Akisy. 3
3
Asecit ŋina esyaunan ka akisicanet keŋ
(Ŋirom. 5:12-21)
1Arae emun etyaŋ ŋolo aratana ka aos nooi akilo ŋityaŋ daadaŋ ŋulu ka ariet ŋulu abu Ekapolon Akuj tosub. Tolimok emun aberu tema, “Erae mono kire atemar ikilimokinit iyes Akuj ebe, ‘Nyinyam arait a ekitoe a edio alomanikor’ a?” 2Toboŋok aberu emun tema, “Ikicamakinitae isua akinyam ŋaraito a ŋolokitoe daadaŋ alomanikor, 3nai arait ŋina a ekitoe a ŋolo eyai kidiŋ emanikor, ebala Akuj, ‘Nyinyam arait a ekitoe a ŋol, kori nyitapa daŋ,’ anerae kinyama iyes itwakete” 4Nai tolimok emun aberu tema, “Kire jik nyitwakete iyes. 5Elimunit Akuj ŋun, anerae eyeni atemar akoloŋit ŋina inyamyata iyes arait ŋin, eŋaarosi ŋatameta kus toyenut ŋuna ajokak ka ŋuna aronok lopite ŋolo eyenia Akuj.” 6Kiŋolik aberu ekitoe ejok aŋuna ka akimuj, tonira daŋ ŋakonyen keŋ; tonira iŋes ekitoe aŋuna ka aosou a ŋina ikiini. Tosodi todeŋu arait alokitoe a ŋol tonyam, inak ekile keŋ daŋ ŋolo arukito ka iŋes apaki ŋin, tonyam. 7Toŋaaros ŋatameta a ŋuluarei a ŋul, toyenut atemar alerete ikes. Todeŋut ŋakwii a ebobore, tonapa erae ŋilowi a ŋacirin kec.
8Akoloŋit ŋin eboŋ ipilipiliuni ekuwuam ŋolo alilimon, kiirasi ikes Ekapolon Akuj elosi alomanikor, toŋopa ekile ka aberu keŋ aneni ke Ekapolon Akuj, toduka alokidiŋ ŋikito ŋulu a emanikor. 9Tonyara Ekapolon Akuj ekile kiŋit tema, “Ai iyai iyoŋ?” 10Tema ekile, “Abu ayoŋ ekeira iyoŋ ilosi alomanikor, ido abu eketim ayakau nen, anerae aleri ayoŋ, aŋun, abu oduk.” 11Kiŋit Akuj iŋes tema, “Ŋae ikilimokini iyoŋ atemar ileri? Idau iyoŋ akinyam arait a ekitoe a ŋolo ekecikit ayoŋ iyoŋ atemar nyinyam a?” 12Tema ekile, “Aberu ŋina iyauni iyoŋ akiruk ka ayoŋ iŋes abu okoinak ayoŋ arait a ekitoe a ŋol, ido abu onyam.” 13Kiŋit Ekapolon Akuj aberu tema, “Anukiro nu ŋuna itiya iyoŋ?” Tema aberu, “Emun akamodikini ayoŋ, ido abu onyam.”
14Tolimok Ekapolon Akuj emun tema,
“Aŋuna itiyaa iyoŋ ŋun,
iruwor iyoŋ ekaŋilam alotyaŋ a daadaŋ
ka alosubuna a daadaŋ a ŋulu ka ariet;
ilyae iyoŋ a akook kon
inyami iyoŋ apuwa
ŋarwa ŋuna a akonikiyar daadaŋ.
15Ekesimanakini ayoŋ iyoŋ ka aberu,
imanakin ŋidwe kon ka ŋidwe a aberu;
ewani ituŋanan akou kon
ka iwani iyoŋ atotinyo a ituŋanan.”
16Tolimok Akuj aberu tema,
“Eyatakini ayoŋ aryebo neni kon nooi apaki ŋina iryamunia akook;
idoe anaryeba
ka irubakini iitanit ekile kon;
ikipolokini iŋes iyoŋ.”
17Tolimok Akuj ekile tema,
“Aŋuna ibunio iyoŋ kiira ŋakiro a aberu kon
ka idau akinyam arait a ekitoe a ŋolo ekecikit ayoŋ iyoŋ
atemar nyinyam arait keŋ;
eryamunete ŋalup ŋilam aŋuna kon;
iryamuni tokona iyoŋ akimuj analup anabukor ŋakinyinyir ŋirwa daadaŋ ŋulu ka akiyar kon.
18Elomunete analup ŋikukwa ka edowan aŋuna kon,
ido inyami iyoŋ ŋikito ka ŋinya ŋulu ka ariet.
19Imuji iyoŋ kidau abukor ŋakinyinyir aloreet
akitodol ŋina iboŋorya iyoŋ nalup,
anerae nalup iŋes ikilemunere iyoŋ;
irae iyoŋ ŋalup,
tosodi nalup iŋes iboŋori iyoŋ.”
20Tolimok ekile aberu keŋ ekiro Epa, anerae abu iŋes toruwor toto a ŋituŋa a daadaŋ a ŋulu eyarete. 21Kitiyau Ekapolon Akuj alolowi a ŋityaŋ ŋilowi, aŋuna a ekile ka aberu keŋ kitanap ikes.
22Tema Ekapolon Akuj, “Toanyutu, ekwaanikin ituŋanan ka iwon, ayenu ŋuna ajokak ka ŋuna aronok, tosodi tokona epedori daŋ iŋes alemun arait a ekitoe a ŋolo ka akiyar tonyam toyar ŋikaru ka ŋikaru.” 23Aŋun, abu Ekapolon Akuj kirita ituŋanan alomanikor ke Eden, kituruwo iŋes eketan ŋalup ŋunapei sek alemunere iŋes. 24Kirita Akuj ituŋanan alomanikor ka Eden, ido kiwuak ŋimalaikan ŋulu enyaritae Ŋikerubim akiboi alo Kide emanikor ke Eden, kiwuak daŋ ekileŋ ŋolo emilimili nooi kirimi, kiyoki erot ŋolo elosi lokitoe ŋolo ka akiyar.
Sélection en cours:
Akisy. 3: NIB2008
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Ngakarimojong Interconfessional Bible © Bible Society of Uganda, 2008.