Lburania 6
6
1Naaku naa meyiere ake naaku mbaa ekue naayiere nikiyielou naaipirita Kristo eiteng'eni iyioo, kake keyiere nikipuo kue aabaki nkiteng'ena nairirikino ltung'ana botoro. Nimikingil aitoki aachukokino nkiteng'ena ekue naipirita nikinko tinikirriidu asat naayaki iyioo lkiye o nikinko tinikiruk Nkai. 2Nimikintoki sii aachukokino nkiteng'ena ekue naipirita nkipatisa o nkitelekinoto ee nkaik o mpiunoto ee lootuata o nkiguana ee ntarasi. 3Naaku ikipuo kue, echam Nkai, aabaki nkiteng'ena naairirikino ltung'ana ootobotorito.
4-6Amu meidimai payie echukuni lolo tung'ana meeirriidu, ootumo apa wong'an e Nkai neichamichamita nkichooroto enye naing'uaa chumata, netang'amaitie Ltau Sinyati. Keichamchamita ninche rerei supat le Nkai o ngolon e Nkai e ng'amata nalotu, neitoki aarriaa. Kore teneas nejia, naa keitorno tee ninche, amu inji etuwuana teneigilieki Nkerai e Nkai lmusalaba aache, neitami anyit tekue ltung'ana. 7Kore lchampa oamat nkare nachaki chiaake nchan, neitubulu ndaa naret laturoni naa ketum mayian e Nkai. 8#Ng'as 3:17,18Kake kore lchampa laa lkuku ake o ndeti naabulu naa meata tipat, netaa kedeki kore tesiedi nepejori. 9Sotuatin lainien lacham, kore abaki kijoito nchi, ikiata sipata naipirita ntae aajo irara ntae lchampa supat olang ilo, naa itumtum njeunoto. 10Kore Nkai naa keisiligai, merikino nitaasa o nchaman nintoduaita ninye, payie iretret ltung'ana lenyena sinyat, newuon ake ipuoitoto kue aaret ninche. 11Kore nikiyieu oleng, naa metaa meatae hoo lobo linchi lemeitodolu ake inia nyuata payie kimbung ilo siligi odede likiata, ana metabai katukul te nkiting'oto. 12Mikiyieu niakuku ltung'ana oaachal, kake ikiyieu payie iduaayaya lolo laa kore to nkurukoto o te ng'iriata, naa ketum inia naitayia ꞉Nkai lekutuk ajo keicho ninche.
Megila lekutuk oitayia Nkai
13Kore apa payie eitaki ꞉Nkai Abraam lekutuk, neitaki eipot nkarna enye koon amu meatae nkae arna nara kitok ta nkarna enye naaidim aitainyie lekutuk, nejo,
14 #
Ng'as 22:16,17 <<Meata ajo maamayian iyie,
naponaa ichoi ino aaitaa kitok.>>
15Neanyu Abraam te ng'iriata, netum inia naitaka ꞉Nkai lekutuk ajo kaicho. 16Amu kore ltung'ana naa keitai lekutuk eipot nkarn ee lolo oaara kutuaa tee ninche, neitededei inia natejo neiting'ie nchankar pooki naata. 17Nejia naa ake etiu, kore tankaraki keyieu apa Nkai neitodol katukul lolo ootum lekutuk lenye nchere meibelekenya yieuna enye, neitisipu inia bae eipot nkarna enye koon. 18Naaku kore aimu kuna baa are nemeibelekenya aikata naataasa Nkai, neitu taa esapicho Nkai, kore iyioo ooisigakita ninye, nikitum rreten kitok nikimbung'ie aaitirrichaki ele siligi otipikaki tekue iyioo. 19#Lal 16:2Ikiata ele siligi laa ltauja lang errapa neisiligai, netuwuana lgiitani ooenikino senkei nkue naenieki meli payie meya nkare. Kore ilo siligi naa keuno to Ng'oji sinyati naaisul pooki, te idia alo inia anka naor apa ng'oji sinyati o ng'oji sinyati nalang pooki ta nkaji e Nkai, 20#SNk 110:4inie netijing'a apa Yeso oituruko tekue iyioo ta mpaach ang. Ketaa ninye laitainoni kitok la lasar ntarasi ana neikununo apa Melkisedek.
Sélection en cours:
Lburania 6: saq
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2021, Bible Translation and Literacy