamba na amabumba mutu, amavotsa punga jimonyu mu miunu mimbasu andi na monyu umakota mutu. 8Mbana Fumu Nsambi amavara nungi o musiru uEden o yiari ayi wisi epalili na amasunsa mutu agu amasunda guna. 9Fumu Nsambi amabendisa miri miminongu na minongu: amiboti ugengila na amiburi milunda miboti uji, no gari nungi umaba muiri aguiburi milunda amiveyi monyu, na muiri aguiburi milunda amijabisi motsu.
10Mujamba umapalila o Eden utsatsila nungi, avana umakegabila mijamba mina. 11Diina dimujamba utega divu Pischon; aguna aguitsiengili bulongu buHavila, o yiari yieni bedilili lora. 12Lora jiyiari yieni jivu tindi lora. Aguna bedilili maka amavu na mbunga jiboti amenengulungu bdellium na dimanyi adivu na dufunu duneni adinengulungu onikisa. 13Diina dimujamba agumubeji Guihon; aguna aguitsiengili bulongu buotsu buCusch. 14Diina dimujamba agumurieru divu Tigre; aguna aguivindimi o yiari ayi wisi epalili yimusiengi uAssour. Diina dimujamba agumuina divu Euphrate.
15Fumu Nsambi amabonga mutu na amamusunsa o nungi Eden ujisalanga nojikipanga. 16Fumu Nsambi amamuruma rie: Janganga milunda mimiri miotsu minungi; 17tumba guyaji milunda mimuiri aguijabisi motsu mu mbari yilumbu ayi gumiji gufu.
18Fumu Nsambi amatasa rie: Disawelimina yiri mutu abi pinsa; nyumuvayila muwamusi agubagunu nandi. 19Fumu Nsambi amabonga butamba na amabumba bibulu biotsu na batsoli botsu na amabiwendisa ombu mutu ubiluga miina, diina yika la diina adi mutu amabiluga adina binengulungu. 20Mutu amaluga biruitsi biotsu miina na batsoli na bibulu biotsu bimusiru; tumba asamaba na muwamusi agumabagunu tiandi. 21Mbana Fumu Nsambi amamuwendisa yilu yineni na amabonga dubansi duandi dumosi na amagulasana mbura aji amadubongila. 22Fumu Nsambi amakalusa dubansi adu amabongila mu dunyuru dumutu mugetu na amamuwendisa ombu gandi. 23Mbana mutu amavosa rie:
Agugu ebagunu nami
avu yivisi yiami na musonyi ami!
Onengulungu mugetu,
mu mbari amabongulu mu dunyuru dudibaala.
24La dibandu dibaala osilila taji andi na nguji andi nofubana na mugatsi andi, jogu babeji boba umosi.
25Dibaala na mugatsi andi botsu babeji bamaba penyi tumba basamalabanga yisonyi.
Sélection en cours:
Dibandu 2: PUU1992
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
La sainte Bible en langue Yipunu © Alliance Biblique du Cameroun, 1992.